Zyan 6 - Cebaara Bible 2010

Zyezu n nànbēle selebingéle siin ní saala kagunɔ kaan a be lìi

¹ Koro kàdoʔo ma a Zyezu kári Galile lòkpɔɔgi jelige na pe wɔ́ɔ̄ yiri lè Tiberiyadi.

² A syɛ̀ɛnnɛ saʔa taʔa wi na, níì cán pe maa wi kakpoloyi nyaa, àmɛɛ wi da ni yáabèle poori lè.

³ A Zyezu sáà lúgu nyanbelege na n tɛ́ɛn yaà, woro ní wi pìitamabèle ní.

⁴ Ki si maa kòro cɛɛri, Zyefubèle Sɔ̀lɔ-mí-yaʔali séri canʔa si nan.

⁵ A Zyezu ga wéle n syɛ́ɛnmi nyaa pi i maa woro ma, a wi Filipi pye: «Sán wolo a búru taa kaan syɛ́ɛnmi naa ma pi lìi?»

⁶ Zyezu maa dee bee joo bi Filipi pye wéle, níì cán wi maa gi cán wiyɛɛ ma gee woro a kpéʔele lè.

⁷ A Filipi wi pye: «Alí pe ga wáli selebingéle siin búru syɔɔ n baa cɛnɛ n lɛɛ syɛ́ɛnmi naa na cɛɛri cɛɛri, wi a gbǎn pe myɛ foro í.»

⁸ Wi pìitamawee pe da ni yiri lè Andire ní i wi yɛʔɛfɔw yiri Siimɔn Pyɛri, a woro wi pye:

⁹ «Mii n orizye búrubéle kagunɔ ní fápiigéle siin nyaa nìgɔcari-pílaa ma nɛɛ naa. Kàjáa nyàʔá dee bee a gbǎn nyɔɔ syɛ́ɛnmi naa na?»

¹⁰ A Zyezu be pye: «Ye syɛ́ɛnmi pye bi tɛ́ɛn.» A bi tɛ́ɛn nyàági na, tɛ́ɛgi bee maa pye nyàánɛʔɛgɛ tɛ́ʔɛ. Nǎnbèle maa selebingéle siin ní saala kagunɔ félege kwɔ́ɔ.

¹¹ A Zyezu búrubèle láa níì bariga kaan Kolocɔlɔɔ ma níì be lɛɛ syɛ́ɛnmi na bi pye wodɛ́ɛnmɛ ní lè, ní wɔ́ɔ̀ fápiigèle lɛɛ bi na. A pe myɛ taa n yɛlɛ àmɛɛ pe da ni sɔ̀ngí lè poro í taa fápiigèle na.

¹² Lǎli ni pe myɛ lìi n tín lè, a wi wi pìitamabèle pye: «Wogabagiw wi kòro lè ye wi koli, ye a kɔ́ wi yaʔa wi nyɔʔɔrɔ í.»

¹³ A be wi koli n le sɛ̀ʔɛgēle kɛɛ ní siin ni, a ge nyìn wogabagiw na, wee wi kòro lè búrubèle kagunɔ ni, syɛ́ɛnbèle lìigwɔɔlɔ kadoʔo ma.

¹⁴ Kakpɔɔgi Zyezu kpéʔele lè, a syɛ́ɛnbèle ga gee bee nyaa, a be jo: «Wee naa wi tɔ̀nɔ́ nyɛ kanyaajoow kányɛʔɛ ni, woro wee pe da jo lè wi a kɔ́ pan dulunyanw ni.»

¹⁵ Lǎli bee ni a Zyezu ga gi nyaa syɛ́ɛnbèle i caa bi woro ŋàʔana cò bi sa kpéʔele fànʔafɔlɔ, a wi núngo be taana n níì lúgu nyanbelegi ǹjoʔo ni wi nibin.

Zyezu n tánʔa lǒgi ǹjoʔo ni

¹⁶ A ki ga pye cângwɔɔgi nyɔ́ɔ na a wi pìitamabèle kári lòkpɔɔgi ma

¹⁷ n sáà jée kɔ́rɔwaa ni ni syée Kapɛrinayumi ma gi lè lǒgi jelige na. Yébiligi si maa wɔ́ɔ n gi yaʔa Zyezu ga kɔ́ɔ̀ nan be na í.

¹⁸ A káfalakpɔʔɔ yìri ni lǒgi fúugu.

¹⁹ Pe si maa ni kɔ́rɔw waari n kɔ́ naà cúlobéle kagunɔ wàlá kɔrɔni félege taa, á Zyezu náa i táanri lǒgi ǹjoʔo ni ni maa be ma. Lǎli ni wi nùuni lè kɔ́rɔw na á be wi nyaa, a fyáari be cò.

²⁰ A wi be pye: «Ye a kɔ́ ra fɛ̀ɛgí í, mii wii.»

²¹ Koro na a gi be dɛ́nɛ wi jée ní poro ní kɔ́rɔw ni, a wi jée, á be fala n nan lǒgi kàgomɔ na, beè pe da ni syée lè.

Syɛ́ɛnmi i Zyezu caa

²² Koro nyǐndaligi na syɛ́ɛnmi pi da pye yaà lè lòkpɔɔgi jelige na, a bi gi nyaa kɔ́rɔwaa da pye yaà í kapye nibin ban í, Zyezu si da jée kɔ́rɔw bee ni ní wi pìitamabèle ní í, wi pìitamabèle maa kári pe yagwɔɔlɔ.

²³ Kɔ́rɔbèle pèle si maa kɔ́ɔ̀ yìri Tiberiyadi ma n baa yére tɛ́ɛgi taana beè pe da búruw lìi lè, woro wee na Kàfɔw da nyɛ́ɛri Kolocɔlɔɔ ma lè.

²⁴ Amɛɛ gi nyɛ lè syɛ́ɛnmi bee ga Zyezu ní wi pìitamabèle nyaa í, a bi jée kɔ́rɔbèle bee ni n lǒgi jeli n kári Kapɛrinayumi ma sa Zyezu caa wéle.

Zyezu wi nyɛ sìíw búru

²⁵ Lǎli ni be sáà wi caa n nyaa lè lǒgi jelige na, a be wi pye: «Tamafɔw, ba làlìí ni mɔ pan nɛɛ naa?»

²⁶ A Zyezu be yari: «Mii a tɔ̀nɔ́ gi joo yele ma kányɛʔɛ ni, kakpoloyi yele mii nyaa mii i kpéʔele lè, yele o mii caa yee bee kéele na í, fwɔɔ búruw lìidinnɛ kéele na.

²⁷ Yaliiree di fɔ́ɔnri lè, ki ga yɛlɛ yele í da báara dee bee kéele na í, fwɔɔ dee di nyɛ lè ti a fɔ́nʔɔ bi nyaa í, ní i sìibangwɔɔw kaangi, ki n yɛlɛ yaa báara dee bee kéele na, Syɔɔn-pya wi a yaliiri bee kaan yele ma. Níì cán Tofɔw Kolocɔlɔɔ n wi nyɛ́nɛ n wòlo níì wi nyɔ́ɔgi syɛ́ɛnrɛ kaan wi ma.»

²⁸ A be wi pye: «Nyàʔá mɔ sɔ̀ngí wolo í da kpéʔele Kolocɔlɔɔ fáliw?»

²⁹ A Zyezu be pye: «Kolocɔlɔɔ fáliw pyele li nyɛ yele í tága wi tundunw na.»

³⁰ Lǎli bee ni a be níì wi pye: «Nyàʔá kakpɔɔfelege mɔ a kpéʔele tɛ̀ɛn wolo na, koro ga pye wolo si tága mɔ na? Keelìí mɔ a kpéʔele?

³¹ Wolo tóolɛɛbèle maa ni mánɛw líi fìími tára ni, àmɛɛ ki da sɛ́bɛ lè níì jo: ‹Wi maa ni nyɛ̀ʔɛni búru kaangi be ma pe i líi.› »

³² A Zyezu be pye: «Mii a tɔ̀nɔ́ gi joo yele ma kányɛʔɛ ni, Mowizi ban wi da pye nyɛ̀ʔɛni búru kaanfɔlɔ yele ma í, kàjáa mii Tóow wi nyɛ nyɛ̀ʔɛni búruteleo kaanfɔlɔ yele ma.

³³ Níì cán búruwee wi yìri nyɛ̀ʔɛni na lè n tìgi naa, wee bee wi nyɛ Kolocɔlɔɔ wów, woro si wi sìíw kaangi dulunyanw syɛ̀ɛnnɛ ma.»

³⁴ A be wi pye: «Kàfɔw, ki n yɛlɛ maa búruw bee kaangi wolo ma làla o làla.»

³⁵ A Zyezu be pye: «Jo mii si wi nyɛ búruw bee, wee wi sìíw kaangi syɛ́ɛnbèle ma lè. Syɔ́ɔnwee wi ga pan mii ma lè, kateʔe a ní wee bee jáa bi nyaa í. Wee wi ga wɔ́ɔ̀ tága mii na lè, lògbaʔa a ní wee bee jáa bi nyaa nyáana í.

³⁶ Mii si maa gi joo yele ma níì yele pye, yele n mii nyaa, yele si ga sèʔê tága mii na í.

³⁷ Bele Tofɔw kaangi mii ma lè, bele bee myɛ a ra maa mii ma, syɔ́ɔnwee wi ga pan mii ma lè, mii a tée wee bee nɛnɛ yirige kàfugi na í.

³⁸ Níì cán mii ga yìri nyɛ̀ʔɛni na n tìgi naa tári na mii nyɛ́nɛ kéele na í, mii Tunvɔw nyɛ́nɛ kéele na mii tìgi naa.

³⁹ Mii Tunvɔw nyɛ́nɛ kéele li nyɛ, bele myɛ wi kaan mii ma lè, mii a kɔ́ pe wàa nibin yaʔa wi pùuni í, fwɔɔ mii í pe myɛ nyán yirige dulunyanw cângwɔʔɔ canʔa na.

⁴⁰ Gee gi nyɛ lè mii Tóow nyɛ́nɛ kéele, koro gi nyɛ syɔ́ɔnwee faala ga Jaafɔw nyaa lè níì tága wi na, wee bee í sìibangwɔɔw taa. Mii si a ba wee bee nyán yirige dulunyanw cângwɔʔɔ canʔa na.»

⁴¹ Amɛɛ Zyezu gi joo lè níì jo woro wi nyɛ búruw, wee wi yìri lè nyɛ̀ʔɛni na n tìgi naa, a Zyefubèle fala ni wi sànʔá

⁴² níì jo: «Wee naa ban wi nyɛ Zyozɛfu jáaw ì? Wolo ga wi tóow ní wi nɔ́ɔw cán ì? Mɛ̀ɛ́ si gi nyɛ á wi kɔ́ɔ̀ jo woro n yìri nyɛ̀ʔɛni na?»

⁴³ A Zyezu be yari: «Ye a ra mii sànʔá í.

⁴⁴ Tofɔw wi mii tun lè, syɔɔn faala a gbǎn pan mii ma wee bee kílele kadoʔo na í. Mii si a ba syɔ́ɔnw bee nyán yirige dulunyanw cângwɔʔɔ canʔa na.

⁴⁵ Kanyaajoobèle maa syɛɛnraa sɛ́bɛ, a di jo: ‹Kolocɔlɔɔ a syɛ́ɛnbèle myɛ tama.› Syɔ́ɔnwee faala wi ga ni Tofɔw syɛ́ɛnrɛ lúro lè, níì fɔ̀lɔ wi tamani na, wee bee a pan mii ma.

⁴⁶ Kàjáa syɔɔn faala ga kɔ́ɔ̀ Tofɔw Kolocɔlɔɔ nyaa í, kapye wee ban wi yìri yaà wi ma n pan lè í, woro wi Tofɔw nyaa.

⁴⁷ Mii a tɔ̀nɔ́ gi joo yele ma kányɛʔɛ ni, syɔ́ɔnwee wi tága mii na lè, sìibangwɔɔw i nyɛ wee bee ma.

⁴⁸ Mii wi nyɛ búruw, wee wi sìíw kaangi lè.

⁴⁹ Yele tóolɛɛbèle maa ni mánɛw líi fìími tára ni, koro ní ki myɛ ní a be sèʔé baa kùu.

⁵⁰ Búruwee si wi yìri nyɛ̀ʔɛni na n tìgi naa lè, woro wi wee naa, syɔ́ɔnwee wi ga lìi wi na lè, woro a ní kùu bi nyaa í.

⁵¹ Mii wi nyɛ búruw, wee wi nyɛ lè sìíw wóo, níì yìri nyɛ̀ʔɛni na n tìgi naa. Syɔ́ɔnwee wi ga búruw bee lìi lè, wee bee a sìi taa, sìíwee wi nyɛ lè wi a kwɔ́ɔ bi nyaa í, búruwee mii a kaan lè, woro wi nyɛ mii céri, mii a di kaan dulunyanw syɛ̀ɛnnɛ myɛ sìitaara kéele na.»

⁵² A wi ga gee bee joo n kwɔ́ɔ, a kàfulogo yìri Zyefubèle nínge ni, a pe i peyɛɛ gábala níì jo: «Mɛ̀ɛ́ woro a gbǎn wi céri kaan wolo ma wolo í lìi bi sɛ́ɛ?»

⁵³ Lǎli bee ni a Zyezu be pye: «Mii a tɔ̀nɔ́ gi joo yele ma kányɛʔɛ ni, yele ga pye yele o Syɔɔn-pya céri káa ní i wi sìsyaanw gbo í, yele n fɔ̀n sìi ni.

⁵⁴ Wee wi ga ni mii céri káa lè ní i mii sìsyaanw gbo, sìibangwɔɔw i nyɛ wee bee ma, mii a tɔ̀nɔ́ ba wee bee nyán yirige dulunyanw cângwɔʔɔ canʔa na.

⁵⁵ Níì cán mii céri di nyɛ yaliiteleri, mii sìsyaanw si i nyɛ lògbaatelegi.

⁵⁶ Syɔ́ɔnwee wi ga ni mii céri káa lè ní i mii sìsyaanw gbo, wee bee fɔ́lɔ n kòro mii ni, á mii wɔ́ɔ̀ kòro wi ni.

⁵⁷ Amɛɛ Tofɔw woweeo mii tun lè, ní àmɛɛ mii nyɛ lè sìi na wi bárigaw ni, kánmi bee na wee wi ga ni mii céri káa lè, wee bee fɔ́lɔ a wɔ́ɔ pye sìi na mii bárigaw ni.

⁵⁸ Búruwee wi yìri nyɛ̀ʔɛni na n tìgi naa lè woro wi nyɛ wee naa. Wi félegi o nyɛ àmɛɛ yele tóolɛɛbèle wóo da pye lè í, ncan pe maa ni wee bee líi ní sèʔé baa kùu. Kàjáa syɔ́ɔnwee wi ga búruw naa lìi lè, wee bee fɔ́lɔ a sìi taa, sìíwee wi nyɛ lè wi a kwɔ́ɔ bi nyaa í.»

⁵⁹ Kapɛrinayumi ni Zyezu da pye ni syɛ́ɛnbèle tama sérikpaagi ni níì kérigèle naa joo.

Sìibangwɔɔw syɛ́ɛnrɛ kéele

⁶⁰ A wi taʔafɔbèle pèle saʔa ga syɛ́ɛnri bee lóʔo, a be jo: «Syɛ́ɛnri naa n gbàn, wìí wi a gbǎn di lóʔo?»

⁶¹ Kàjáa àmɛɛ Zyezu gi cán lè wi fúngi ni ncan gee woro joo lè ki n gbàn woro taʔafɔbèle na, a be i kabala ni nyuu, a wi be pye: «A gee bee tɔ̀ʔɔ̂ yele fúnyi wɔ́ɔ lé?

⁶² A yele ga kɔ́ɔ̀ Syɔɔn-pya nyaa wi i lúru ǹjogi ni, beè wi da pye lè, mɛ̀ɛ́ yele a gee bee pye?

⁶³ Pìicǎnni li nyɛ sìíw kaanfɔlɔ. Céri fánʔa o nyɛ gee bee na í. Syɛ́ɛnree mii téē nyuu lè yele ma, ti i nyɛ pìle, ní wɔ́ɔ i nyɛ sìíw syɛ́ɛnrɛ.

⁶⁴ Kàjáa pèle i naa yele ni, pe ga tága di na í.» (Nlaa yaà gi sélimi na Zyezu maa gi cán, bele be nyɛ lè pe a tée tága woro na í, ní wɔ́ɔ̀ wi cán wee wi a ba woro le lè woro nigoobèle kɔ́yɔ ni).

⁶⁵ A Zyezu be pye: «Gee bee na mii da gi joo yele ma níì jo, syɔɔn faala a gbǎn pan mii ma, kapye mii Tóow ga gi séew kaan wi ma í.»

⁶⁶ Nlaa wi syɛ́ɛnri bee joo lè, a wi taʔafɔbèle pèle saʔa lúru kàdoʔo ma, pe ní o syée wi kurugo í.

⁶⁷ Lǎli bee ni a Zyezu wi pìitamabèle kɛɛ ní siin yíbe níì jo: «A yele doò? A yele wɔ́ɔ i caa lé bi lúru?»

⁶⁸ A Siimɔn Pyɛri wi pye: «Kàfɔw, mɔ si wi nyɛ lè sìibangwɔɔw syɛ́ɛnrɛ joofɔlɔ, wolo si lúru mɔ kurugo bàā syée wìí syɔ́ɔn ma?

⁶⁹ Wolo n tɔ̀nɔ n tága gi na, ní wɔ́ɔ̀ gi cán ncan mɔ wi nyɛ Kirisi, wi lè Kolocɔlɔɔ syɛɛncanw.»

⁷⁰ A Zyezu be yari: «Mii tiimaa ban wi yele kɛɛ ní siinw nyɛ́nɛ n wòlo ì, bi gi taa wàa nibin i nyɛ yele ni dɛ̀ɛɔ?»

⁷¹ Zyudasi kéeli wi da joo, wi lè Siimɔn Isikariyɔti jáaw. Níì cán woro wi a kɔ́ ba Zyezu le wi nigoobèle kɔ́yɔ ni, kɛɛ ní siinw wi pye ní Zyezu ní lè, wi i nyɛ poro wàa.