Zyan 5 - Cebaara Bible 2010

Zyezu n syɛɛnmɔngɔɔ pɔʔɔ

¹ Koro kàdoʔo ma a Zyezu kári Zyerusalɛmi ma, Zyefubèle maa ni sériwaa kpéʔele yaà.

² Pùndɛʔɛ si maa pye yaà Zyerusalɛmi ni, Bǎbèle tɛɛ̀jeele taana, pe i gi yiri Heburu-syɛ́ɛnri ni, Betɛzida. Kpáagéle kagunɔ maa pye yaà pùndɛɛgi bee taana.

³ Yaabèlē saʔa maa pye wozinɛbéle ní kpáagèle bee láara ni, pèle maa pye fúunbéle n fàra tɔvanayi fɔ̀ɔlɔ ní syɛɛnmɔngɔbèle na, [a be i lǒgi fúugolo sige.

⁴ Níì cán Kàfɔw tundunwaa maa ni yìrigí nyɛ̀ʔɛni na n ba ni lǒgi bee fúugu làrigèle kèle ni. Lǒgi ga ni fúugu lǎlee ni lè, yaama o yaama félegefɔwee ga sélì taa n jée gi ni lè, wee bee wómɔ n láʔa wi na.]

⁵ Nànwaa si maa pye yaà, a yaama too wi na, a bi taa wi na yɛ̀ʔɛlɛ toko ní kpɔrigɔ ní kɔrɔtaanri.

⁶ A Zyezu ga sáà wi nyaa wozinɛɔ ní, a wi gi cán yáami bee n mɔn wi na, a wi wi yíbe níì jo: «A mɔ i caa lé bi pɔʔɔ?»

⁷ A yáaw wi yari: «Kàfɔw, syɔɔn o mii na bi mii láa le pùndɛɛgi ni lǎli ni gi fúugu lè í, sáni si mii í fulolo nan yaà lè, wàa n téè tìgi n jée gi ni mii yɛ́ʔɛ na.»

⁸ A Zyezu wi pye: «Yìri mi mɔ yasinɛgi láa maa syée.»

⁹ Lǎli bee wonijanna ni a nǎnw fala n pɔʔɔ níì gi láa ni syée. Cángi bee si maa pye Zyefubèle cândɛnɛgɛ canʔa.

¹⁰ Koro na be nǎnw bee pye: «Níjanʔa wi nyɛ cândɛnɛgi, á mɔ si mɔ yasinɛgi láa n tugo ni nyaari gi ni, gee gi lè ki ga yɛlɛ gi kpéʔele cândɛnɛgi ni í.»

¹¹ A wi be yari: «Wee wi mii pɔʔɔ lè, woro wi mii pye: ‹Mɔ yasinɛgi láa maa syée.› »

¹² A be wi yíbe níì jo: «Wìí wi nyɛ wee bee, wee wi mɔ pye lè mɔ í gi láa bàā syée?»

¹³ Kàjáa wee wi wi pɔʔɔ lè, wi da wi cán í. Níì cán Zyezu maa núngo, syɛ́ɛnmi si maa nɛʔɛ yaà tɛ́ɛgi bee ni.

¹⁴ Koro kàdoʔo ma a Zyezu ga sáà wi nyaa kpɔ̀ʔɔrɔli kpaʔa kàcoolo ni, a wi wi pye: «Wéle, mɔ n pɔʔɔ n kwɔ́ɔ, mɔ a ní kɔ́ kapeele kpéʔele í, koro ga pye yárigee gi pee lè n sɔ̀lɔ gee naa na, koro si kɔ́ mɔ taa í.»

¹⁵ A nǎnw bee kári n sáà gi joo Zyefubèle ma níì jo, Zyezu wi da woro pɔʔɔ.

¹⁶ Gee bee na Zyefubèle da ni Zyezu fɔ̀rɔgí, àmɛɛ wi da ni kérigèle bee kpéʔele cândɛnɛgi ni lè.

¹⁷ Kàjáa a Zyezu be yari: «Mii Tóow sèʔé i báara n baa nan níjanʔa na, a mii wɔ́ɔ i báara.»

¹⁸ Gee bee na Zyefubèle fúnyo da níì tanʔa n sɔ̀lɔ, a be i kanmaa caa bi wi kpóo, cândɛnɛgi kálagila yagana kéele na ban wi kéeli da be bɛɛn í, fwɔɔ àmɛɛ wi jo lè Kolocɔlɔɔ i nyɛ woro Tóow, ní i wiyɛɛ dímana ní Kolocɔlɔɔ ní sèjira.

Kolocɔlɔɔ Jáaw fànʔa

¹⁹ A Zyezu be yari: «Mii a tɔ̀nɔ́ gi joo yele ma kányɛʔɛ ni, Jaafɔw a gbǎn yarigaa kpéʔele wiyɛɛ ma í, fwɔɔ gee wi nyaa lè wi Tóow ma wi i kpéʔele. Gee myɛ si Tofɔw kpéʔele lè, gee bee wonijanga Jaafɔw wɔ́ɔ̄ kpéʔele.

²⁰ Níì cán Jaafɔw kéele n Tofɔw dɛ́nɛ, a wi i kérigèle myɛ tèé wi na, gele woro kpéʔele lè. Kérigèle gele ge kpólo n sɔ̀lɔ gele naa na lè, wi a wɔ́ɔ ra gele bee tèé Jaafɔw na, koro ga pye gi yele fúnyi wɔ́ɔ.

²¹ Amɛɛ Tofɔw kúbèle nyángi ni wéegi kánmee na lè, ànbée Jaafɔw wɔ́ɔ̄ sìíw kaangi wi nyɛnɛ wóbèle ma.

²² Níì cán Tofɔw o kútii kúunri syɔɔn na í, kàjáa wi n kútiiw kèlē myɛ le Jaafɔw kɔ́yɔ ni,

²³ koro ga pye syɛ́ɛnbèle myɛ í da Jaafɔw kpɔ̀ʔɔrɔ́, àmɛɛ be Tofɔw kpɔ̀ʔɔrɔ́ lè. Syɔ́ɔnwee ga pye lè wi o Jaafɔw kpɔ̀ʔɔrɔ́ í, wee bee wɔ́ɔ o Tofɔw kpɔ̀ʔɔrɔ́ í, woro wee wi Jaafɔw tun lè.

²⁴ Mii si a tɔ̀nɔ́ gi joo yele ma kányɛʔɛ ni, syɔ́ɔnwee faala wi ga ni mii syɛ́ɛnri lúro lè níì tága mii Tunvɔw na, sìibangwɔɔw i nyɛ wee bee ma, wi tɔlɔgɔ a ní pye kútiiw ni í, ncan wi n yiri kùúw ni n kwɔ́ɔ n jée sìíw ni.

²⁵ Mii a ní gi joo yele ma kányɛʔɛ ni, làlaa i maa, li si n tɔ̀nɔ n nan n kwɔ́ɔ, lee ni kúbèle a Kolocɔlɔɔ Jáaw yákpolo lóʔo lè. Bele pe ga li lóʔo lè, poro a sìi taa.

²⁶ Níì cán àmɛɛ Tofɔw Kolocɔlɔɔ nyɛ lè sìi na wiyɛɛ ma, ànbée wi wɔ́ɔ̀ gi kpéʔele Jaafɔw ma wi wɔ́ɔ pye sìi na wiyɛɛ ma,

²⁷ ní wɔ́ɔ̀ fǎngi kaan wi ma waa kútiiw nyuu, níì cán wi i nyɛ Syɔɔn-pya.

²⁸ Yele a kɔ́ ra káama gee bee na í. Níì cán làlaa i maa, loro lǎli ga baa nan, bele myɛ be nyɛ lè nyányi ni, pe a wi yákpoli lóʔo si yiri yi ni.

²⁹ Bele be nyɛ lè kacànbyebèle, poro a nyán sìíw kánma na, bele si be nyɛ lè kapeebyebèle, poro si nyán kútiiw kánma na.

Fɛ̀ɛ́bèle be Zyezu fǎngi tɛ̀ɛn lè

³⁰ «Mii a gbǎn yarigaa kpéʔele niyɛɛ bárigaw ni í, mii i kútiiw kúunri ni yɛlɛgi ní mii kaloʔogèle ní. Gee bee na mii kútiiw síngi, níì cán mii o caa bàā mii nyɛ́nɛ kèlē kpéʔele í, fwɔɔ mii Tunvɔw nyɛ́nɛ kèlē.

³¹ Kapye mii wi séeraw kpéʔele niyɛɛ tiimaa kéeli na, mii séeraw a gbǎn pye kányɛʔɛ í.

³² Wàa wi séeraw kpéʔele mii kéeli na, a mii gi cán séeraw wi kpéʔele lè wi i nyɛ kányɛʔɛ.

³³ Amɛɛ yele da tun lè Zyan ma, séerawee wi sáà kpéʔele lè, kányɛɛgi kéele na wi da wi kpéʔele.

³⁴ Mii si ga niyɛɛ yérige syɔɔn séera na í. A mii kérigèle naa nyuu yele ma wii, koro ga pye yele í taa syɔɔ.

³⁵ Zyan maa pye fètinni, lee be le lè a li i nyín, a gi yele dɛ́nɛ lǎli bee ni, a yele làla cɛɛri kwɔ́ɔ fundaanra na wi gbɛ̀ɛ́nmi báriga ni.

³⁶ Séerawaa si ní i nyɛ mii ma, woro n kpɔ́ʔɔ n sɔ̀lɔ Zyan wów na. Séeraw bee wi nyɛ kérigèle gele Tofɔw kaan mii ma lè níì jo mii í ge kpéʔele foro, kérigèle gele mii kpéʔele lè, gele bee tiimaa i nyɛ mii séera, koro ga pye syɛ́ɛnbèle í gi cán Tofɔw wi mii tun.

³⁷ Tofɔw wi mii tun lè, woro wɔ́ɔ i nyɛ mii séera. Yele ga kɔ́ɔ̀ wi yákpoli lóʔo nyáana í, yele ga wɔ́ɔ kɔ́ɔ̀ wi yɛ́ɛgi nyaa í,

³⁸ wi syɛ́ɛnri si ga wɔ́ɔ̀ tɛɛkòrogo taa yele fúnyi ni í, níì cán wee Kolocɔlɔɔ tun lè, yele ga tága wi na í.

³⁹ Kolocɔlɔɔ syɛɛnsɛbɛri yele wéle ni nyuu lè ní lòmaana ní, ní i sɔ̀ngí bi sìibangwɔɔw taa di ni, dee bee wɔ́ɔ i nyɛ mii séera.

⁴⁰ Koro ní ki myɛ ní yele ga fɔ̀lɔ bi pan mii ma koro ga pye yele í sìíw taa í!

⁴¹ Kpɔ́ɔmi syɛ́ɛnbèle kaangi lè, mii o bee bee caa í.

⁴² Mii si n gi cán tàmaga o nyɛ yele fúnyi ni Kolocɔlɔɔ kàbangi na í.

⁴³ Mii n pan mii Tóow mɛ́ʔɛ na, yele si ga baa fɔ̀lɔ mii na í. Wàa si ga pan wi tiimaa mɛ́ʔɛ na, yele a ba fɔ̀lɔ wee bee na!

⁴⁴ Yele bele ye fɔ̀lɔ lè yeyɛɛ kpɔ́ɔmi na, bi gi taa wee nibin wi nyɛ lè Kolocɔlɔɔ, kpɔ́ɔmee wi kaangi lè, yele o bee bee caa í, mɛ̀ɛ́ yele a gbǎn tága bi sɛ́ɛ?

⁴⁵ Yele a kɔ́ ra sɔ̀ngí mii wi a mii Tóow sɔ́ɔn yele na í. Mowizi na yele ye sɔ̀ngumi taʔa lè, woro wi sɔ́ɔn yele na.

⁴⁶ Yele ga maa tága Mowizi na, yele mǎà dée wɔ́ɔ tága mii na, níì cán wi n mii kéeli sɛ́bɛ.

⁴⁷ Amɛɛ si gi nyɛ lè yele ga tága woro sɛ́bɛw syɛ́ɛnrɛ na í, mɛ̀ɛ́ yele a gbǎn tága bi sɛ́ɛ mii syɛɛnjóori na?»