Zyan 10 - Cebaara Bible 2010

Bànaʔaw ní bǎbèle kàseele

¹ «Mii a tɔ̀nɔ́ gi joo yele ma kányɛʔɛ ni, syɔ́ɔnwee wi ga ni caa lè bi jée bàkpogi ni, wi si ga jée bàkpoweeli ma í, níì lúgu kàkɔlɔgi na n jée yaà, wee bee i nyɛ kàyuuo ní wɔ́ɔ i nyɛ kàyuu-fànʔafɔlɔ.

² Wee si wi jǐn bàkpoweeli ni lè, woro wi nyɛ bànaʔaw.

³ Wee bee má bàkpoweeli wélefɔlɔ bàkpogi múru, a bǎbèle wɔ́ɔ̀ wi yákpoli cán. Wi i wi tiimaa bǎbèle yiri mɛ́ɛyɛ na ní i be kɔ́ri ni yirigi bàkpogi ni.

⁴ Wi ga pe myɛ kɔ́ri n yirige n kwɔ́ɔ, wi n kíni pe yɛ́ɛgi na ni syée. Pe n taʔa wi na ni syée wi kurugo, níì cán pe n wi yákpoli cán.

⁵ Pe o téē taari nibɔɔn na í. Alí pe i fé nibɔnbèle na, níì cán pe ga be yákpogèle cán í.»

⁶ Syɛ́ɛnri naa Zyezu joo lè, kàseele wi da wáa be ma. Kàjáa gee wi joo be ma lè, pe ga gi kɔ́rɔw cán í.

Zyezu wi nyɛ bànaʔacǎnw

⁷ Gee bee na Zyezu níì be pye: «Mii a tɔ̀nɔ́ gi joo yele ma kányɛʔɛ ni, mii wi nyɛ bàkpoweeli.

⁸ Bele be pan lè mii yɛ́ʔɛ na, poro myɛ i nyɛ kàyuubēle, ní wɔ́ɔ i nyɛ kàyuu-fànʔafɔɔlɔ. Kàjáa bǎbèle da ni lúro bele bee wàa ma í.

⁹ Mii si wi nyɛ bàkpoweeli. Wee faala wi ga jée mii ni lè, wee bee a syɔɔ. Woro a ra jǐn sáā lúrugu da yirigi, sáā nyàácànga taagi da káa.

¹⁰ Kàyuuo kapanni nyúngo gi nyɛ kàyuugi, ní kpóoli, ní kálagili. Mii si n pan koro ga pye mii bǎbèle í ba sìi taa, sìíwee pe a taa lè wi pye be ma sìiteleo.

¹¹ Mii wi nyɛ bànaʔacǎnw. Bànaʔacǎnw si n yére gi ni bi kùu wi bǎbèle nyùnzyɔɔrɔ kéele na.

¹² Kàjáa syɔ́ɔnwee wi bǎbèle nàʔá lè sàra na, wi o nyɛ bànaʔateleo í, bǎbèle si wɔ́ɔ o nyɛ wi wòolo í, lǎlee ni wi ga kàsologo wéle n nyaa lè ki i maa, wi n bǎbèle yaʔa níì fàn. Kàsologi n ba ni be nɛnɛ ni có, pe n fàn n cariga.

¹³ Gee na wi fàn lè, koro gi nyɛ ncan wi i bǎbèle nàʔá sàra na. Pe kéeli ga téè wári wi na í.

¹⁴ Mii si wi nyɛ bànaʔacǎnw. Mii n mii bǎbèle cán, a mii bǎbèle wɔ́ɔ̀ mii cán,

¹⁵ àmɛɛ Tofɔw mii cán lè á mii wɔ́ɔ̀ Tofɔw cán. Mii n yére gi ni bi kùu mii bǎbèle nyùnzyɔɔrɔ kéele na.

¹⁶ Bǎbèle pèle si ní i yaà mii ma, pe o nyɛ bàkpogi naa wòolo í. Ki n yɛlɛ mii í wɔ́ɔ sa bele bee kɔ́ri pan. Poro a wɔ́ɔ ba mii yákpoli cán, lǎli bee ni pe myɛ a ba pínɛ pye bàtogo nibin, bànaʔaɔ nibin si wɔ́ɔ pye be na.

¹⁷ Kéelee na mii Tóow tàmagi le ní mii ní lè, loro li nyɛ àmɛɛ mii a niyɛɛ gaan kùúw ma lè, koro ga pye si ní niyɛɛ zyɔɔ wi ma.

¹⁸ Syɔɔn faala a mii kaan kùúw ma í, mii tiimaa wi yére gi ni bi kùu. Fànʔa i nyɛ mii ma bi niyɛɛ gaan kùúw ma, fànʔa si ní i nyɛ mii ma bi niyɛɛ zyɔɔ wi ma. Tundunri bee mii Tóow kaan mii ma níì jo mii í di kpéʔele.»

¹⁹ Amɛɛ Zyezu syɛ́ɛnri bee joo lè, a tílala níì jée Zyefubèle nínge ni.

²⁰ Pe pèle saʔa maa jo: «Màdeo i nyɛ wi ni, wi n cúro. Nyàʔá na yele lúro wi ma?»

²¹ A pèle jo: «Syɛ́ɛnri naa wi joo lè, màdebēle syɔ́ɔn fánʔa o nyɛ di na bi gbǎn di joo í. A màdeo a gbǎn fúunbéle paʔala lé?»

Zyefubèle n Zyezu cée

²² Pe maa ni kpɔ̀ʔɔrɔli kpaʔa kàlifaala fɛ́tii kpéʔele Zyerusalɛmi ma ki maa pye wéeri làla ni.

²³ A Zyezu sáà jée kpɔ̀ʔɔrɔli kpaʔa kàcoolo ni, ni nyaari Salomɔn kpáali láara ni.

²⁴ Lǎli bee ni a Zyefubèle fala n sáà wi màʔa, níì wi pye: «Làlìí ni mɔ a wolo fúnyi télege wolo na? Kapye mɔ wi nyɛ Kirisi, ki n yɛlɛ mi gi joo mi fílige wolo ma.»

²⁵ A Zyezu be yari: «Mii maa téè gi joo yele ma, yele si ga tága gi na í. Kérigèle gele mii kpéʔele lè mii Tóow mɛ́ʔɛ na, gele bee i mii séeraw kpéʔele.

²⁶ Yele si ga sèʔê tága í, níì cán yele o nyɛ mii bàala í.

²⁷ Mii bǎbèle n mii yákpoli cán, a mii wɔ́ɔ̀ be cán. Pe i taari mii na.

²⁸ Mii n sìibangwɔɔw kaan be ma. Pe a tée kùu bi nyaa í. Syɔɔn faala a gbǎn be kíle yirige mii kɔ́gi ni í.

²⁹ Mii Tóow wi be kaan mii ma lè, wi n kpɔ́ʔɔ n sɔ̀lɔ yáriri myɛ na. Syɔɔn si a wɔ́ɔ gbǎn be kíle yirige woro kɔ́gi ni í.

³⁰ Mii Tóow ní mii ní wolo i nyɛ nibin.»

³¹ Lǎli bee ni a Zyefubèle fala n níì kàdɛnɛrɛ jóo níì jo bi wi wábagi kpóo.

³² A Zyezu be yari: «Mii n kacàngēle saʔa kpéʔele yele nyɛ́nɛ na, gele ge yìri mii Tóow ma lè. Lìí si li nyɛ ge ni wobeeli, á ye jo ye a mii wábagi?»

³³ A Zyefubèle wi pye: «Kacǎngèle bee làa kéele na ban wolo jo wo a mɔ wábagi í, fwɔɔ Kolocɔlɔɔ mɛ́ɛgi kálagila kéele na. Níì cán mɔ wee wi nyɛ lè syɔɔn, mɔ n miyɛɛ gbéʔele Kolocɔlɔɔ.»

³⁴ A Zyezu be yari: «Ki o yaà wozɛbɛgɛ ní yele làlwaw sɛ́bɛ ni ì, àmɛɛ Kolocɔlɔɔ gi joo lè níì jo: ‹Yele i nyɛ kolocɔlɔbèlē›?

³⁵ Amɛɛ gi nyuu lè làlwaw sɛ́bɛ ni níì jo, bele na Kolocɔlɔɔ da wi syɛ́ɛnri tɛ̀ɛn lè, pe i nyɛ kolocɔlɔbèlē (wolo si n gi cán yafyɛn a gbǎn Kolocɔlɔɔ syɛ́ɛnri fàli í),

³⁶ mii wee Kolocɔlɔɔ nyɛ́nɛ n wòlo lè n tun naa dulunyanw ni, a yele baa jo, mii i Kolocɔlɔɔ mɛ́ʔɛ kálagi, ncan mii n jo mii i nyɛ wi jaà!

³⁷ Kérigèle mii kpéʔele lè, kapye yele n gi nyaa ke o nyɛ mii Tóow wòʔolo í, ye a kɔ́ tága mii syɛ́ɛnri na í!

³⁸ Yele si ga gi cán ncan mii Tóow kapyegèlē mii kpéʔele, àlí ki ga pye yele a tága mii syɛ́ɛnri na í, ki n yɛlɛ ye tága gele bee na, koro ga pye yele í gi fílige cán bi cán Tofɔw i nyɛ mii ni, mii si wɔ́ɔ i nyɛ Tofɔw ni.»

³⁹ Lǎli bee ni a be ní i caa bi Zyezu cò, kàjáa pe fanʔa ga taa í, a wi yiri be níngi ni,

⁴⁰ n lúru n kári Zyuridɛnw jelige na níìgēle, tɛ́ɛgee ni Zyan da sélì pye ni syɛ́ɛnbèle batize lè, n sáà kòro nɛɛ bee bi làlaa kwɔ́ɔ.

⁴¹ A syɛ̀ɛnnɛ saʔa i syée yaà wi ma. A bele bee i gi nyuu níì jo: «Alí Zyan da kakpɔɔgaa faala kpéʔele í. Koro ní ki myɛ ní, gee wi da ni nyuu lè nǎnw naa kéele na, ki myɛ tɔ̀nɔ́ i nyɛ kányɛʔɛ.»

⁴² A syɛ̀ɛnnɛ saʔa tága wi na nɛɛ bee.