Zyan 7 - Cebaara Bible 2010

Zyezu cɔnɔbèle da tága wi na í

¹ Koro kàdoʔo ma Zyezu maa ni nyaari Galile ni, wi si da fɔ̀lɔ bàā nyaari Zyude ni í, níì cán Zyefubèle maa ni caa bi wi kpóo.

² Kàjáa Zyefubèle fɛ́tii wi pye lè Kpáagèle Láara Tɛ́ɛnnɛ wóo a fɛ́tiiw bee canʔa ga nùuni,

³ a Zyezu cɔnɔbèle wi pye: «Ki n yɛlɛ mɔ í yìri nɛɛ naa bi kári Zyude tári ma, koro ga pye mɔ taʔafɔbèle í wɔ́ɔ sa mɔ kapyegèle sámaga nyaa.

⁴ Wee wi ga ni caa lè syɛ́ɛnbèle í woro cán, wi o yarigaa kpéʔele làrama ni í. Amɛɛ mɔ kakpoloyi kpéʔele lè nya, ki n yɛlɛ mɔ í sa miyɛɛ dɛ̀ɛn dulunyanw syɛ̀ɛnnɛ na.»

⁵ (Wi cɔnɔbèle da kɔ́ɔ̀ tága wi na lǎli bee ni í.)

⁶ A Zyezu be pye: «Mii lǎli ga kɔ́ɔ̀ nan í. Yele si na, làrigèle myɛ i nyɛ yele ma sèjira.

⁷ Yele kéeli a gbǎn dulunyanw syɛ̀ɛnnɛ bɛɛn í. Kàjáa mii kéeli si n tɔ́ɔ̀ be bɛɛn níì cán mii i be kɔ́rɔw nyuu níì jo be kapyegèle ga nyɔɔ í.

⁸ Yele yaa syée sériw bee ma. Mii o syée yaà wi ma í, ncan lǎli ga kɔ́ɔ̀ nan mii ma í.»

⁹ A wi ga gee bee joo be ma n kwɔ́ɔ, a wi kòro yaà Galile ni.

Zyezu kárili kéele kpáagèle láara tɛ́ɛnnɛ fɛ́tii ma

¹⁰ Wi cɔnɔbèle kárigwɔɔlɔ kadoʔo ma fɛ́tiiw ma, a wi tiimaa náà kári wi nibin wɔ́ɔgēle, wi kárili si maa pye làrama ni.

¹¹ Koro n gi taa Zyefubèle maa ni wi caa ni máari fɛ́tiiw tɛ́ʔɛ ni níì jo: «Sán ye cán nǎnw bee i nyɛ?»

¹² Syɛ́ɛnmi maa ni syɛɛnrɛ saʔa kabala ni nyuu wi kéeli na. Pèle maa ni gi nyuu níì jo: «Syɛɛncaɔn wii.» A pèle jo: «Eʔe, syɛɛncaɔn ban í, wi i syɛ́ɛnbèle fáana ni pùuní.»

¹³ Koro ní ki myɛ ní pe wàa faala da ni syɛ́ɛnri bee tàa nyuu wi kéeli na syɛ́ɛnmi nyɛ́nɛ na í, ncan pe maa ni fɛ̀ɛgí Zyefubèle na.

¹⁴ Lǎli ni fɛ́tiiw canya baa tíla lè, a Zyezu náa sáà jée kpɔ̀ʔɔrɔli kpaʔa ni ni syɛ́ɛnbèle tama.

¹⁵ A Zyefubèle i káama ní i gi nyuu níì jo: «Mɛ̀ɛ́ nǎnw naa pye níì sɛ́bɛw syɛ́ɛnrɛ cán ni nyuu nya, wàa si ga wi tama di na í?»

¹⁶ A Zyezu be pye: «Syɛ́ɛnree na mii syɛ́ɛnbèle tama lè, mii wóro ban í, mii Tunvɔw wóro dii.

¹⁷ Syɔ́ɔnwee faala wi ga ni caa bàā Kolocɔlɔɔ nyɛ́nɛ kérigèle kpéʔele lè, wee bee a tɔ̀nɔ́ gi cán kapye Kolocɔlɔɔ syɛ́ɛnri na mii syɛ́ɛnbèle tama, wàlá kapye mii fúngi syɛ́ɛnrɛ na mii be tama.

¹⁸ Wee wi ga ni wi tiimaa fúngi syɛ́ɛnrɛ nyuu lè, wee bee i wiyɛɛ kpɔ́ɔmɔ caa. Kàjáa wee wi wi tunvɔw kpɔ́ɔmɔ caa lè, wee bee wi nyɛ kányɛɛgi fɔ́lɔ, kolomɔ faala o nyɛ wi na í.

¹⁹ Mowizi ga baa làlwaw kaan yele ma ì? Koro ní ki myɛ ní yele wàa faala o táanri làlwaw bee na í. Nyàʔá na yele caa bi mii kpóo?»

²⁰ A syɛ́ɛnbèle wi yari: «Wolo n gi cán màdeo i nyɛ mɔ ni. Wìí wi caa bi mɔ kpóo?»

²¹ A Zyezu be yari: «Mii n kakpɔɔgaa nibin kpéʔele, a gee bee yele myɛ fúnyi wɔ́ɔ.

²² Mowizi wi kɛ́nɛw kajoolo kaan yele ma, koro ní ki myɛ ní Mowizi má ban wi da séli í, wolo tóolɛɛbèle má wi séli, á yele si gbàn ni nǎnbèle kɛ́nɛ kpéʔele cândɛnɛgi ni.

²³ Ki si ga pye yele n gbàn ni nǎnbèle kɛ́nɛ kpéʔele cândɛnɛgi ni jàngó Mowizi làlwaw a kɔ́ kálagi í, mɛ̀ɛ́ gi nyɛ á yele fúnyi tanʔa mii kurugo níì jo mii n nànwaa pɔʔɔ cândɛnɛgi ni?

²⁴ Kérigèle ge nyɛ lè yele ga ge fílige n cán í, yele a kɔ́ ra kútiiw kúunri da yɛlɛgi ní gele bee ní í, yaa wi kúunri yaa yɛlɛgi ní yele kacángèle ní.»

Zyezu lé wi nyɛ Kirisi

²⁵ Lǎli bee ni a Zyerusalɛmi syɛ́ɛnbèle pèle i gi nyuu níì jo: «Wee naa ban be caa bi kpóo ì?

²⁶ Wéle, àmɛɛ wi soro n yére ni nyuu lè pe si ga yafyɛn joo ní wi ní í, a kùndigibèle tɔ̀ʔɔ́ kɔ́ɔ̀ gi nyaa lé woro wi nyɛ Kirisi láà?

²⁷ Wolo si n tɔ́ɔ̀ wee naa tɛɛyìrige cán, kàjáa Kirisi ga pan lǎlee ni lè, syɔɔn faala a wi kàban-yìrige cán í.»

²⁸ Zyezu si maa pye ni syɛ́ɛnbèle tama kpɔ̀ʔɔrɔli kpaʔa ni, lǎli bee ni a wi yákpoli wáa níì jo: «Yele n mii cán ní wɔ́ɔ̀ mii tɛɛyìrigi cán! Koro ní ki myɛ ní mii panni ga yìri mii tiimaa ma í, kàjáa wee wi mii tun lè, woro wi nyɛ kányɛɛgi fɔ́lɔ, yele si ga wi cán í.

²⁹ Mii si n wi cán. Níì cán woro má mii yìri, woro wi mii tun naa.»

³⁰ Lǎli bee ni a be i sɔ̀ngí bi wi cò, koro ní ki myɛ ní syɔɔn faala ga kɔlɔ̀ taʔa wi na í, níì cán wi lǎli da kɔ́ɔ̀ nan í.

³¹ A syɛ̀ɛnnɛ saʔa tága wi na, ní i gi nyuu níì jo: «Kirisi ga pan lǎlee ni lè, a wi a gbǎn ba kakpoloyaa kpéʔele lé yi sɔ̀lɔ wee naa wóyo na?»

Pe n sùlasiibéle tun pe sa Zyezu cò

³² Farisibèle si maa syɛ́ɛnbèle syɛ́ɛnrɛ lóʔo, dee pe da ni kabala ni nyuu wi kéeli na lè. Lǎli bee ni a sáriga-wòlobèle kàfɔɔlɔ ní Farisibèle fala n sùlasiibéle tun níì jo pe sa wi cò.

³³ A pe ga sáà nan wi na, lǎli bee ni a Zyezu jo: «A mii i naa ní yele ní wii tɔ́ɔliw ni bi làlaa cɛɛri kwɔ́ɔ gbɛnʔɛnɛ, koro kàdoʔo ma si kári mii Tunvɔw ma.

³⁴ Mii si ga kári, yele a kɔ́ ra mii caa, yele si a ní mii nyaa í. Níì cán tɛ́ɛgee ni mii a sa pye lè, yele a gbǎn nan yaà í.»

³⁵ Lǎli bee ni a Zyefubèle i gi nyuu peyɛɛ ma níì jo: «Sán woro a zǐn kári níì jo wolo a ní woro nyaa í? A wi a tɔ̀ʔɔ́ kári lé wolo Zyefunyɛnbèle kurugo, bele be cariga lè n kári n sáà tɛ́ɛn ní syɛɛnfeleyaa ní yi lè Girɛkibèle, sáā bele bee tama yaà láà?

³⁶ Syɛ́ɛnree wi joo lè níì jo, wolo a kɔ́ ra woro caa, wolo si a ní woro nyaa í, ní àmɛɛ wi níì jo lè, tɛ́ɛgee ni woro a sa pye lè, wolo a gbǎn nan yaà í, nyàʔá gi nyɛ syɛ́ɛnri bee kɔ́rɔ?»

Sìíw cábiya

³⁷ A sériw canzanga ga baa nan, koro gee gi pye lè sériw cângbɔʔɔ, a Zyezu yìri n yére níì yákpoli wáa níì jo: «Lògbaʔa ga wàa jáa, waa maa naa mii ma wi ba gbaa.

³⁸ Syɔ́ɔnwee wi ga tága mii na lè, ki a pye wee bee ma àmɛɛ gi nyuu lè Kolocɔlɔɔ syɛɛnsɛbɛri ni níì jo: Sìíw lɔ̀ʔɔ a pye wee bee fúngo ni bàā fóo àmɛɛ cábiya nyɛ lè.»

³⁹ Lǒgi syɛ́ɛnrɛ Zyezu joo lè, Pìicǎnni kéele wi da joo, lee woro tágafɔbèle a kɔ́ ba taa lè. Níì cán pe da kɔ́ɔ̀ li taa n kwɔ́ɔ lǎli bee ni í, àmɛɛ gi nyɛ lè Zyezu da kɔ́ɔ̀ wi nìjangbɔɔri taa í.

Syɛ́ɛnmi n tíla Zyezu kéeli na

⁴⁰ A syɛ́ɛnbèle ga gee bee lóʔo, a pèle jo: «Kányɛʔɛ gii, wee naa wi tɔ̀nɔ́ nyɛ kanyaajoow.»

⁴¹ A bele jo: «Kirisi wii.» A pèle si jo: «Mɛ̀ɛ́ Kirisi a gbǎn yìri Galile ma bi sɛ́ɛ?

⁴² Ki o nyuu Kolocɔlɔɔ syɛɛnsɛbɛri ni níì jo, Kirisi a kɔ́ ba yiri Davidi yòdaʔayi ni ì, ní níì jo, wi a yìri Bɛtilehɛmi ma, ki lè Davidi kěgi ì?»

⁴³ A tílala jée syɛ́ɛnmi nínge ni wi kéeli na.

⁴⁴ Pèle si maa pye yaà syɛ́ɛnmi ni ni sɔ̀ngí bi wi cò, pe wàa si ga gbàn n kɔlɔ̀ taʔa wi na í.

Sáriga-wòlobèle ní Farisibèle sìndagala kéele

⁴⁵ Lǎli bee ni a sùlasiibèle lúru n kári sáriga-wòlobèle kàfɔɔlɔ ní Farisibèle ma. A poro sáà be yíbe níì jo: «Mɛ̀ɛ́ gi nyɛ á ye pan níì wi yaʔa yaà?»

⁴⁶ A sùlasiibèle be yari: «Wolo ga tɔ̀nɔ n kɔ́ɔ̀ syɔɔn nyaa wi i nyuu nǎnw naa jooganma na nyáana í.»

⁴⁷ A Farisibèle be pye: «A wi syɛɛnjóori si fala lé n wɔ́ɔ̀ yele nyǔnyi kàriga?

⁴⁸ A yele kɔ́ɔ̀ kùndigiwaa nyaa lé a wi tága wi na láà ba fwɔɔ Farisiwaa?

⁴⁹ Kàjáa syɛ́ɛnmi naa bi nyɛ lè pi ga yarigaa cán Mowizi làlwaw sɛ́bɛ ni í, pi n dánga.»

⁵⁰ Nikodɛmi wi da kári lè Zyezu ma booma ni, wi pye lè Farisiwaa, a woro be pye:

⁵¹ «Bi yɛlɛ ní wolo làlwaw ní, a gi yɛlɛ lé wolo í kútii kúun syɔɔn na bi gi yaʔa wolo ga syɔ́ɔnw bee syɛ́ɛnrɛ lóʔo ní wɔ́ɔ̀ wi kapyeli cán í?»

⁵² A be wi yari: «Ba Galile ye wówaa lé mɔ nyɛ? Sa sámaga mi wéle yaà sɛ́bɛw ni. Mɔ a gi nyaa bi cán kanyaajooo a gbǎn yìri Galile ma í.»

⁵³ [A pe myɛ cariga n kári be kpaaya ma.