Zyan 20 - Cebaara Bible 2010

Nyángi i nyɛ wowaʔa ní

¹ Cégbooli cânzélige nyɛʔɛ nyɔ́ɔ na sáni gbɛ̀ɛ́nmi í cèlege lè, a Marii kári nyángi ma wi lè Magidala ye wów. A wi sáà gi nyaa a be kàdɛnɛgi kòlogo n láʔa nyángi na.

² A wi fàn n kári n sáà gi joo Siimɔn Pyɛri ma n fàra pìitamaw na, wee kéele li da Zyezu dɛ́nɛ lè, níì be pye: «Pe n Kàfɔw yirige nyángi ni, tɛ́ɛgee ni be wi tɛ́ʔɛ lè, wolo ga gi cán í.»

³ A Pyɛri ní pìitamaw bee fala n kári nyángi ma.

⁴ Pe maa pínɛ ni fé ni syée. A pìitamawee fàn n Pyɛri sɔ́lɔgɔ n sáà nan nyángi na wozeliw.

⁵ A wi lɛ̀ɛlɛ n wéle n fànibèle nyaa yaà wojáanbéle ní, wi si ga jée yaà í.

⁶ Siimɔn Pyɛri wi da taʔa wi na lè a woro nan níì fala n jée nyángi ni n sáà fànibèle nyaa wojáanbéle ní.

⁷ Fàniwee pe da tɛ́ʔɛ n wi nyúngi pwɔɔ lè, woro da pye ní bele ní tɛɛnijanga ni í, wi maa pye woguru-jáaɔn ní kɔlɔ̀ na.

⁸ Lǎli bee ni pìitamawee wi da sélì nan yaà lè nyángi na, a wee bee wɔ́ɔ̀ jée yaà n sáà nyaa níì tága.

⁹ Níì cán pe da kɔ́ɔ̀ Kolocɔlɔɔ syɛɛnsɛbɛri kɔ́rɔ cán lǎli bee ni í, dee di joo lè fwɔɔ Zyezu í nyán yiri kúbèle nínge ni.

¹⁰ Koro kàdoʔo ma a pìitamabèle lúru n kári be kpáayi ma.

Zyezu n wiyɛɛ dɛ̀ɛn Marii na, wi lè Magidala ye wów

¹¹ Kàjáa Marii maa yére kàfugi na nyángi taana ni nyaan. Amɛɛ wi nyaan lè, a wi kɔ́ɔ̀ lɛ̀ɛlɛ n wéle nyángi ni,

¹² a wi nyɛ̀ʔɛni tundunbèle pèle siin nyaa wodɛ́ɛnbéle ní ní buroviiye ní, beè pe da Zyezu kúceri sínɛgɛ lè, wàa maa pye nyǔngi kàbaan na, wee si i nyɛ tɔ́lɔyi kàbaan na.

¹³ A bele bee wi yíbe níì jo: «Cɔlɔɔ mɔ, nyàʔá na mɔ nyaan?» A wi be pye: «Pe n mii Kàfɔw láa n yirige, mii si ga wi tɛɛ̀tɛʔɛgi cán be ma í.»

¹⁴ N wi yaʔa syɛ́ɛnri bee joolo na, a wi kàri n wéle n Zyezu nyaa woyéreo ní, wi si ga cán Zyezu wii í.

¹⁵ A Zyezu wi pye: «Cɔlɔɔ mɔ, nyàʔá na mɔ nyaan? Wìí mɔ caa?» A Marii i sɔ̀ngí nángwɔɔw fɔ́lɔ wii, a wi wi pye: «Ni kàfɔlɔ, kapye mɔ wi wi láa n sáà tɛ́ʔɛ tɛɛgaa ni, mi tɛ́ɛgi tɛ̀ɛn mii na, mii í sa wi láa.»

¹⁶ A Zyezu wi pye: «Marii.» A wi fíige n joo ní wi ní Heburu-syɛ́ɛnri ni níì jo: «Arabii,» (ki kɔ́rɔw wi nyɛ, Tamafɔw.)

¹⁷ A Zyezu wi yari: «Mɔ a kɔ́ mii cǒ yérige í, níì cán mii ga kɔ́ɔ̀ lúgu n kári Tofɔw ma í. Kàjáa da syée mi sa mii senyɛnbèle pye: Mii a lúgu kári mii Tóow ma, wi lè yele Tóow, woro wee wi lè mii Kolocɔlɔw, ní wɔ́ɔ i nyɛ yele Kolocɔlɔw.»

¹⁸ A Marii Magidala ye wów pan n baa gi joo pìitamabèle ma níì jo: «Mii n Kàfɔw nyaa.» Kérigèle gele wi joo wi ma lè, a wi ge joo be ma.

Zyezu n wiyɛɛ dɛ̀ɛn wi pìitamabèle na

¹⁹ Cángi bee wonijanga cângwɔʔɔ nyɔ́ɔ na, gi pye lè cégbooli cânzelige, a pìitamabèle peyɛɛ gbóʔoro kpaagaa ni níì kɔ̀riyi sɔ̀ʔɔ peyɛɛ na Zyefubèle yɛ́ʔɛ fyáara kéele na. A Zyezu pan n baa jée n yére be níngi ni níì be pye: «Kolocɔlɔɔ í fûnnyingi kaan yele ma!»

²⁰ A wi ga dee bee joo n kwɔ́ɔ, a wi wi kɔ́yi ní wi lɛ̀ʔɛli tɛ̀ɛn be na. A pìitamabèle ga Kàfɔw nyaa, a be fala ni fundaanra kpéʔele gbanʔama.

²¹ A Zyezu níì be pye: «Kolocɔlɔɔ í fûnnyingi kaan yele ma! Amɛɛ Tofɔw da mii tun lè, ànbée mii wɔ́ɔ̀ yele tun.»

²² A wi ga dee bee joo n kwɔ́ɔ, a wi ŋɔ́n n wáa be na níì jo: «Ye Pìicǎnni syɔɔ lee.

²³ Bele kapeegéle kusulugo yele ga syɔɔ lè, ke kùsulugi n wɔ́ɔ̀ syɔɔ. Yele si ga bele wòʔolo kusulugo cée lè, ke n kòro be na.»

Zyezu ní Toma

²⁴ Kàjáa Toma pe wɔ́ɔ̄ yiri lè Didimi, wi maa pye pìitamabèle kɛɛ ní siin ni, wee bee si da pye yaà ní be ní lǎli ni Zyezu pan lè í.

²⁵ Koro na wi pìitamanyɛnbèle baa gi joo wi ma níì jo: «Wolo n Kàfɔw nyaa.» A wi be yari: «Mii ga tɔ̀nɔ n pye mii ga pɔ́ndiibèle fɛ̀ɛbēle nyaa wi kɔ́yi na í, ní wɔ́ɔ̀ mii kabeli le pɔ́ndiibèle tɛɛ̀kóriyo ni í, níì mii kɔ́gi le wi lɛ̀ʔɛli ni í, mii a tɔ̀nɔ́ tága gi na í.»

²⁶ A canya kɔrɔtaanri ga sɔ̀lɔ, koro n gi taa pìitamabèle maa níì peyɛɛ gbóʔoro kpáagi ni, Toma si i yaà ní be ní cángi bee. A Zyezu baa jée n yére be níngi ni bi gi taa kɔ̀riyi maa pye wozɔʔɔyɔ ní, níì jo: «Kolocɔlɔɔ í fûnnyingi kaan yele ma!»

²⁷ Ní náà Toma pye: «Mɔ kabeli taʔa naa nɛɛ, mii kɔ́yi wéle, mí wɔ́ɔ mɔ kɔ́gi le mii lɛ̀ʔɛli ni. Ki ga yɛlɛ mɔ í kòro sìndagali ni í, ki n yɛlɛ mi tága!»

²⁸ A Toma wi yari: «Mii Kàfɔw, ní mii Kolocɔlɔw!»

²⁹ A Zyezu wi pye: «Amɛɛ mɔ mii nyaa lè, koro na lé mɔ náà tága? Bele si be tága lè sìnnyaa ni, poro i nyɛ dùba pìibēle.»

Sɛ́bɛw naa sɛ́bɛlɛ nyúngo

³⁰ Zyezu maa níì kakpoloyaa saʔa kpéʔele wi pìitamabèle nyɛ́nɛ na, yi myɛ ga sɛ́bɛ sɛ́bɛw naa ni í.

³¹ Kàjáa kérigèle naa n sɛ́bɛ koro ga pye yele í tága gi na, bi cán Zyezu wi nyɛ Kirisi, Kolocɔlɔɔ Jáaw, jàngó yele ga tága kánmi bee na, yele í sìi taa wi mɛ́ɛgi na.