Zyeremii 16 - Cebaara Bible 2010

Zyeremii í kòro wi nibin

¹ Yawe syɛ́ɛnri n nan mii na kánmi naa na, wi n jo:

² «Mɔ a kɔ́ cɔlɔɔ láa í, nànbile wàlá calipile a kɔ́ pye mɔ ma tɛ́ɛgi naa ni í.»

³ Níì cán syɛ́ɛnri naa Yawe joo calipiigèle ní nànbiigèle kéele na ke a see tɛ́ɛgi naa ni lè, ní ge nɔ́ɔbèle kéele na, bele pe a ge see lè, ní ge tóobèle kéele na, bele pe a ge see tári naa ni lè:

⁴ «Yaama a be kpóo. Pe kùúyi a le í, pe a nyanya taa í. Pe a pye kariga tári na. Ŋɔséew, ní kateekpɔɔgi a be kwɔ́ɔ. Pe kúceri a pye kaara nyɛ̀ʔɛni féjɛɛnrɛ ní tári yaweere ma.»

⁵ Yawe n syɛ́ɛnri naa joo níì jo: «Mɔ a kɔ́ jée kpaagaa ni, beè be nyaan kpóō na lè í, mɔ a kɔ́ kári kùugo tɛ́ʔɛ ma í, mɔ a kɔ́ ra be kéeli yáa í. Níì cán mii n mii yɛɛ̀nyingi láʔa syɛ́ɛnbèle naa na, n fàra mii funjǎngi, ní mii nyínimi na,» Yawe wi jo nya.

⁶ «Wogbolobèle, ní woyilibèle a kùu tári naa ni. Pe a nyanya túgu be ma í, pe a be kùúyi kpéʔele í. Syɔɔn a wiyɛɛ gɔnɔgi be kéeli na í, syɔɔn a wi nyúngi kùnu be kéeli na í.

⁷ Pe a búru kabagi bi kaan wee má wi nyɛ lè kùu káyaʔa na í, bi wi kpɛʔɛlɛ kpóō kéele na í. Pe a kpɛʔɛlɛlɛ yagbaʔa kaan be kéeli na í, tofɔlɔ kéele na wàlá nafɔlɔ kéele na í.

⁸ Mɔ a wɔ́ɔ kɔ́ jée lìigbɔɔlɔ kpaʔa ni sa pínɛ tɛ́ɛn ní be ní bàā líi sáā gbo í.

⁹ Níì cán Nyɛ̀ʔɛni Sùlasiibéle Kafɔlɔ Yawe wi lè Isirayɛli Kolocɔlɔw, woro wi syɛ́ɛnri naa joo níì jo: ‹Wéle! Mii a mugurumi ŋúnuyo, ní fundaanri ŋúnuyo, ní cefɔnw fɔ́lɔ, ní cefɔnw ŋúnuyo ceri tɛ́ɛgi naa ni, yele nyɛ́nɛ na ní yele lǎli ni.›

¹⁰ Lǎli ni mɔ ga syɛ́ɛnri naa myɛ joo n kwɔ́ɔ lè syɛ́ɛnbèle naa ma, á be mɔ pye: ‹Nyàʔá na Yawe wɔʔɔgboloyi naa myɛ kéele nyuu ni taari wolo na? Kolomìí félege wolo kpéʔele? Kapeelìí félege wolo kpéʔele Yawe wolo Kolocɔlɔw na?›

¹¹ Lǎli bee ni mɔ a be yari: ‹Gee bee n taa ncan yele tóolɛɛbèle n mii yaʔa níì taʔa kolocɔlɔbèle pèle nikwɔɔlɔ na, pe n kpɔ̀ʔɔrɔli kpéʔele be ma, pe n tìgi n too be yɛʔɛ̀ ma. Kàjáa mii na, pe n mii yaʔa, pe ga mii làlwaw cò í,› Yawe wi jo nya.

¹² ‹Yele si na, yele n ní baa kapeʔe pye n sɔ̀lɔ yele tóolɛɛbèle na. Wéle, yele myɛ nibin nibin n yeyɛɛ daʔa yele péemi zɔ̀ngbaɔn na, yele ga lóʔo mii ma í.

¹³ Mii a yele yirige tári naa ni bi wáa táraa ni, dee di lè yele ga di cán í, yele yoo, yele tóolɛɛbèle yoo. Bi yele yaʔa yaà beè, yele a ra kolocɔlɔbèle pèle nikwɔɔlɔ kpɔ̀ʔɔrɔ́ canʔa ní yébilige, níì cán mii a tée nyinimɛ taa yele na í.› »

Lúrubangbɔɔli

¹⁴ Yawe n jo: «Koro na, wéle, canyaa i maa, yee ni lè pe a ní gi joo í si jo: ‹Yawe woweew mɛ́ʔɛ na, woro wee wi Isirayɛli ye yirige Ezyipiti tári ni lè.›

¹⁵ Kàjáa pe a ra gi nyuu si jo: ‹Yawe woweew mɛ́ʔɛ na, woro wee wi Isirayɛli ye yirige yaà solomɔkulo kàbangi tára ni lè, ní tátɛɛyi myɛ ni, yee má wi da be nɛnɛ n tórigo lè.› Níì cán mii a be lúrugo be pan be tári ma, dee mii da kaan be toolɛɛbèle ma lè.

Kolomi fɔ̀ɔlɔ myɛ a cò

¹⁶ «Wéle! Mii a cɔ̀ɔwáa-nɛʔɛbéle tórigo,» Yawe wi jo nya, «poro a sa be cò, koro kàdoʔo ma, mii si ní tòzonɛʔɛbéle tórigo, poro í sa be caa nyanbeleyi myɛ na, ní dǎndamayi myɛ na, ní fálayi myɛ lariya ni.

¹⁷ Níì cán mii nyɛ́nɛ i nyɛ be kóloyi myɛ na, yi ga làra mii na í, pe kolomi o làrá mii na í.

¹⁸ Mii a sàra tɛ́ɛyɛ siin kaan be ma gbɛnʔɛnɛ, pe kolomi, ní be kapeeli kéele na, níì cán pe n mii tári nɔ́nʔɔ ní be yasunguuyi ní, pe n mii kɔ́rigi nyìn ní be yanɔnʔɔyi ní.»

Pe myɛ a Kolocɔlɔw wodeleo cán

¹⁹ «Yawe, mɔ wi nyɛ mii fǎngi, ní mii Kènirigi, ní mii tɛɛlàragi wɔʔɔgi canʔa na, syɛɛnfeleyi a ra yìrigí yaà tári láʔagéle ma bàā maa mɔ ma, yi a ba ra gi nyuu si jo: ‹Kɔrigɔ ga pye wolo tóolɛɛbèle ma námaraw kàdoʔo na í, gbanzan yáriyi yi lè yi a gbǎn yafyɛn nyɔɔ í.›

²⁰ A syɔɔn a gbǎn kolocɔlɔbèlē sámaga lé wiyɛɛ ma bi gi taa pe o nyɛ kolocɔlɔbèlē í?»

²¹ «Gee bee na mii a gi yaʔa pe gee naa cán kátali naa na, mii a mii kɔ́gi ní mii séew tɛ̀ɛn be na. Pe a gi cán bi cán mii mɛ́ɛgi gi nyɛ Yawe.