Zyeremii 17 - Cebaara Bible 2010

Yawe n Zyuda ye kolomi kéele joo

¹ «Zyuda kapeeli n sɛ́bɛ ní tunmɔrɔ ŋáana, ní lúlu ŋáafirigege ní. Li n kánʔana n wòlo pe fúnyi kàlagorigēle na ní yele sáriga-wòlo-yafaanyi nyɛ́ngéle na.

² Kánmi bee na be pìíbèle a ra sɔ̀ngí da taagi pe sáriga-wòlo-yafaanyi, ní be Asyera tiikóriyi na, yi lè tiipiriyi taana, ní dǎndama-tɔ́nɔyi ǹjoyo ni.

³ Mii sìnbirigi nyanbelege, mii i mɔ kɔ́lɔ yáriri, ní mɔ lɔ́ri tɛɛkɔnyɔ myɛ kaangi a be i fuguri ni lée n fàra mɔ sáriga-wòlo-tɛ́ɛyi na, mɔ kapeeli kéele na mɔ kpéʔele mɔ tásaligi myɛ na lè.

⁴ Mɔ tiimaw a kɔlɔ̀ láʔa mɔ kɔ́rigi na, gee mii da kaan mɔ ma lè. Mii a mɔ yaʔa mɔ í pye mɔ nigoobèle púlo, táraa ni, dee di lè mɔ ga di cán í. Níì cán yele n mii fundanʔari náa le, ki si a kòro bàā có làla o làla.»

Tɛɛlàra-váanagi, ní tɛɛlàradelegi

⁵ Yawe wi syɛ́ɛnri naa joo níì jo: «Wee wi wiyɛɛ daʔa syɔɔn na lè, n céri pye wi tɛɛ̀sigile, níì wi sɔ̀ngumi láʔa Yawe na, syɔ́ɔnw bee n dánga.

⁶ Wi i nyɛ àmɛɛ wúuro tiipiige nyɛ lè tɛɛfiigi na, wi o katàanna panna nyaagi í. Fìími tára tɛɛ̀sorigoyo ni wi kòró, solomɔ tára dii, dee di nyɛ lè syɛ̀ɛnnɛ fun.

⁷ Syɔ́ɔnwee wi wiyɛɛ daʔa Yawe na lè, n Yawe kpéʔele wi sɔ̀ngumi tɛɛtaʔaga, wee bee i nyɛ dùba pyà!

⁸ Wi i nyɛ àmɛɛ tiige nyɛ, gee be cɔ́rɔ lɔ̀ʔɔ nyɔ́ɔ na lè, á gi nǐnri kári n sáà nan lǒgi tɛɛ̀foozɔ̀lɔgɔ na. Káfugi gi maa lè, ki o gi nyaagi í, á gi wári kòro wobirire ní. Wáami yɛ́ɛlɛ na, ki fúngi o curugu í, ki i sangi sìnyére ni.»

⁹ Syɔɔn fúngi n kolo n sɔ̀lɔ yáriri myɛ na, sámagajànma o gi na í, wìí wi a gbǎn gi cán?

¹⁰ «Mii Yawe, mii i kasɔ̀ngugèle ní fúngi kèlē sɛʔɛ ni cángi, jàngó bàā syɛ́ɛnbèle myɛ nibin nibin sàrá da yɛlɛgi ní be kóloyi ní, bàā yɛlɛgi ní be kapyegèle yasanra ní.»

¹¹ Syɔ́ɔnwee wi lɔ́ri taagi lè sìnzinmɛ na, wi i nyɛ móō sìndyoò wii, wee wi kùru lè cɛ̀nɛ na, gele ge lè woro ban wi ge cáan í. Wi a fɔ̀n di ni wi cányi nínge ni, wi kwɔ́ɔmi na, wi a pye nilabalaga.

Yawe nibin wi nyɛ sìíw púloweele

¹² Nìjanra fàngolo i yaà, lee li tɔnɔ n yìri lè ǹjogi ni nlaa sélimi na, koro gi nyɛ wolo tɛɛcǎngi.

¹³ Yawe, mɔ wi nyɛ Isirayɛli sɔ̀ngumi tɛɛtaʔaga! Bele myɛ pe mɔ yaʔa lè fɛ̀ɛrɛ a ba be taa, bele be láʔa mii na lè, pe mɛ́ɛyi a ba sɛ́bɛ támiigi ni, níì cán pe n be sìíw púloweele cée, li lè Yawe.

Zyeremii nyɛ́ɛrigi

¹⁴ Yawe, mii pɔʔɔ, mii a pɔʔɔ, mii syɔɔ, mii a syɔɔ. Níì cán mɔ wi nyɛ mii sòololi!

¹⁵ Wéle, pe i gi nyuu mii ma níì jo: «Sán Yawe syɛ́ɛnri nyɛ? Ki n yɛlɛ di foro kɛ̀ɛ!»

¹⁶ Mii si na, bi pye bànaʔaɔ, mii ga gee bee cée mɔ ma í. Mii da ni wɔʔɔgi naa canʔa caa í, mɔ n koro cán. Gee gi yirigi mii nyɔ́ɔgi ni lè, ki i nyɛ mɔ yɛ́ʔɛ ma.

¹⁷ Mɔ a kɔ́ pye cɛ̀lɛlɛ sábabu mii ma í, mɔ wi lè mii tɛɛlàragi wɔʔɔgi canʔa na!

¹⁸ Ki n yɛlɛ fɛ̀ɛrɛ í mii wɔʔɔfɔbèle taa, fɛ̀ɛrɛ si a kɔ́ mii taa í. Ki n yɛlɛ paa cɛ̀lɛ́, mii si a kɔ́ ra cɛ̀lɛ́ í! Ki n yɛlɛ mi wɔʔɔli canʔa yaʔa gi nan be na, pe kálagi gi tɛɛyɛ siin!

Cândɛnɛgi kɔ̀rɔsiile kayele

¹⁹ A Yawe syɛ́ɛnri naa joo mii ma níì jo: «Da syée mi sa yére syɛɛnfelegi pìibēle kpaanweele na, lee ni Zyuda fànʔafɔbèle jǐn ní i yirigi lè, ní Zyerusalɛmi kpàánweegèle myɛ na.

²⁰ Mɔ a be pye: ‹Ye Yawe syɛ́ɛnri lóʔo, yele Zyuda fànʔafɔbèle, ní Zyuda ye myɛw, ní yele Zyerusalɛmi ye myɛw ye jǐn kpàánweegèle naa ni lè!

²¹ Yawe wi syɛ́ɛnri naa joo níì jo: Ki n yɛlɛ yaa yeyɛɛ kɔ̀rɔsíi, yele a kɔ́ tugoro tugo cândɛnɛgi canʔa ni í. Yele a kɔ́ sɔ̀lɔ Zyerusalɛmi kpàánweegèle ni bi jée ní di ní í.

²² Yele a kɔ́ tugoro yirige yele kpáayi ni cândɛnɛgi canʔa ni í, yele a wɔ́ɔ kɔ́ fali faala kpéʔele í. Kàjáa ki n yɛlɛ ye cândɛnɛgi sámaga ye yaʔa yacanga àmɛɛ mii gi joo n gbàn yele tóolɛɛbèle ma lè.

²³ Kàjáa pe ga lóʔo í, pe ga líiyi cáan í, fwɔɔ a pe be nyùngbaabèle kpee, jàngó poro a kɔ́ lóʔo si fɔ̀lɔ tamani na í.

²⁴ Yawe n jo: Yele ga ni lúro mii ma kányɛʔɛ na, yele ga pye yele o jǐn ní tugoro ní kěgi naa kpàánweegéle ni cândɛnɛgi canʔa ni í, yele ga cândɛnɛgi sámaga n yaʔa yacanga, yele ga fɔ̀lɔ ni fali faala kpéʔele cángi bee ni í,

²⁵ lǎli bee ni fànʔafɔbèle, ní fànʔafɔbiigèle a ra lúru wòtorobéle, ní syɔɔnyɔ na baa jǐn kěgi naa kpàánweegéle ni, poro bele be tɛ́ɛn Davidi fàngoli na lè, poro ní be fànʔafɔbiigèle, ní Zyuda nǎnbèle, ní Zyerusalɛmi ye. Syɛ̀ɛnnɛ a pye kěgi naa ni làla o làla.

²⁶ Pe a ra yìrigí Zyuda kěyi ma, ní kěyi ma yi Zyerusalɛmi màʔa lè, ní Bɛnzyamɛ tári ma, ní nyanbeleyi tìgimɛ tára, ní nyanbeleyi kúlo, ní wòrogulo ma bàā maa ní sáriga-sórigow, ní sárigaw féleye, ní yakaanyi, ní nùndaanni yáriga, ní kínidɛnɛgi sáriga ní bi ba ra wóo Yawe kpáagi ni.

²⁷ Kàjáa yele ga pye yele o lúro mii ma níì cândɛnɛgi canʔa sámaga n yaʔa yacanga í, níì túgori tugolo yaʔa gi ni í, ní i jǐn Zyerusalɛmi kpàánweegèle ni ní di ní cândɛnɛgi canʔa ni, lǎli bee ni mii a naà le kěgi kɔ̀riyɔ na, ki a Zyerusalɛmi kpaakpoloyi sórigo, ki si a ní fígi í.› »