Zyeremii 13 - Cebaara Bible 2010

Zyeremii ní lɛn sɛntiiriw kéele

¹ A Yawe syɛ́ɛnri naa joo mii ma níì jo: «Da syée, mɔ a sa lɛn sɛntiiri syɔɔ miyɛɛ kéeli na, si wi tɛ́ʔɛ bi miyɛɛ bwɔɔ mɔ sárigèle ni, kàjáa mɔ a kɔ́ wi cáan lɔ̀ʔɔ ni í.»

² A mii sɛntiiriw syɔɔ n yɛlɛ ní Yawe syɛ́ɛnri ní, n wi pwɔɔ mii sárigèle ni.

³ A Yawe syɛ́ɛnri níì nan mii na tɔziin wógi na, ti n jo:

⁴ «Sɛntiiriw láa, wee mɔ syɔɔ lè, wee wi nyɛ mɔ sárigèle ni lè. Yìri maa syée Ufurati ma mi sa wi làriga nɛɛ bee fálaga tɛɛyabiga ni.»

⁵ Koro na mii wɔ́ɔ̀ kári n sáà wi làriga Ufurati nyɔ́ɔgi na n yɛlɛ ní gi ní àmɛɛ Yawe da gi joo n gbàn mii ma lè.

⁶ A canya saʔa ga kwɔ́ɔ, a Yawe mii pye: «Yìri maa syée Ufurati ma, mi sa sɛntiiriw láa yaà, wee kéele mii da joo n gbàn mɔ ma níì jo mɔ í sa wi làriga yaà lè.»

⁷ A mii kári Ufurati ma n sáà sɛntiiriw fuguri n yirige tɛ́ɛgee ni mii da wi làriga lè. Kàjáa wéle, sɛntiiriw maa kálagi, wi da níì pye bi gbǎn yafyɛn nyɔɔ í.

⁸ A Yawe syɛ́ɛnri nan mii na, ti n jo:

⁹ «Yawe wi syɛ́ɛnri naa joo níì jo: ‹Kánmi bee wonijanma na mii a Zyuda nɛ̀ɛnyɛnɛgi kálagi, ní Zyerusalɛmi nɛ̀ɛnyɛnɛ-nɛʔɛgi.

¹⁰ Syɛɛnfelegi bee gi pee lè nya, koro gee gi mii syɛ́ɛnri lóʔolo cée lè, gee gi taʔa gi fungbangi kasɔngurɔ na lè, níì kiyɛɛ bwɔɔ kolocɔlɔbèle pèle nikwɔɔlɔ na ni báara be ma, ní i tíri ni tuun be yɛʔɛ̀ ma, ki a pye àmɛɛ sɛntiiriw naa nyɛ lè, wee wi lè wi a ní gbǎn yafyɛn nyɔɔ í.

¹¹ Níì cán àmɛɛ sɛntiiri nyɛ nàɔn sárigéle ni lè, kánmi bee na mii tiimaa da Isirayɛli kpáagi wòolo myɛ ní Zyuda kpáagi wòolo myɛ pwɔɔ niyɛɛ na, Yawe wi jo nya, koro ga pye be pye mii syɛ̀ɛnnɛ, bi pye mii mɛ́ɛgi, ní mii sòololi, ní mii fèreri. Kàjáa pe ga lóʔo í.›

Dùvɛɛnw ní Kolocɔlɔɔ fundanʔari

¹² «Mɔ a syɛ́ɛnri naa joo be ma si be pye: ‹Yawe wi lè Isirayɛli Kolocɔlɔw woro wi syɛ́ɛnri naa joo níì jo: Kpàbibèle myɛ n yɛlɛ bi nyìn dùvɛɛnw na.› Pe si a mɔ pye: ‹A wolo i nyɛ lé wolo ga gi cán kpàbibèle myɛ n yɛlɛ bi nyìn dùvɛɛnw na í?›

¹³ Lǎli bee ni mɔ a be pye: ‹Yawe wi syɛ́ɛnri naa joo níì jo: Wéle, mii a tári naa syɛ̀ɛnnɛ myɛ kaan pe gbaa tín, àlí fànʔafɔbèle be tɛ́ɛn Davidi fàngoli na lè, ní sáriga-wòlobèle, ní kanyaajoobèle, ní Zyerusalɛmi ye myɛw, mii a be tín sínmi na.

¹⁴ Mii a be kpúmɔn tɔ́nʔɔnɔ peyɛɛ na, tofɔbèle, ní pìíbèle, pínɛmɛ, Yawe wi jo nya. Mii a tée wàa yaʔa í, mii a pye nyinimɛ fun, mii a tée nyinimɛ taa be na í. Yafyɛn a mii yérige be kálagili na í.› »

Lóʔoli kéele sáni lǎli í kɔ́ sɔ̀lɔ lè

¹⁵ Ye lóʔo, ye líiyi sámaga ye cáan! Ye a ní kɔ́ pye nɛ̀ɛgbɔʔɔgɔ fɔɔlɔ í! Níì cán Yawe i nyuu.

¹⁶ Yaa nìjangbɔɔrɔ taari Yawe na wi lè yele Kolocɔlɔw, sáni wi kɔ yébilimi yaʔa bi pan lè, sáni yele tɔ́lɔyi í kɔ́ kpírige lè cângwɔɔ-yébiligi nyanbeleye na. Yele i sɔ̀ngí gbɛ̀ɛnmɛ kéele na, kàjáa wi a bi kàriga kùu yébilimɛ, wi a bi kàriga yébiliwɔɔlɔ.

¹⁷ Yele ga pye ye ga lóʔo í, mii a ra nyaan yele nɛ̀ɛnyɛnɛgi kéele na làrama ni. Mii a ra nyatinmɛ ŋuu, mii nyapiigèle a ra nyatinmɛ ŋuu, níì cán Yawe yaweeri gboolo a cò bi kári.

Kolocɔlɔɔ tundunri fànʔafɔw narigbaʔa woolo kéele na

¹⁸ Ki joo fànʔafɔw ní fànʔafɔjew ma mí be pye: «Ye tɛ́ɛn tári na, níì cán yele kùndigi-tɔ́ngi n too, ki lè yele fèreri fànʔa nyùndɔngɔ.»

¹⁹ Wòrogulo kàbangi kèye n tɔ́n, syɔɔn faala o yaà bi yi múgu í. Zyuda myɛw n cò n kári, wi wobow myɛ n cò n kári.

Pe n Zyerusalɛmi faʔa

²⁰ Nyapiigèle yìrige mi be wéle, bele be yìri solomɔkulo ma ni maa lè, sán yaweeri gboolo nyɛ, lee pe da kàlifáa mɔ ma lè, yaweeyiligèle ke da pye lè mɔ fereri?

²¹ Nyàʔá mɔ a joo, lǎli ni pe ga pan ba keele tɛ́ʔɛ mɔ na lè, bele mɔ tiimaa da tama lè? A káagali a kòro lé li a too mɔ na í àmɛɛ cɔlɔɔ nyɛ wee wi nyɛ seeli na lè?

²² Mɔ ga ni gi nyuu mɔ fúngi ni níì jo: «Nyàʔá na gee naa nan mii na?» Koro n taa mɔ kakolo-nɛʔɛyi kéele na pe mɔ buronyɔɔw kùru n lúrugo níì mɔ ŋàʔana fànʔa na.

²³ A Etyopii ye wóo a gbǎn wi césaligi kàriga lé, wàlá sèjɔɔn í wi tɛɛ̀nyɔngɔ-nyɔngɔyi kàriga? Koro na yele bele ye tàli kapeeyi pyele na lè, yele a gbǎn kacànna kpéʔele í.

²⁴ «Mii a be cariga àmɛɛ fìími tára káfalaga nyàásige caragi lè.

²⁵ Wéle, gee bee ki a ba pye mɔ na, lɛɛli mii tímana bi ba kaan mɔ ma lè, loro lii,» Yawe wi jo nya, «níì cán mɔ n fɛ̀ʔɛ mii na, níì mɔ sɔngumi taʔa jànvaa yáriga na.

²⁶ Mii a mɔ buronyɔɔw kùru bi taʔa mɔ yɛ́ɛcɔɔli na, jàngó pe mɔ fɛɛri tɛ́ʔɛ nyaa.

²⁷ Mii n mɔ kanɔnʔɔbyeri, ní mɔ fúlomi, ní mɔ nanjaari nyaa dǎndamayi ní sìnbirigi ni. Mii n mɔ yanɔnʔɔyi nyaa. Wɔʔɔli a pye mɔ na Zyerusalɛmi, mɔ wee wi lè wi o wi jéemununi fáli kpéʔele í! Làla jòorí mɔ a kwɔ́ɔ gee bee ni?»