Zyeremii 1 - Cebaara Bible 2010

¹ Zyeremii syɛ́ɛnri, wi lè Hilikiyahu jáaw, wi pye lè Anatɔti ye sáriga-wòlowaa, Bɛnzyamɛ tári ni.

² Yawe syɛ́ɛnri n nan wi na, Amɔn jáaw Zyozyasi lǎli ni, wi lè Zyuda fànʔafɔw, woro fǎngi yɛ̀ʔɛlɛ kɛɛ ní taanri wóli na.

³ A gi wɔ́ɔ̀ pye nya Zyozyasi jáaw Yehoyakimi lǎli ni, wi lè Zyuda fànʔafɔw, fwɔɔ n sáà nan Zyozyasi jáaw Sedesyasi fǎngi yɛ̀ʔɛlɛ kɛɛ ní nibin wóli kwɔ́ɔmɔ na, n taa n sáà nan lǎli na, lee ni be Zyerusalɛmi ye cò n kári lè, yɛ́ɛli yeye kagunɔ wóʔo na.

Kolocɔlɔɔ n Zyeremii yeri bi tun

⁴ Yawe syɛ́ɛnri n nan mii na, wi n jo:

⁵ «Sáni mii í mɔ sámaga mɔ nɔ́ɔw láʔa ni lè mii maa mɔ cán, bi wɔ́ɔ mɔ yaʔa sìnyiri ni wi láagi ni, mii maa mɔ sámaga n yaʔa kɔlɔ̀ na, n mɔ télege mɔ í pye kanyaajooo syɛɛnfeleyi ma.»

⁶ A mii wi yari: «Ee! Kàfɔw Yawe, mii ga kɔ́ɔ̀ gbàn joomɔ na í, níì cán mii i nyɛ nìgɔcaripiige.»

⁷ A Yawe mii pye: «Mɔ a kɔ́ gi joo si jo: ‹Mii i nyɛ nìgɔcaripiige í.› Mɔ n yɛlɛ bàā syée pe myɛ ma, bele má mii ga mɔ tun lè gee myɛ mii ga joo n gbàn mɔ ma lè, mi sa ra koro nyuu be ma.

⁸ Mɔ a kɔ́ fyáa be na í. Níì cán mii i nyɛ ní mɔ ní bàā mɔ syoo,» Yawe wi jo nya.

⁹ Lǎli bee ni a Yawe kɔ́gi sánʔa n tánga mii nyɔ́ɔgi na, níì mii pye: «Wéle, mii syɛ́ɛnri mii le dee mɔ nyɔ́ɔgi ni.

¹⁰ Wéle, mii n mɔ télege níjanʔa, syɛɛnfeleyi nyúngo na, ní fǎnyi kánma na, koro ga pye mɔ í da kíle da kɔ́nɔgi, si wɔ́ɔ ra kpúmɔn da cáan, koro ga pye mɔ í da di kúu, si wɔ́ɔ ra di kálagi da kwóo, koro ga pye mɔ í da faanri, si wɔ́ɔ ra cɔ́rɔ.»

Amandi tíigi káganna ní nɛʔɛdaʔagi gi kángi lè

¹¹ Yawe syɛ́ɛnri n nan mii na, wi n jo: «Nyàʔá mɔ nyaagi, Zyeremii?» A mii wi yari: «Amandi tíige káganna mii nyaagi.»

¹² A Yawe mii pye: «Mɔ n sámaga n nyaa. Níì cán mii yákirii i nyɛ mii syɛ́ɛnri na bi tɔ̀nɔ́ di foro.»

¹³ A Yawe syɛ́ɛnri níì nan mii na tɔziin wógi na, wi n jo: «Nyàʔá mɔ nyaagi?» A mii wi yari: «Nɛ̀ʔɛdaʔaga mii nyaa ki i kángi solomɔkulo kàbangi na.»

¹⁴ A Yawe mii pye: «Solomɔkulo kàbangi na wɔʔɔgi a yìri bi ba too tári syɛ̀ɛnnɛ myɛ na.

¹⁵ Níì cán ki wéle, mii a solomɔkulo kàbangi fànya syɛɛnfeleye myɛ yeri yaà,» Yawe wi jo nya, «yi myɛ nibin nibin a ba yi fàngorigēle tɛ́ʔɛ tɛ́ʔɛ Zyerusalɛmi kpàánweegèle nyɔ́ɔ na, gi tǒbèle yɛ́ʔɛ ma, bi be màʔa bi kpàra, ní Zyuda kèkpoloyi myɛ taana.

¹⁶ Mii a mii kútiiw kúun be na pe péemi myɛ kéele na níì cán pe n mii yaʔa ní sa ni nùndaanni yáriga sórogi kolocɔlɔbèle pèle nikwɔɔlɔ ma, ní i tuun ni kpùmɔnɔ́ be kɔ́yi fáli yɛ́ʔɛ ma.

¹⁷ Mɔ si na, sɛntiiri tɛ́ʔɛ mi miyɛɛ bwɔɔ sárigèle ni, mí yìri mi gi jo mi tɛ̀ɛn be na, gee myɛ mii a joo bi gbàn mɔ ma lè. Mɔ a kɔ́ ra cɛ̀lɛ́ be kéeli na í, jàngó mii a kɔ́ mɔ yaʔa mɔ í da cɛ̀lɛ́ pe yɛ́ʔɛ ma í.

¹⁸ Wéle, mii wi mɔ télegi wee níjanʔa tári myɛ nyúngo na mɔ í pye àmɛɛ kènirige nyɛ lè, ní àmɛɛ tunmɔrɔ gàánna nyɛ lè, ní àmɛɛ kanyɛɛnrɛ tò nyɛ lè Zyuda fànʔafɔbèle kánma na, ní wi syɛɛnkpolobèle kánma na, ní wi sáriga-wòlobèle kánma na, ní tári syɛ̀ɛnnɛ kánma na.

¹⁹ Pe a kapɛɛnni kpúmɔn ní mɔ ní, kàjáa pe a fànʔa taa mɔ na í. Níì cán mii i nyɛ ní mɔ ní bàā mɔ syoo,» Yawe wi jo nya.