Zyeremii 12 - Cebaara Bible 2010

¹ Mɔ n sín n caanri, Yawe, mii í kɔ́ pye kàkabaga na ní mɔ ní. Koro ní ki myɛ ní mii i caa bi joo ní mɔ ní mɔ kútiiw kèlē cɔɔnriganma na: Nyàʔá na syɛɛnpeebèle kèlē nyɔɔgi? Nyàʔá na námarafɔbèle myɛ nyɛ yɛɛ̀nyinge na sági, poro bele be syɔɔn jànváa lè?

² Mɔ n be cɔ́rɔ, a be caà nìnre wáa, kàa i taari be na, pe i sangi. Mɔ kéeli i nyɛ be nyɔ́ɔyi na, á be fúnyi si léeli mɔ na.

³ Mɔ si na, Yawe, mɔ n mii cán, mɔ i mii nyaagi, mɔ i mii fúngi sɛʔɛ, ki i mɔ taana. Pe cò àmɛɛ pe gáà bàala cò n yaʔa lè kaàkpoo-tɛ́ɛgi kéele na, pe yaʔa kɔlɔ̀ na kpóoli canʔa yɛ́ʔɛ na.

⁴ Làla jòorí tári a kwɔ́ɔ kùu káyaagi na, sìnbirigi myɛ nyàā si wɔ́ɔ waʔa bi kòro nya bi làla jòorí kwɔ́ɔ? Di syɛ́ɛnbèle péemɛ kéele na yaweeri, ní féjɛɛnri i kálagi ni syée. Níì cán pe n jo: «Wi o wolo nyɛ̀ʔɛnaw nyaagi í.»

⁵ Mɔ ga ni fé ní tɔlɔyɔfɔɔlɔ ní, á pe si i mɔ fɔ̀rɔgí, mɛ̀ɛ́ mɔ a kɔ́ gbǎn ra kàbá bi sɛ́ɛ ní syɔɔnyɔ ní? Tári di nyɛ yɛɛ̀nyinge na lè sági, mɔ ga pye mɔ ga fûnnyinge taa di ni í, mɔ ga baa pye Zyuridɛnw cábifóʔo ni, mɛ̀ɛ́ mɔ a gi pye?

⁶ Níì cán àlí mɔ senyɛnbèle tiimaa, ní mɔ tóow kpaʔa wòolo wɔ́ɔgēle, pe i mɔ jànváa, pe tiimaw wɔ́ɔ i yákpogèle wáa gbanʔama ni syée mɔ kurugo. Lǎli ni pe ga ni syɛɛntaanra nyuu mɔ ma lè, mɔ a kɔ́ tága be na í.

Kolocɔlɔɔ n wi kpɔ̀ʔɔrɔli kpaʔa ní wi syɛ́ɛnbèle cée

⁷ «Mii n mii kpáagi yaʔa, mii n mii kɔ́rigi cée n yaʔa, wee kéele li da mii dɛ́nɛ mii fúngi ni lè, mii n wi le wi nigoobèle kɔ́yɔ ni.

⁸ Mii kɔ́rigi n kiyɛɛ bye mii kàbangi na àmɛɛ càaraɔ nyɛ lè kɔligɔ ni, ki n kaana mii na. Koro na gi kéeli mii bɛɛn.

⁹ A mii kɔ́rigi si baa pye lé mii ma àmɛɛ kaàjɔɔ-féjɛnʔɛ nyɛ, gee na tɛɛ̀nyɔngɔ-nyɔngɔyɔ nyɛ lè, á kaàjɔɔ-féjɛɛnraa baa gi màʔa? Yaa syée ye sa sìnbirigi yaweere myɛ kpóʔoro yaa maa ní di ní lìigbɔɔli ma.

¹⁰ Bànaʔa-nɛʔɛbéle n mii ɛrɛzɛn ségi kálagi, pe n mii ségi tánʔana. Pe n mii senidaanmagi kàriga fìimɛ tára tɛɛ̀kalagiga.

¹¹ Pe n gi pye tɛɛ̀kalagiga. Ki i nyɛ kùu káyaʔa na, ki n kálagi mii yɛ́ʔɛ ma. Tári myɛ n kálagi, níì cán wàa faala o gi córo wi fúngi ni í.

¹² Kálagifɔbèle i nangi fìími tára dǎndama-wɔlɔgɔyɔ myɛ na, níì cán Yawe ŋɔséew i tári líi n séli láʔalee na n sáà nan lee na. Syɔɔn faala o nyɛ yɛɛ̀nyinge na í.

¹³ Pe n bilew lùgu, ní baa wúuro yaliilaara kpéʔele, pe n fɔ̀rɔgɔ taʔa peyɛɛ na tɔ̀nɔ fun ni. Ki n yɛlɛ fɛ̀ɛrɛ í yele taa yele yaliilaari kéele na Yawe fundanʔari káfugbanga báriga ni.»

Yawe ní Isirayɛli tɛ́ɛnnyɛnbèle

¹⁴ Yawe wi syɛ́ɛnri naa joo níì jo: «Mii i dee naa nyuu mii tɛ́ɛnnyɛnbeebèle myɛ kánma na, poro bele be tángi kɔ́rigi na, gee mii kaan mii syɛ́ɛnbèle Isirayɛli ye ma lè pe lɛɛlɛ. Wéle, mii a be kɔ́n yirige be tásaligi ni, mii si a Zyuda kpáagi wòolo kíle yirige be níngi ni.

¹⁵ Lǎlee ni si mii ga be kíle n yirige yaà lè, mii a ní nyinimɛ taa be na, si ní be lúrugo be pan pe myɛ nibin nibin be kɔriyɔ ma, pe myɛ nibin nibin be tára ma.

¹⁶ Pe ga baa mii syɛ́ɛnbèle kóloyo tama yákirii na, ní i kɛ̀ɛ́ mii mɛ́ɛgi na níì jo: ‹Yawe woweew mɛ́ʔɛ na!› Amɛɛ pe da mii syɛ́ɛnbèle tama pe i kɛ̀ɛ́ Baali mɛ́ɛgi na lè, lǎli bee ni pe a sámaga tɛ́ɛn mii syɛ́ɛnbèle nínge ni.

¹⁷ Kàjáa kapye pe o yafyɛn lúro í, mii a syɛɛnfelegi bee félege kɔ́n yirige yaà, mii a gi kpóo,» Yawe wi jo nya.