Zyan 3 - Cebaara Bible 2010

Zyezu ní Nikodɛmi

¹ Farisiwaa si maa pye yaà, pe i wi yiri Nikodɛmi, wi maa pye Zyefubèle kùndigiwaa.

² Wee bee maa kári Zyezu ma cangaa yébilige ni n sáà wi pye: «Tamafɔw, wolo n gi cán mɔ n yìri Kolocɔlɔɔ ma n pan n baa pye tamafɔlɔ. Níì cán kakpoloyi mɔ kpéʔele lè, syɔɔn a gbǎn yi kpéʔele í, kapye Kolocɔlɔɔ o nyɛ ní wi ní í.»

³ A Zyezu wi pye: «Mii a tɔ̀nɔ́ gi joo mɔ ma kányɛʔɛ ni, kapye pe ga syɔ́ɔnwee séli n see lè kavɔn í, wee bee a gbǎn Kolocɔlɔɔ fǎngi nyaa í.»

⁴ A Nikodɛmi wi pye: «Syɔɔn ga lɛɛ n kwɔ́ɔ, mɛ̀ɛ́ pe a gbǎn ní wi see bi sɛ́ɛ? A wi a gbǎn ní jée lé wi nɔ́ɔw láʔa ni pe ní wi see taʔa?»

⁵ A Zyezu wi yari: «Mii a tɔ̀nɔ́ gi joo mɔ ma kányɛʔɛ ni, kapye pe ga syɔ́ɔnwee see lǒgi ní Pìicǎnni báriga ni lè í, wi a gbǎn jée Kolocɔlɔɔ fǎngi ni í.

⁶ Céri ga wee see lè, wee bee i nyɛ cere, Pìicǎnni ga wee see lè, wee bee i nyɛ pìle.

⁷ Amɛɛ mii jo lè ki n yɛlɛ be yele séli see kavɔn, mɔ a kɔ́ gi yaʔa gi mɔ fúngi wɔ́ɔ í.

⁸ Káfalagi i funu ni syée tɛ́ɛgee ga gi dɛ́nɛ lè, mɔ n ni gi funumi lúro. Kàjáa mɔ a gi tɛɛyìrige cán í, mɔ a wɔ́ɔ gi tɛɛ̀káriga cán í. Anbée si gi wɔ́ɔ̄ nyɛ syɔɔn ma, wee Pìicǎnni see lè.»

⁹ A Nikodɛmi jo: «Mɛ̀ɛ́ kérigèle bee a gbǎn pye bi sɛ́ɛ?»

¹⁰ A Zyezu wi yari: «Mɔ i nyɛ Isirayɛli ye tamafɔw, mɔ si ga sèʔê kérigèle bee cán lé í?

¹¹ Mii a tɔ̀nɔ́ gi joo mɔ ma kányɛʔɛ ni, gee wolo cán lè, koro wolo nyuu, gee wolo wɔ́ɔ̀ nyaa lè, koro séeraw wolo kpéʔele. Koro ní ki myɛ ní yele si ga sèʔê tága wolo séeraw na í.

¹² Amɛɛ mii nyuu ní yele ní lè tári kèlē na, yele si ga tága í, á mii ga ni nyuu ní yele ní nyɛ̀ʔɛni wòʔolo na, mɛ̀ɛ́ yele a gbǎn tága bi sɛ́ɛ?

¹³ Syɔɔn faala ga kɔ́ɔ̀ lúgu yaà nyɛ̀ʔɛni na í, kapye wee ban wi yìri lè nyɛ̀ʔɛni na n tìgi naa tári na í, woro wi nyɛ Syɔɔn-pya, wee wi nyɛ lè nyɛ̀ʔɛni wóo.

¹⁴ Kánmee na Mowizi da wàbigi yìrige lè fìími tára ni, ànbée gi wɔ́ɔ̀ yɛlɛ be Syɔɔn-pya yìrige,

¹⁵ koro ga pye syɔ́ɔnwee faala wi ga tága lè wi na, woro í sìibangwɔɔw taa.

¹⁶ Dulunyanw syɛ̀ɛnnɛ kéele n tɔ̀nɔ n Kolocɔlɔɔ dɛ́nɛ gee bee na wi wi Pìinibingi kaan, jàngó syɔ́ɔnwee faala wi ga tága lè wi na, wee bee a ní kùu í, kàjáa wi a sìibangwɔɔw taa.

¹⁷ Níì cán Kolocɔlɔɔ ga wi Jáaw tun dulunyanw ni jàngó wi ba kútii kúun dulunyanw syɛ̀ɛnnɛ na í, kàjáa wi n wi tun, koro ga pye dulunyanw syɛ̀ɛnnɛ í ba syɔɔ wi bárigaw ni.

¹⁸ Wee wi ga tága lè wi na, wee bee tɔ́lɔgɔ o nyɛ kútiiw ni í. Wee si wi lè wi ga tága wi na í, kútiiw n kúun n kwɔ́ɔ wee bee na, níì cán wi ga tága Kolocɔlɔɔ Jáaw nibin mɛ́ʔɛ na í.

¹⁹ Wee naa wi nyɛ kútiiw, gbɛ̀ɛ́nmi n pan dulunyanw ni, koro ní ki myɛ ní a yébilimi baa syɛ́ɛnbèle dɛ́nɛ n sɔ̀lɔ gbɛ̀ɛ́nmi na, níì cán be kapyegèle ga nyɔɔ í.

²⁰ Syɔɔn o syɔɔn wi kapeegèle kpéʔele lè, gbɛ̀ɛ́nmi ga wee bee dɛ́nɛ nyáana í, wi o yirigi gbɛ̀ɛ́nmi na jàngó syɛ́ɛnbèle í kɔ́ woro kapyegèle nyaa í.

²¹ Kàjáa wee wi ga pye lè kányɛʔɛ na, woro wi yirigi gbɛ̀ɛ́nmi na, koro ga pye syɛ́ɛnbèle í woro kapyegèle nyaa, si gi cán bi cán woro i ge kpéʔele Kolocɔlɔɔ bárigaw ni.»

Zyezu ní Zyan

²² Koro kàdoʔo ma a Zyezu ní wi pìitamabèle kári Zyude tári ma. A wi sáà kòro yaà ní be ní ni syɛ́ɛnbèle batize.

²³ Zyan maa wɔ́ɔ̀ pye ni syɛ́ɛnbèle batize Enɔ ma saliimi taana, níì cán lǒgi maa nɛʔɛ yaà. A syɛ́ɛnbèle i syée yaà wi ma, a wi sa ni be batize.

²⁴ Níì cán pe da kɔ́ɔ̀ Zyan le kàsow ni lǎli bee ni í.

²⁵ Zyan pìitamabèle pèle ní Zyefuwaa si maa ni peyɛɛ gábala peyɛɛ jéemununi kéele na.

²⁶ A be kári Zyan ma n sáà wi pye: «Tamafɔw, wéle, wee wi da pye lè ní mɔ ní Zyuridɛnw jelige na, á mɔ séeraw kpéʔele wi kéeli na lè, wi i yaà ni syɛ́ɛnbèle batize, a pe myɛ i syée yaà wi ma.»

²⁷ A Zyan be yari: «Syɔɔn a gbǎn yarigaa taa í, kapye ki ga yìri nyɛ̀ʔɛni na n baa kaan wi ma í.

²⁸ Yele tiimaa i nyɛ mii séera, àmɛɛ mii gi joo lè níì jo mii ban wi nyɛ Kirisi í, a pe da mii tun wi yɛʔɛ̀ ma wii.

²⁹ Wee má cefɔnw nyɛ lè, woro wi céw fɔ́lɔ. Kàjáa céw bee fɔ́lɔ tàannyɛnnɛ wi nyɛ wi taana lè, ní i líiyi cáan wi ma, fundaangbɔɔrɔ i nyɛ wee bee ma cefɔnw fɔ́lɔ syɛɛnjóoro báriga ni. Fundaanri bee si di nyɛ mii ni n foro.

³⁰ Ki n yɛlɛ kàa í da taari woro na, kàa sáā yirigi mii ni.

Wee wi yìri nyɛ̀ʔɛni na lè

³¹ «Wee wi yìri lè nyɛ̀ʔɛni na n pan, woro wi nyɛ syɛ́ɛnbèle myɛ nyúngo na. Wee wi naa lè tári na, wee bee i nyɛ tári wóo, ní wɔ́ɔ i tári kèlē nyuu. Wee si wi yìri lè nyɛ̀ʔɛni na, woro wi nyɛ pe myɛ nyúngo na,

³² gee wi nyaa lè ní gee wi lóʔo lè, gee bee séera wi kpéʔele, koro ní ki myɛ ní syɔɔnwaa faala o fɔ̀lɔ́ wi séeraw na í.

³³ Wee si wi fɔ̀lɔ wi séeraw na lè, wee bee n gi cán Kolocɔlɔɔ wi nyɛ kányɛɛgi fɔ́lɔ.

³⁴ Wee Kolocɔlɔɔ tun lè, woro wi Kolocɔlɔɔ syɛ́ɛnri nyuu, níì cán Kolocɔlɔɔ i Pìicǎnni kaangi tɛɛ̀laʔala fun.

³⁵ Jaafɔw kéele n Tofɔw dɛ́nɛ, a wi yáriri myɛ le wi kɔ́yi ni.

³⁶ Syɔ́ɔnwee wi tága lè Jaafɔw na, sìibangwɔɔw i nyɛ wee bee ma. Wee si wi lè wi ga tága wi na í, woro a sìíw bee nyaa í, kàjáa Kolocɔlɔɔ fundanʔari n kòro wi na.»