Zyan 2 - Cebaara Bible 2010

Cèpɔrigi gi pye lè Kana ma

¹ A canya siin ga kwɔ́ɔ, taanri wógi na a be i cèpɔrigɔ kpéʔele Kana ni, ki lè Galile tári ni. Zyezu nɔ́ɔw si maa pye yaà cèpɔrigi tɛ́ʔɛ ni.

² A be wɔ́ɔ̀ Zyezu ní wi pìitamabèle yeri cèpɔrigi bee na.

³ Lǎli ni dùvɛɛnw kólogo lè, a Zyezu nɔ́ɔw sáà wi pye: «Dùvɛɛnw n kwɔ́ɔ syɛ́ɛnbèle ma.»

⁴ A Zyezu wi yari: «Cɔlɔɔ mɔ, gee mii a kpéʔele lè, mɔ lé be joo mɔ í náa gi joo mii ma? Lǎli ga kɔ́ɔ̀ nan mii ma í.»

⁵ Lǎli bee ni a wi nɔ́ɔw fala n gi joo falipyebèle ma níì jo: «Yárigee faala wi ga kɔ́ɔ̀ jo yele í kpéʔele lè, ye gi kpéʔele.»

⁶ Zyefubèle si maa kasàngēle kɔrɔni tɛ́ʔɛ yaà peyɛɛ jéemununi kéele na n yɛlɛ ní be sériw kalɛɛlɛ ní, pe maa ge faan ní kàdɛnɛviire ní, lítiribéle dabata maa ni jǐn li làa nibin ni li náa nyìn,

⁷ A Zyezu falipyebèle pye: «Ye lɔ̀ʔɔ kóo ye le kasǎngèle naa ni ge nyìn.» A be gi kóo n le ge ni, a ge nyìn n baa nan nyɔɔwari na.

⁸ A Zyezu níì be pye: «Ye kàa kóo tɔ́ɔliw ni ye sa kaan cèpɔrigi lìile lɛɛfɔlɔ ma.» A be gi kóo n sáà kaan wi ma.

⁹ A lìíli lɛɛfɔlɔ lǒgi gbaa n wéle n gi nyaa a gi kàri dùvɛɛn. Wi si ga dùvɛɛnw bee tɛɛyìrige cán í, kàjáa falipyebèle pe da lǒgi kóo lè, poro maa wi tɛɛyìrigi cán. A wi cefɔnw nàɔn yeri

¹⁰ ní baa wi pye: «Syɛ́ɛnbèle myɛ i sélegi dùvɛɛntàánw na ni kaangi gbɛnʔɛnɛ syɛ́ɛnbèle ma, pe ga baa gbaa a nyǔnyi kàri be na, pe n náa ni wobɛɛnw kaangi be ma. A mɔ si wodaanw yaʔa ní náà wi kaan tɔ́ɔliw ni.»

¹¹ Gee naa gi pye Zyezu kakpɔɔseligi, wi n gi kpéʔele Kana ni, gi lè Galile tári kègaa, n wi nìjangbɔɔri tɛ̀ɛn syɛ́ɛnbèle na. A wi pìitamabèle tága wi na.

¹² Koro kàdoʔo ma a wi náà kári Kapɛrinayumi ma, woro ní wi nɔ́ɔw ní n fàra wi cɔnɔbèle ní wi pìitamabèle na. A be sáà canyaa kwɔ́ɔ yaà.

Zyezu n jée kpɔ̀ʔɔrɔli kpaʔa kàcoolo ni

¹³ A Zyefubèle Sɔ̀lɔ-mí-yaʔali séri canʔa ga nùuni, a Zyezu kári Zyerusalɛmi ma.

¹⁴ A wi sáà syɛ́ɛnbèle nyaa a be i nǐyi, ní bǎbèle, ní kàtogèle pára yaà kpɔ̀ʔɔrɔli kpaʔa kàcoolo ni, ní wɔ́ɔ̀ wálifalibèle nyaa yaà wodɛ́ɛnbéle ní.

¹⁵ A wi mɛɛnnɛ tìin sapile n tɛ́ʔɛ n pe myɛ nɛnɛ n yirige kpɔ̀ʔɔrɔli kpaʔa kàcoolo ni, n fàra pe bǎbèle ní be nǐyi na, ní wɔ́ɔ̀ wálifalibèle wáli láa n wo, níì be tàbalibèle ŋɔrigɔ n cáan cáan.

¹⁶ Níì kàtopárabèle pye: «Ye yele yáriri bee yirige nɛɛ naa, ye a kɔ́ mii Tóow kpaʔa kàriga cédaala í.»

¹⁷ A wi pìitamabèle fala n sɔ̀ngi n taa syɛ́ɛnri naa na di sɛ́bɛ lè Kolocɔlɔɔ syɛɛnsɛbɛri ni níì jo: «Mɔ kpáagi tàmaga kéele n mii lìi.»

¹⁸ A Zyefubèle wi pye: «Nyàʔá kakpɔɔfelege mɔ a kpéʔele tɛ̀ɛn wolo na, koro ga pye wolo í gi cán kɔ́rɔwee na mɔ kéeli naa kpéʔele lè?»

¹⁹ A Zyezu be yari: «Yele ga kpɔ̀ʔɔrɔlɔ kpáagi naa cáan, mii a gi yìrige bi faan canya taanri nínge ni.»

²⁰ A Zyefubèle wi pye: «Ee, pe n yɛ̀ʔɛlɛ togoye siin ní kɔrɔni kwɔ́ɔ kpɔ̀ʔɔrɔlɔ kpáagi naa faanna na, mɔ si kɔ́ ba gi faan kwɔ́ɔ lé canya taanri nínge ni?»

²¹ Kàjáa kpɔ̀ʔɔrɔli kpaʔa kéele wi joo lè, wi tiimaa céri kéele wi da joo ànbée.

²² Lǎli ni Zyezu baa nyán n yiri kúbèle nínge ni lè, a wi pìitamabèle náà gi sɔ̀ngi n taa ncan gee bee wi da joo, a be tága Kolocɔlɔɔ syɛɛnsɛbɛri na n fàra Zyezu wojoori na.

Zyezu n syɔɔn sɔ̀nguri myɛ cán

²³ Lǎli ni Zyezu pye lè Zyerusalɛmi ni Sɔ̀lɔ-mí-yaʔali séri na, a syɛ̀ɛnnɛ saʔa ga wi kakpoloyi nyaa, a be fala n tága wi mɛ́ɛgi na.

²⁴ Kàjáa Zyezu da tága be na í, níì cán wi maa syɛ́ɛnbèle myɛ fúnyo cán.

²⁵ Wi màko da pye gi na wàa í syɛ́ɛnbèle kéele tɛ̀ɛn woro na í, níì cán wi n syɔɔn fúngi sɔ̀ngurɔ cán.