Zyan 16 - Cebaara Bible 2010

¹ A mii kérigèle naa joo yele ma wii, jàngó yele a kɔ́ lúru kàdoʔo ma í.

² Pe a kɔ́ ra yele nɛnɛ be sérikpaayi na. Alí làlaa a kɔ́ ba pye syɔɔnwaa ga yele wàa taa n kpóo, wee bee a ra sɔ̀ngí Kolocɔlɔɔ fáli woro kpéʔele nya.

³ Pe a ba ra kérigèle bee kpéʔele yele na níì cán pe ga Tofɔw cán í, pe ga wɔ́ɔ̀ mii cán í.

⁴ Kàjáa a mii kérigèle naa joo yele ma wii, koro ga pye lǎli bee ga kɔ́ baa nan yele í sɔ̀ngí taa gi na bi cán mii maa gi joo yele ma. «Mii da sélì kérigèle bee joo yele ma í, níì cán mii maa pye naa ní yele ní.

Pìicǎnni fáli kéele

⁵ Kàjáa tɔ́ɔliw ni mii a kári mii Tunvɔw ma, yele wàa nibin si ga caà mii pye lé, sán mɔ syée í?

⁶ Kàjáa yele fúnyi n curugo yele na n sɔ̀lɔ, àmɛɛ mii kérigèle naa joo yele ma lè.

⁷ Mii si a kányɛʔɛ joo yele ma, gee ki a pɔ́rɔ yele ma lè, koro gi nyɛ mii í kári, níì cán kapye mii ga kári í, Dɛ̀ɛmɛfɔw a pan yele ma í. Kàjáa mii ga kári, mii a wi tórigo naa yele ma.

⁸ Wi ga pan lǎlee ni lè, wi a ba gi tɛ̀ɛn dulunyanw syɛ̀ɛnnɛ na gee gi nyɛ lè kapeeli, ní sínni, ní kútiiw.

⁹ Wi a gi tɛ̀ɛn be na gee gi nyɛ lè kapeeli, koro gi nyɛ pe ga tága mii na í.

¹⁰ Si wɔ́ɔ gi tɛ̀ɛn be na gee gi nyɛ lè sínni, níì cán mii a kári Tofɔw ma, yele a ní mii nyaa í.

¹¹ Si ní gi tɛ̀ɛn be na gee gi nyɛ lè kútiiw, níì cán kútiiw n joo n ceri dulunyanw fànʔafɔlɔ na n kwɔ́ɔ.

¹² Kèlē saʔa sèʔé i nyɛ mii ma bi joo yele ma, kàjáa yele fánʔa a gbǎn taa ge na bi ge cán tɔ́ɔliw ni í,

¹³ fwɔɔ kányɛɛgi Pìle ga pan lǎlee ni lè, loro li a ba kíni yele yɛ́ɛgi na sáā kányɛɛgi myɛ tèé yele na. Níì cán li tiimaa syɛ́ɛnri ban li a ba ra nyuu í, fwɔɔ gee myɛ li lóʔo lè, gee bee li a ra nyuu, ní kérigèle gele ke a kɔ́ ba ra kpéʔele lè kàdoʔo ma, li a ba ra gele bee nyuu da fíligi yele ma.

¹⁴ Li a ba ra nìjangbɔɔri taari mii na, níì cán mii tiimaa kérigèle li a ba ra lée bàā nyuu da fíligi yele ma.

¹⁵ Gee myɛ gi nyɛ lè Tofɔw wóʔo, mii wóʔo wɔ́ɔ gii. Gee bee na mii jo li a ba ra mii tiimaa kérigèle lée bàā nyuu da fíligi yele ma.

Funbɛɛnri a ba kàri fundaanra

¹⁶ «Làlaa cɛɛri ga kwɔ́ɔ yele a ní mii nyaa í. Cɛɛri ga níì pye yele a ní mii nyaa.»

¹⁷ Lǎli bee ni a wi pìitamabèle pèle i gi nyuu peyɛɛ ma níì jo: «Gee wi joo wolo ma lè níì jo: ‹Làlaa cɛɛri ga kwɔ́ɔ yele a ní mii nyaa í, cɛɛri ga níì pye yele a ní mii nyaa,› nyàʔá gi nyɛ gee bee kɔ́rɔ? Ní àmɛɛ wi níì gi joo lè níì jo: ‹Mii a kári Tofɔw ma?› »

¹⁸ A be níì jo: «Cɛɛri-ga-pyew bee syɛ́ɛnrɛ wi joo lè, nyàʔá gi nyɛ gi kɔ́rɔw? Wolo ga gi kɔ́rɔw cán wi ma í.»

¹⁹ A Zyezu gi cán pe i caa bi woro yíbe, a wi be pye: «Gee mii joo lè níì jo: ‹Làlaa cɛɛri ga kwɔ́ɔ yele a ní mii nyaa í, cɛɛri ga níì pye yele a ní mii nyaa.› Gee bee na lé yele yeyɛɛ yíbe?

²⁰ Mii a tɔ̀nɔ́ gi joo yele ma kányɛʔɛ ni, yele a kɔ́ ba ra nyaan sáā yákpogèle wáa, dulunyanw syɛ̀ɛnnɛ si pye fundaanra na, yɛ́ɛyi a ba tanʔa yele na, kàjáa yele funbɛɛnri si a ba kàri fundaanra.

²¹ Fícɛnnɛ ga ni cɔlɔɔ yáa lǎlee ni lè, wi yɛ́ɛgi n tanʔa wi na, níì cán wi làrizeeli n nan. Wi si ga pìíw see n kwɔ́ɔ lǎlee ni lè, àmɛɛ wi syɛɛnfɔ́ɔn taa dulunyanw ni lè, wi n fɛ̀ʔɛ wi wɔʔɔli na fundaanri bee báriga ni.

²² Anbée si gi wɔ́ɔ̄ nyɛ yele ma, yele yɛ́ɛyi n tanʔa tɔ́ɔliw ni. Kàjáa mii a ní yele nyaa, lǎli bee ni fundaanra a náa pye yele ni, syɔɔn faala si a gbǎn yele fundaanri bee kálagi í.

²³ Cángi bee ga baa nan, yele a ní mii yíbe yarigaa na í. Mii a tɔ̀nɔ́ gi joo yele ma kányɛʔɛ ni, yele ga yárigee faala nyɛ́ɛri lè Tofɔw ma mii mɛ́ɛgi na, wi a gi kaan yele ma.

²⁴ Nlaa fwɔɔ n baa nan níjanʔa na, yele ga kɔ́ɔ̀ yarigaa nyɛ́ɛri mii mɛ́ɛgi na í. Yaa nyɛ́ɛri, yele a ra taagi koro ga pye yele fundaanri si foro.

Zyezu n dulunyanw jáa

²⁵ «Mii n kérigèle naa joo yele ma kàseegéle ni. Làlaa si i maa, li ga nan, mii a ní da yarigaa nyuu yele ma kàseegéle ni í, fwɔɔ mii a ra Tofɔw kéele nyuu da fíligi yele ma.

²⁶ Cángi bee na yele a ra nyɛ́ɛri mii mɛ́ɛgi na, mii si ga jo mii wi a ra Tofɔw nyɛ́ɛri yele kéeli na í.

²⁷ Níì cán yele kéeli n Tofɔw tiimaa dɛ́nɛ àmɛɛ mii kéeli yele dɛ́nɛ lè á yele wɔ́ɔ̀ tága gi na ncan Kolocɔlɔɔ má mii yìri.

²⁸ Tofɔw má mii yìri n pan dulunyanw ni. Tɔ́ɔliw ni mii si a ní yiri dulunyanw ni bi lúru kári Tofɔw ma.»

²⁹ A wi pìitamabèle wi pye: «Wéle, mɔ i syɛ́ɛnri fíligi ni nyuu tɔ́ɔliw ni. Mɔ ní o yarigaa faala nyuu kàseele ni í.

³⁰ Tɔ́ɔliw ni wolo n gi cán ncan mɔ n kérigèle myɛ cán, ki ní o nyɛ syɔɔn í mɔ yíbe keelaa faala na í. Gee bee na wolo tága gi na ncan mɔ n yìri Kolocɔlɔɔ ma.»

³¹ A Zyezu be yari: «Tɔ́ɔliw ni lé yele náà tága?

³² Ye wéle, làlaa i maa, li n caà nan n kwɔ́ɔ, lee ni yele a cariga lè, yele myɛ nibin nibin a kári yele kpaaya ma, si mii yaʔa mii nibin. Kàjáa mii o nyɛ mii nibin í, níì cán Tofɔw i nyɛ ní mii ní.

³³ A mii kérigèle naa joo yele ma wii, koro ga pye yele í fûnnyingi taa mii ni. Yele a wɔʔɔli taa dulunyanw ni. Kàjáa ki n yɛlɛ ye soro, níì cán mii n dulunyanw jáa.»