Zyeremii 10 - Cebaara Bible 2010

Kolocɔlɔw wodeleo ní yasunyi kéele

¹ Ye syɛ́ɛnri lóʔo, dee Yawe nyuu yele ma lè, Isirayɛli kpáagi wòolo.

² Yawe wi syɛ́ɛnri naa joo níì jo: «Yele a kɔ́ ra syɛɛnfeleyi tánʔaganma tɛ́ɛlɛ í, yele a kɔ́ nyɛ̀ʔɛni fɛ̀ɛbēle yaʔa be fyáakpɔɔrɔ wáa yele na í, níì cán pe i fyáakpɔɔrɔ wáa syɛɛnfeleyi na.

³ Syɛɛnfeleyi kalɛɛgéle tɔ̀nɔ́ i nyɛ gbanzan. Pe i tíigi kpúmɔn kɔ́ligi ni, fáliw cánvɔlɔ kɔ́lɔ n si baa gi sámaga ní tiicɛnɛ-yárigi ní.

⁴ Pe n si gi fère ní wálifiiw, ní tɛ́ɛw ní, si pɔ́ndiibéle tɛ́ʔɛ bi gi kóri yérige ní màrito ní, jàngó ki a kɔ́ ra cúngu í.

⁵ Kolocɔlɔbèle bee i nyɛ àmɛɛ tiikórigo nyɛ lè, pe o nyuu í, a pe be tugu wii, níì cán pe a gbǎn tánʔa í. Ye a kɔ́ ra fɛ̀ɛgí be na í. Níì cán fànʔa o be ni bi gbǎn kapeʔe kpéʔele í. Anbée gi wɔ́ɔ̄ nyɛ fànʔa o be ni bi gbǎn kacànna kpéʔele í.»

⁶ Wàa o nyɛ mɔ félege í, Yawe! Mɔ n kpɔ́ʔɔ, a mɔ mɛ́ɛgi kpɔ́ʔɔ mɔ séew báriga ni.

⁷ Wìí wi nyɛ wi a fyáa mɔ na í, syɛɛnfeleyi fànʔafɔlɔ? Mɔ na gi yɛlɛ syɔɔn í da fɛ̀ɛgí, níì cán syɛɛnfeleyi kacanbèlē myɛ ni, ní yi fǎnyi myɛ ni, wàa faala o nyɛ mɔ félege í.

⁸ Pe myɛ n pínɛ n pye nidoliyo, ní nilabalaya, gee ki gi tɛ̀ɛn lè pe i nyɛ gbanzan koro gi nyɛ tíigi.

⁹ Wálifiiw be kpúmɔn lè, pe i yìrigí ní wi ní Tarisiisi ma, n wɔ́ɔ ni yìrigí ní tɛ́ɛw ní Ufazi ma, fáliw kacaɔn kapyele lii, tɛɛ̀kpumɔnw kɔ́lɔ fáli wii. Pe i kɔ́luruna cére fàni, ní fàninyɛɛɔn nii be kolocɔlɔbèle na. Pe myɛ i nyɛ kacánmi fáli kpéʔelefɔlɔ kapyele.

¹⁰ Kàjáa Yawe i nyɛ Kolocɔlɔɔ kányɛʔɛ na, woro wi nyɛ Kolocɔlɔɔ woweew, ní bàngwɔɔ fànʔafɔw. Tári i cɛ̀lɛ́ wi fundanʔari yɛ́ʔɛ ma, wi fundanʔagbɔɔri o kúngu syɛɛnfeleyi ni í.

¹¹ «Yele a syɛ́ɛnri naa joo be ma si be pye: ‹Kolocɔlɔbèle be lè pe ga nyɛ̀ʔɛgèle ní tári sámaga í, pe a kwɔ́ɔ yiri tári, ní nyɛ̀ʔɛgèle láara ni.› »

¹² Wi n tári sámaga wi séew báriga ni, wi n dulunyanw kàpɔɔn le wi sícilimi báriga ni, wi n nyɛ̀ʔɛgèle yérige ǹjogi ni wi kacánni báriga ni.

¹³ Lǎli ni wi ga kaana lè, lǒyi n kpóʔoro yiyɛɛ na nyɛ̀ʔɛni ni. Wi i fàfaanyi lúrugu ǹjogi ni nlaa yaà tári láʔala ma, wi i nyɛ̀ʔɛni nyɛ́ʔɛnɛmɛ kpéʔele zěgi kéele na, wi i káfalagi yirigi yaà gi tɛɛkɔnyi ni.

¹⁴ Syɛ́ɛnbèle myɛ n baa pye nidoliyo pe cánni báriga ni, fɛ̀ɛrɛ n tɛɛ̀kpumɔnbèle myɛ taa pe ǹdevaanyi kéele na. Níì cán yasunyi bee myɛ i nyɛ jànvaa yáriya, ŋɔngara o nyɛ yi ni í.

¹⁵ Yi myɛ i nyɛ gbanzan, kataanra yáriya yii. Yi làrigbumɔnni ga baa nan, yi a kwɔ́ɔ láʔa yaà.

¹⁶ Wee wi nyɛ lè Zyakɔbi lɛɛli, wi o nyɛ yi felege í. Níì cán woro wi yáriri myɛ sámaga, Isirayɛli si i nyɛ wi kɔ́rigi syɛɛnfelege. Wi mɛ́ɛgi gi nyɛ Yawe wi lè Nyɛ̀ʔɛni Sùlasiibéle Kafɔlɔ.

Kálagigbɔɔli li lè li a mɔn si pye í

¹⁷ Mɔ kɔ́lɔ yáriri koli tári na, mɔ wee taana be tɛ́ɛn kapɛɛnnɛ kánma na lè!

¹⁸ Níì cán Yawe wi syɛ́ɛnri naa joo níì jo: «Wéle, mii a tɔ̀nɔ́ tári syɛ̀ɛnnɛ wáa léelige kátali naa na. Mii a tɔ̀nɔ́ be gbɛ̀dɛ, koro ga pye pe be taa cò.»

¹⁹ Wɔʔɔlɔ i nyɛ mii na! Mii n tɔ̀nɔ n kpàli! Mii námigi n para! A mii si da ni gi nyuu níì jo: Mii wɔʔɔgi gi nyɛ gee naa, mii a gi kpàraco.

²⁰ Mii fànikpaagi si n kálagi, mii mɛ́ɛngèle myɛ n cɛnɛ. Mii jáabèle n núngo mii taana, pe ní o beè í. Syɔɔn faala ní o nyɛ ní mii ní, wee wi mii fànikpaagi kóri lè í, wee wi mii fàniyi kíle lè í.

²¹ Níì cán bànaʔabèle be pye nidoliyo, pe ga Yawe caa í. Koro na pe ga gbàn ni kérigèle cángi ni láʔala í, á be yaweeri gboogéle myɛ cariga n màʔa.

²² Wo i kàfulogo lúro gee, ki i nyɛ tìngbɔɔmɔ, bee bi yìri solomɔkulo tári ma ni maa lè bi ba Zyuda kěyi kàriga tɛɛ̀kalagiga, ní gbàáyi tɛɛkòrogo.

Zyeremii i nyɛ́ɛri wi syɛ́ɛnbèle mɛ́ʔɛ na

²³ Mii n gi cán, Yawe, syɔɔn tánʔaganmi o nyɛ wi tiimaw ma í. Syɔɔn ban wi wiyɛɛ nyɔ̌ngèle láaganma kɔ̀rɔsíi wi tánʔani làla ni í.

²⁴ Mii kpúmɔn mi kàriga Yawe! Kàjáa ki pye gi pyeganmi na, ki si a kɔ́ pye mɔ fundanʔari làla ni í, jàngó mɔ a kɔ́ mii kálagi péw í.

²⁵ Mɔ fundanʔagbɔɔri yàli tári syɛɛnfeleye na, yee yi lè yi ga mɔ cán í, ní syɛ́ɛnbèle na, bele be lè pe o mɔ mɛ́ɛgi yiri í! Níì cán pe i Zyakɔbi káa, pe i wi káa, pe i wi kálagi bi kwɔ́ɔ, pe i wi tɛɛkòrogi kàragí tɛɛ̀kalagiga.