Zyeremii 15 - Cebaara Bible 2010

¹ Yawe n mii pye: «Alí Mowizi, ní Samyɛli ga baa yére mii yɛ́ʔɛ ma, mii fúngi a tée pye ní syɛ́ɛnbèle naa ní í. Pe nɛnɛ mi núngo mii yɛ́ʔɛ ma, mi tórigo léelige, ki n yɛlɛ paa syée!

² Lǎli bee ni pe ga mɔ pye: ‹Sán wolo a kári?› Mɔ a be yari: ‹Yawe wi syɛ́ɛnri naa joo níì jo: Wee wi nyɛ lè káfalagi yáama wóo, káfalagi yáama i syée ní woro ní! Wee wi nyɛ lè ŋɔséew wóo, ŋɔséew i syée ní woro ní! Wee wi nyɛ lè kateekpɔɔgi wóo, kateekpɔɔgi i syée ní woro ní. Wee wi nyɛ lè púlori wóo, púlori i syée ní woro ní!›

³ Mii a wɔʔɔveleye sicɛrɛ taʔa be na, Yawe wi jo nya, ŋɔséew a pye bàā be kúu, pɔ́nbèle a pye bàā be kíle da sulugu, nyɛ̀ʔɛni féjɛɛnrɛ, ní tári yaweere a pye bàā be káa, sáā gàlagí kpéʔele.

⁴ Mii a be pye fyáakpɔɔrɔ yáriga tári fànya myɛ ma, Manase kéeli na, wi lè Ezekyasi jáaw, Ezekyasi wi pye lè Zyuda fànʔafɔw, gee myɛ kéele na wi kpéʔele lè Zyerusalɛmi ni.

Yawe n kɔ́ɔ̀ fɔ̀rɔ nya gi na

⁵ «Koro na wìí wi a nyinimɛ taa mɔ na, Zyerusalɛmi? Wìí wi a mɔ kéeli yáa? Wìí wi a yére si mɔ yíbe si jo mɛ̀ɛ́ mɔ nyɛ?

⁶ Mɔ n mii yaʔa, Yawe wi jo nya, mɔ n lúru kàdoʔo ma, kàjáa mii n mii kɔ́gi sánʔa n taʔa mɔ na bi mɔ kálagi, mii n kɔ́ɔ̀ fɔ̀rɔ nya ní mɔ ní.

⁷ Mii a be fɛɛ ní ségbanna ní tári kèye kpàánweegéle na. Mii a be bɔ̀nɔ pìibēle ni, mii a mii syɛ́ɛnbèle kálagi, pe lè pe ga láʔa be kóloyi na í.

⁸ Mii a gi yaʔa pe lɔgucebèle í nɛʔɛ bi sɔ̀lɔ sólomi lɔ̀ʔɔ táminyɔɔ na. Mii a pan ní kálagifɔw ní cânvulɛɛlɛ na bi ba cáan nìgɔcaribèle nɔ̀ɔnɔ na. Mii a nyáʔamina ní fyáakpɔɔrɔ pàla bi cáan be na.

⁹ Céwee wi da nànbiigéle kɔrɔsiin see lè, wi bárigaw n kwɔ́ɔ, wi i nyɛ kúkoliw na. Wi cángi n too n cángi yaʔa sìngwɔɔ ni. Fɛ̀ɛrɛ n wi tɔ́n, faʔara n too wi na. Bele be kòro lè mii a be le ŋɔséew kɔ́yɔ ni pe nigoobèle yɛ́ʔɛ ma,» Yawe wi jo nya.

Zyeremii i wiyɛɛ fɔ̀rɔgi kéele fúlo Kolocɔlɔɔ n wi tundunri kéele fílige wi ma

¹⁰ Wɔʔɔlɔ i mii na, mii nɔ́ɔ, níì cán mɔ n mii see nànwaa, wee wi nyɛ lè kàkabaga fɔ́lɔ, ní kàsiikuuɔn tári myɛ ma! Mii o fwɔɔlɔ kúunri wàlá ni fwɔɔlɔ nii í bi gi taa pe myɛ i mii dángi.

¹¹ Yawe n jo: «Mɔ nyɔɔmɔ kéele na ban mii da mɔ syɔɔ ì? Ba mii da nigoow kpúmɔn n kaan mɔ ma wɔʔɔgi làla, ní kálagili làla ni ì?

¹² A túnmɔri a gbǎn jaa lé, ti lè solomɔkulo túnmɔri, ní kanyɛɛnri?

¹³ Mii a mɔ lɔ́ri, ní mɔ lɔ́ri tɛɛkɔnyɔ kaan kawaʔa na pe fuguri bi láa mɔ kapeegèle myɛ kéele na, gele ge kpéʔele mɔ tásaligi myɛ na lè.

¹⁴ Mii a mɔ kɔ́ri mɔ í sɔ̀lɔ bi kári ní mɔ nigoobèle ní, táraa ma, dee di lè mɔ ga di cán í, níì cán mii fundanʔari náa n le, ki i có yele kánmi na.»

¹⁵ Ee Yawe, mɔ n ki myɛ cán, sɔ̀ngi mi taa mii na, pan mi ba mii dɛ̀ɛmɛ, gɔ̀lɔ́w wòlo mii wɔʔɔfɔbèle na! Mɔ a kɔ́ mii kíle kári í, mɔ wee fúngo gi lè ki o taanri kelekele í! Ki n yɛlɛ mi gi cán mii i faʔari kpàracó mɔ kéeli na.

¹⁶ Lǎli ni mɔ syɛ́ɛnri da ni nangi mii na lè, a mii i di líi. Mɔ syɛ́ɛnri n pye mii yanidaanmaga ní mii fúngi fundaanra yáriga. Níì cán mɔ mɛ́ɛgi gi yiri mii na, Yawe, Kolocɔlɔɔ wi lè Nyɛ̀ʔɛni Sùlasiibéle Kafɔlɔ!

¹⁷ Mii ga téè tɛ́ɛn kataandɛʔɛbèle syɛɛnkpoʔolomɔ nínge ni jàngó bàā bàrí yaà í. Kàjáa mɔ kɔ́gi láara ni mii tɛ́ɛn n kòro mii nibin, níì cán mɔ maa mii nyìn fundanʔagbɔɔri na.

¹⁸ Nyàʔá na mii wɔʔɔgi kòro ni syée nya? Nyàʔá na mii námigi para n kòro nya, ki o caa bi pɔʔɔ í? A mɔ a pye lé mii ma kányɛʔɛ na àmɛɛ púloweele nyɛ, lee li syɔɔn jànváa lè, àmɛɛ lɔ̀ʔɔ nyɛ, gee gi lè syɔɔn ga tága gi na í?

¹⁹ Gee bee na Yawe syɛ́ɛnri naa joo níì jo: «Mɔ ga lúru n pan mii ma, mii a ní mɔ lúrugo mɔ í ba ra mii fáliw kpéʔele. Mɔ ga ni yacangi wɛ̀ɛ́ ni láari gbanzan yárigi na, mɔ a pye àmɛɛ mii nyɔ́ɔgi nyɛ lè. Poro má gi nyɛ pe lúru pan mɔ ma, mɔ má ban gi nyɛ mɔ í lúru pan be ma í.

²⁰ Mii a mɔ kpéʔele kanyɛɛnrɛ kàkɔlɔgɔ syɛ́ɛnbèle naa ma, gee gi nìri lè. Pe a ra kapɛɛnni kpúmɔn ní mɔ ní, kàjáa pe a fànʔa taa mɔ na í. Níì cán mii i nyɛ ní mɔ ní bàā mɔ syoo, bàā mɔ yirigi be kɔ́yi ni,» Yawe wi jo nya.

²¹ «Mii a mɔ yirige syɛɛnpeebèle kɔ́yɔ ni, mii a mɔ syɔɔ syɛɛntanʔabèle ma.»