Zyeremii 14 - Cebaara Bible 2010

Wáami kéele

¹ Yawe syɛ́ɛnri di nan Zyeremii na lè wáami kéele na.

² «Zyuda i nyɛ kùu káyaʔa na, wi kěyi i káagi, yi i nyɛ yébilimɛ níì tìgi n too tári na, á Zyerusalɛmi yákpoli si i lúru ǹjogi ni.

³ Séew fɔ̀ɔlɔ i wobiigèle tórogi pe sa lɔ̀ʔɔ caa, a bele bee i syée lǒgi wéeye ma, pe si o lɔ̀ʔɔ taagi í, a pe i lúrugu ni maa ní be kasǎngèle ní wowaagéle ní. Amɛɛ be curugo lè ní i nyɛ fɛ̀ɛrɛ wòolo ní, a pe i be nyúnyi tɔ́ngi.

⁴ Tári n laragi laragi, níì cán zàʔá ga níì too tári ni í, lǎli bee ni a fɛ̀ɛrɛ tèfalabèle taa, a pe i be nyúnyi tɔ́ngi.

⁵ Alí sɔ̀ɔ́w wi nyɛ lè sìnbirigi ni, wi i pìíw sii bi cáan si wi yaʔa si kári, níì cán nyàápungi n fɔ̀n.

⁶ Seʔe jofanibèle i lúru ni yèré dǎndama-wɔlɔgɔyi na, ní i káfalagi fàrá àmɛɛ gbàáyi nyɛ lè. Pe nyapiigèle i wéle ni fɔ̀rɔgí, níì cán nyàā ní o yaà í.»

⁷ Alí wolo kolomi kèlē ga ni wolo kologi, ee Yawe, ki kpéʔele mɔ mɛ́ɛgi kéele na! Níì cán wolo céemi kapyere n nɛʔɛ, wolo n kapeele pye mɔ na.

⁸ Mɔ wi lè Isirayɛli sɔ̀ngumi tɛɛtaʔaga, ní wi Syɔɔfɔw kálagili làla ni, nyàʔá na mɔ yɛlɛ bi pye móō nibɔɔn wii tári naa ni, móō kùsɛɛɔ wi tìrige bi yébilige nibin syɔ́ɔn?

⁹ Nyàʔá na mɔ yɛlɛ bi pye, móō syɔɔnwaa wii, wee fúngo gi wɔ́ɔ lè, móō kapɛɛnkpumɔn-nànnirio wii, wee wi lè wi a gbǎn wàa syɔɔ í? Bi gi taa mɔ i nyɛ wolo níngi ni, ee Yawe, mɔ mɛ́ɛgi si i yiri wolo na, mɔ a kɔ́ wolo yaʔa í!

¹⁰ Yawe n syɛ́ɛnri naa joo syɛ́ɛnbèle naa kéele na, wi n jo: «Ki n tɔ̀nɔ n be dɛ́nɛ bàā nyaari da máari sìnyére ni. Koro na Yawe ga fɔ̀lɔ be na í, wi i sɔ̀ngi ni taagi tɔ́ɔliw ni pe kakoloyi na, ní i be kpúmɔn be kapeegèle kéele na.»

¹¹ A Yawe mii pye: «Mɔ a kɔ́ ra nyɛ́ɛri bàā kaangi syɛ́ɛnbèle naa ma pe kacànna kéele na í.

¹² Alí pe ga ni súnw nii, mii a be supiiwáari lóʔo í. Pe ga sáriga-sórigoo, ní míimɛ sáriga wòlo, mii a fɔ̀lɔ be na í. Níì cán mii i caa bi be kwɔ́ɔ ní ŋɔséew, ní kateekpɔɔgi, ní káfalagi yáama ní.»

¹³ A mii wi yari: «Ee! Kàfɔw Yawe! Wéle, kanyaajoobèle i gi nyuu be ma níì jo: ‹Yele a tée ŋɔsée nyaa í, kateʔe a tée too yele na í, kàjáa yɛɛ̀nyindelege mii a kaan yele ma tɛ́ɛgi naa tiimaa ni.› »

¹⁴ A Yawe mii pye: «Jànvaaw kanyaajoobèle nyaagi ni nyuu mii mɛ́ɛgi na. Mii ga be tun í, mii ga syɛ́ɛnrɛ joo n gbàn be ma í, mii ga téè joo be ma í. Jànvaaw yanyaaya, ní jànvaaw kanyaajooro, ní yasunzunri, ní be funzɔnguri di syɔɔn fáana ni pùuní lè, toro be nyuu yele ma.

¹⁵ Koro na Yawe syɛ́ɛnri naa joo kanyaajoobèle kéele na, poro bele be kérigèle nyaagi ni nyuu mii mɛ́ɛgi na lè, bi gi taa mii ga be tun í, pe i gi nyuu níì jo: Ŋɔsée, wàlá kateʔe a too tári naa na í, ŋɔséew, ní kateekpɔɔgi a kanyaajoobèle bee kpóo.

¹⁶ Syɛ́ɛnbèle bele má si be kérigèle nyaagi ni nyuu lè, bele bee a cáan cáan bi màʔa Zyerusalɛmi kàlari-kóloyi ni, kateekpɔɔgi ní ŋɔséew báriga ni. Syɔɔn faala a taa bi nyanya kaan be ma í, poro ma yoo, pe cébèle ma yoo, pe nànbiigèle ní be calipiigèle ma yoo. Mii a be péemi yaʔa pi lúru too be na.

¹⁷ Mɔ a syɛ́ɛnri naa joo be ma si jo: ‹Mii nyapiigèle i nyatinmi ŋuu, n yébiligi pínɛ cángi ni sìnyére ni. Níì cán gàlagikpɔɔɔ n too mii syɛ́ɛnbèle nàngeele sìnján calipile na, namiga, gee gi pee lè gbanʔama.

¹⁸ Mii ga ni syée sìnbirigi ni, mii n nànbēle nyaa, bele ŋɔséew fúrugu n cáan lè. Mii ga jée kěgi ni, mii n syɛ̀ɛnnɛ nyaa, bele kateegi kàriga lè yaabèlē, àlí kanyaajoobèle, ní sáriga-wòlobèle i tári fé ni máari pe o yafyɛn cángi í.› »

¹⁹ A mɔ zǐn Zyuda wáa lé wi péw, wàlá a Siyɔn pye mɔ fúngi yanibɛɛnmɛgɛ? Nyàʔá na mɔ wolo kpúmɔn pɔʔɔlɔ si a ní taa wolo ma í? Wolo maa wolo sɔ̀ngumi taʔa yɛɛ̀nyingi taala na, kàjáa yacanga faala o yaà í, pɔʔɔlɔ lala na, kàjáa wéle, fyáakpɔɔrɔ dii!

²⁰ Yawe, wolo n wolo péemi kéele cán, ní wolo tóolɛɛbèle kolomɔ kéele. Níì cán wolo n kapeele pye mɔ na.

²¹ Mɔ mɛ́ɛgi kéele na, mɔ a kɔ́ faʔara wáa wolo na í, mɔ a kɔ́ mɔ nìjangbɔɔri fàngolo faʔa í! Sɔ̀ngi mi taa! Mɔ a kɔ́ mɔ joogaanni sàa ní wolo ní í!

²² Syɛɛnfeleyi gbanzan yáriya ni, a gi kàa i yaà lé gee gi zàʔá cáan lè? Nyɛ̀ʔɛni lé li zěpalayi cáan? Mɔ ban ì, Yawe wolo Kolocɔlɔw? Mɔ na wolo wo sɔ̀ngumi taʔa. Níì cán mɔ wi kérigèle bee myɛ kpéʔele.