Zyan 18 - Cebaara Bible 2010

Zyezu cǒli kéele

¹ Lǎli ni Zyezu syɛ́ɛnri bee joo n kwɔ́ɔ lè, a wi sáà Sedurɔn lókologi jeli ní wi pìitamabèle ní, kɔligɔ maa pye yaà nɛɛ bee, a wi sáà jée gi ni ní be ní.

² Zyudasi wi nyɛ lè wi levɔw wi nigoobèle kɔ́yɔ ni, woro maa wɔ́ɔ̀ tɛ́ɛgi bee cán, níì cán Zyezu ní wi pìitamabèle maa ni peyɛɛ gbóʔoro yaà tɔlɔyɔ saʔa.

³ A Zyudasi sùlasiibèle, ní gáridibèle kɔ́ri n kári yaà, sáriga-wòlobèle kàfɔɔlɔ, ní Farisibèle pe da be tórigo ní wi ní, fètingéle, ní nìmubwɔɔgéle, ní kapɛɛnkpumɔn-yárira maa pye be ma.

⁴ Zyezu si maa gi cán gee myɛ ki a ba kpéʔele woro na lè, koro na wi sɛ̀ʔɛrɛ yaà be ma n sáà be yíbe níì jo: «Wìí yele caa?»

⁵ A be wi yari: «Zyezu wolo caa, wi lè Nazarɛti ye wów.» A Zyezu be pye: «Mii wi wee.» Zyudasi maa wɔ́ɔ̀ pye ní be ní woyéreo ní, woro wee wi nyɛ lè wi levɔw wi nigoobèle kɔ́yɔ ni.

⁶ Amɛɛ Zyezu be pye lè: «Mii wi wee,» a be tàra n lúru kàdoʔo ma n too tári na.

⁷ A wi níì be yíbe níì jo: «Wìí yele caa?» A be wi yari: «Zyezu wolo caa, wi lè Nazarɛti ye wów.»

⁸ A Zyezu be yari: «Jo mii n gi joo yele ma níì yele pye, mii wi wee. Koro na kapye mii yele caa, ye bele naa yaʔa paa syée.»

⁹ (Wi n gee bee joo koro ga pye wi syɛ́ɛnri í gbǎn foro, dee wi da joo lè níì jo: «Bele mɔ kaan mii ma lè, pe wàa nibin ga pùuni í.»)

¹⁰ Ŋɔsée maa pye Siimɔn Pyɛri ma, a wi wi kɔ́n n sáriga-wòlobèle kàfɔgbɔɔɔ falipyeo kpúmɔn n kàliige líiwagi láʔa wi na. Pe i falipyew bee yiri Malikusi.

¹¹ A Zyezu Pyɛri pye: «Mɔ ŋɔséew le kpàfogi ni. Mɔ ga cán yagbaagi Tofɔw kaan mii ma lè, mii n yɛlɛ bi gi gbaa ì?»

Pe n kári ní Zyezu ní Ana ma

¹² Lǎli bee ni a sùlasiibèle, ní be kàfɔgbɔɔw, ní Zyefubèle gáridibéle fala n Zyezu cò n pwɔɔ.

¹³ A pe ga wi pwɔɔ n kwɔ́ɔ, a be kári ní wi ní Ana ma gbɛnʔɛnɛ. Ana wi da pye Kayifu céw tóo, Kayifu si i nyɛ sáriga-wòlobèle kàfɔgbɔɔɔ yɛ́ɛli bee ni.

¹⁴ Kayifu wi da Zyefubèle sàmi níì jo ki n yɛlɛ nàɔn nibin í kùu syɛ́ɛnbèle sìndɛʔɛ ni.

Pyɛri n gi kábala níì jo woro o nyɛ Zyezu pìitamawaa í

¹⁵ A Siimɔn Pyɛri taʔa Zyezu na, ní pìitamawaa nikwɔɔ ní. Sáriga-wòlobèle kàfɔgbɔɔɔ si maa pìitamaw bee cán, a wi fala n jée ní Zyezu ní sáriga-wòlobèle kàfɔgbɔɔɔ kacoolo ni.

¹⁶ Pyɛri si maa yére kàfugi na kpàánweeli taana, koro na pìitamaw bee yiri kàfugi na, wi lè sáriga-wòlobèle kàfɔgbɔɔɔ cánvɔlɔ, n sáà joo ní pìcaaw ní, wi lè kpàánweeli wélefɔlɔ, a wi Pyɛri lége.

¹⁷ Pìcaaw bee wi lè kpàánweeli wélefɔlɔ a woro Pyɛri pye: «Mɔ wɔ́ɔ o nyɛ nǎnw bee pìitamawaa ì?» A Pyɛri wi yari: «Eʔe, mii o nyɛ wee bee wàa í.»

¹⁸ Falipyebèle ní gáridibèle si maa yére kànʔana náa taana ni waari, níì cán wéeri maa ni kúu. A Pyɛri wɔ́ɔ sáà yére be taana ni waari.

Sáriga-wòlobèle kàfɔgbɔɔɔ n Zyezu yíbe

¹⁹ A sáriga-wòlobèle kàfɔgbɔɔɔ Zyezu yíbe wi pìitamabèle, ní wi tamani kéele na.

²⁰ A Zyezu wi yari: «Mii maa ni mii syɛ́ɛnri nyuu syɛ́ɛnbèle myɛ nyɛ́nɛ na, ní i syɛ́ɛnbèle tama làla o làla sérikpaayi ni, ní kpɔ̀ʔɔrɔli kpaʔa ni, beè Zyefubèle myɛ peyɛɛ gbóʔoro lè. Mii da ni yarigaa nyuu làrama ni í.

²¹ Nyàʔá na mɔ mii yíbe? Mii syɛɛnloʔobèle yíbe. Wéle, dee mii da ni nyuu lè, bele bee n di cán.»

²² A wi ga dee bee joo, gáridibèle be pye yaà lè woyérebéle ní, a bele bee wàa wi kpúmɔn ní kadaala ní níì jo: «Mɛ̀ɛ́ gi nyɛ mɔ si i nyuu kánmi bee na ní sáriga-wòlobèle kàfɔgbɔɔɔ ní?»

²³ A Zyezu wi yari: «Kapye syɛɛnpeere mii joo, ki maa yɛlɛ mɔ í syɛ́ɛnri bee tɛ̀ɛn dee mii joo a di pee lè. Ki si ga pye syɛɛncanra, nyàʔá na mɔ mii kpúmɔn?»

²⁴ Gee bee na Ana wi yaʔa wobwɔɔɔ ní níì wi tórigo Kayifu ma, wi lè sáriga-wòlobèle kàfɔgbɔɔɔ.

Pyɛri n níì Zyezu cée

²⁵ Siimɔn Pyɛri si maa sèʔê pye yaà woyéreo ní ni náagi waari, a be wi pye: «Mɔ wɔ́ɔ o nyɛ wi pìitamawaa ì?» A wi gi kábala níì jo: «Mii o nyɛ wee bee wàa í.»

²⁶ Wee líige Pyɛri da ceri n láʔa lè, wi senyɛnwaa maa pye sáriga-wòlobèle kàfɔgbɔɔɔ falipyewaa, a wee bee jo: «Mii ga tɔ̀ʔɔ̂ mɔ nyaa kɔ́ligi ni ní wi ní ì?»

²⁷ A Pyɛri níì gi kábala. A gòpɔ́w fala n nyɛni.

Pe n kári ní Zyezu ní Pilati ma

²⁸ A be yiri Kayifu tɛ́ɛgi ni n kári ní Zyezu ní fànʔafɔw tɛɛkòrogo ma, ki maa pye nyǐngi nyɔ́ɔ na. Pe ga fɔ̀lɔ n jée fànʔafɔw tɛɛkòrogo ni í, ní i sɔ̀ngí poro a kɔ́ nɔ́nʔɔ, níì cán pe maa ni caa bi Sɔ̀lɔ-mí-yaʔali séri lìile lìi.

²⁹ Koro na Pilati yiri kàfugi na be ma n baa be yíbe níì jo: «Keelìí na yele pan ba kútiiw kúun nǎnw naa na?»

³⁰ A be wi yari: «Kapye nǎnw naa da pye kapeebyeo í, wolo mǎà dée ba wi le mɔ kɔ́yi ni í.»

³¹ A Pilati fala n be pye: «Yaa syée ní wi ní, ye sa kútiiw kúun wi na bi yɛlɛ ní yele làlwaw ní.» A Zyefubèle wi pye: «Ki fǎngi o nyɛ wolo ma wolo í gbǎn syɔɔn faala kpóo í.»

³² Gee bee n kpéʔele koro ga pye gee Zyezu da joo wi kùuganmi kéele na lè, gee bee í foro.

³³ A Pilati níì jée wi kútiijoo-tɛ́ɛgi ni, níì Zyezu yeri n sáà yíbe níì jo: «Mɔ lé wi nyɛ Zyefubèle fànʔafɔlɔ?»

³⁴ A Zyezu wi yari: «Mɔ lé wi gee bee sɔ̀ngi n joo miyɛɛ ma láà ba fwɔɔ pèle be mii kéeli joo n tɛ̀ɛn mɔ na?»

³⁵ A Pilati wi yari: «Zyefuwaa lé mii nyɛ? Mɔ tári wòolo ní sáriga-wòlobèle kàfɔɔlɔ pe mɔ le mii kɔ́yi ni. Nyàʔá mɔ kpéʔele?»

³⁶ A Zyezu wi yari: «Mii fǎngi o nyɛ dulunyanw naa wóʔo í. Mii fǎngi ga maa pye dulunyanw naa wóʔo, mii falipyebèle mǎà dée kapɛɛnni kpúmɔn mii kéeli na koro ga pye wàa a kɔ́ mii le Zyefubèle kɔ́yɔ ni í. Kàjáa tɔ́ɔliw ni mii fǎngi o nyɛ dulunyanw naa wóʔo í.»

³⁷ A Pilati wi pye: «Ba fànʔafɔlɔ lé mɔ nyɛ?» A Zyezu wi yari: «Amɛɛ mɔ gi joo lè, ànbée gi nyɛ, mii i nyɛ fànʔafɔlɔ. Mii seeli nyúngo, ní mii kapanni nyúngo gi nyɛ dulunyanw ni bi ba ra kányɛɛgi séera kpéʔele. Syɔɔn o syɔɔn wi nyɛ lè kányɛʔɛfɔlɔ, wee bee i lúro mii ma.»

³⁸ A Pilati wi pye: «Nyàʔá gi nyɛ kányɛɛgi?» Syɛ́ɛnri bee joolo kadoʔo ma a wi níì yiri kàfugi na n baa Zyefubèle pye: «Mii ga tɛɛkolobile nyaa wi na í.

Pe n Zyezu kpóoli kútii ceri

³⁹ Kalɛɛlee si li nyɛ yele ma lè, lee li lè, Sɔ̀lɔ-mí-yaʔali séri ga nan mii n kàsolewaa yirige n yaʔa yele ma lè, a yele i caa lé mii í Zyefubèle fànʔafɔlɔ yirige bi yaʔa yele ma?»

⁴⁰ A be níì yákpogèle wáa níì jo: «Eʔe, woro ban í, Barabasi wolo caa.» Bi gi taa Barabasi maa pye kàyuu-fànʔafɔlɔ.