Zyaki 5 - Cebaara Bible 2010

Lɔ́ri fɔ̀ɔlɔ samina kéele

¹ Yele bele ye nyɛ lè lɔ́ri fɔ̀ɔlɔ, yele ní mii a joo tɔ́ɔliw ni! Ki n yɛlɛ yaa nyaan yáā sùpiigèle wáa wɔʔɔli kéele na li maa ba too yele na lè!

² Yele lɔ́ri i nyɛ wovɔnʔɔrɔ ní, á fyɛɛnrɛ yele búroyi káa n fúrugu.

³ Tátɔɔnw n yele tɛ́ɛw ní yele wálifiiw cò. Tátɔɔnw bee a pye séera yele kánmi na, si wɔ́ɔ yele céri kálagi àmɛɛ naà gáà yarigaa sórigo n kálagi lè. Yele n lɔ́ri fàari n kɔn yeyɛɛ ma cányi naa ni yi nyɛ lè canzanyi!

⁴ Yaliilaabèle be yele séyi yaliire lée lè, á yele cée pe sàraw na, pe i yákpogèle wáa ní yele mɛ́ɛyi ní sàraw bee kéele na, a Kolocɔlɔɔ pe yákpowáari lóʔo, woro wee wi nyɛ lè Nyɛ̀ʔɛni Sùlasiibéle Kafɔlɔ.

⁵ Yele n kòro yele lɔgbɔɔri tàanma na ni líi naa tári na, ní i yele nyɛ́nɛ kérigèle kpéʔele, yele i líi ni sìnmɛ nii yeyɛɛ ni yele kálagili canʔa yɛ́ʔɛ na, àmɛɛ yaweere nyɛ lè dee pe gbóo lè di sìnmɛ le ti cângboogi yɛ́ʔɛ na.

⁶ Yele i kolomɔ kaangi syɛɛnsinbèle ma ní i be kúu, pe o yèré ni cáan ní yele ní í.

Kpàracogi ní nyɛ́ɛrigi kéele

⁷ Koro na ni senyɛ̀nnɛ, yaa Kàfɔw làribanna sige ní kpàracogo ní. Ye wéle àmɛɛ tèfalaɔ wi ségi yaliire sige lè ní kpàracogo ní bi taa zěseliyi ní zěsanyi í too di na lè, jàngó woro í yaliicànra taa.

⁸ Anbée gi wɔ́ɔ̀ yɛlɛ yele í da kpàracogo kpéʔele si nìrimɛ le yeyɛɛ ni, níì cán Kàfɔw làribanna n nùuni.

⁹ Ni senyɛ̀nnɛ, ki ga yɛlɛ yele í da tíri yeyɛɛ na í, koro ga pye Kolocɔlɔɔ kútiiw a kɔ́ too yele na í. Kútiijoow wi nan n kwɔ́ɔ wee kpaaweeli na.

¹⁰ Ni senyɛ̀nnɛ, ye sɔ̀ngi kanyaajoobèle kéele na, bele pe da ni nyuu lè Kàfɔw mɛ́ʔɛ na, ki n yɛlɛ yaa bele bee tɛ́ɛlɛ àmɛɛ pe da ni kpàracogo kpéʔele lè pe wɔʔɔli fúngo ni.

¹¹ Wéle, bele pe da ni wɔʔɔli kpàracó lè n baa nan li kwɔ́ɔmi na, wolo i be córo dùba pìibēle. Yele n Zyɔbi kéeli lóʔo àmɛɛ wi da kpàracogi kpéʔele lè wi wɔʔɔli fúngo ni. Yele n gi nyaa gee Kàfɔw kɔ́ baa kpéʔele wi ma lè ki kwɔ́ɔmi na, níì cán Kàfɔw fúngo n nyɔɔ gbanʔama, wi i nyinimɛ taagi syɛ́ɛnbèle na.

¹² Ni senyɛ̀nnɛ, gee gi kpɔ́ʔɔ n sɔ̀lɔ ki myɛ na lè, koro gi nyɛ, ki ga yɛlɛ yele í da kɛ̀ɛ́ nyɛ̀ʔɛni na wàlá tári na í, yele a kɔ́ kàli yarigaa faala na í. Yele ga joo kéelee na lè «ɛɛn,» ki n yɛlɛ ki pye kányɛʔɛ, yele ga wɔ́ɔ̀ joo kéelee na lè «eʔe,» ki n yɛlɛ ki wɔ́ɔ pye kányɛʔɛ, koro ga pye Kolocɔlɔɔ kútiiw si a kɔ́ ba too yele na í.

¹³ A wàa i nyɛ lé yele níngi ni ni wɔʔɔ? Ki n yɛlɛ waa Kolocɔlɔɔ nyɛ́ɛri. A wàa i nyɛ lé fundaanra na? Ki n yɛlɛ waa ŋúu waa Kolocɔlɔɔ kpɔ̀ʔɔrɔ́.

¹⁴ Ba wàa i nyɛ lé yele níngi ni ni yáa? Ki n yɛlɛ wi Egiliziw yɛɛ̀kinibéle yeri, bele bee í ba nyɛ́ɛri wi kéeli na si sìnmɛ tɛ́ʔɛ bi wi pɔ̀li Kàfɔw mɛ́ʔɛ na.

¹⁵ Pe ga nyɛ́ɛri ní tágala ní, gee bee a yáaw pɔʔɔ, Kàfɔw a wi yìrige wi yáami yasinɛgɛ na. Ní ki ga pye wi n kapeegèle kèle kpéʔele, Kolocɔlɔɔ a ge kùsulugi syɔɔ.

¹⁶ Gee bee na gi yɛlɛ yaa yèré yele kapeegèle ni, yáā ge nyuu yaa tèé yeyɛɛ na, yáā nyɛ́ɛri yeyɛɛ kéeli na, koro ga pye yele si pɔʔɔ. Syɔ́ɔnwee wi nyɛ lè syɛɛnsiɔn, wee bee nyɛ́ɛrigɛ tɔ̀nɔ́ i nyɛ ní báriga ní, fànʔa i nyɛ gi ni bi gbǎn kakpoloyo kpéʔele.

¹⁷ Elii maa pye syɔɔn àmɛɛ wolo nyɛ lè, wi n Kolocɔlɔɔ nyɛ́ɛri, ní wi fúngi myɛ ní koro ga pye zàʔá a kɔ́ too í, zàʔá ga wɔ́ɔ̀ too tári na í n baa taa yɛ̀ʔɛlɛ taanri ní yeye kɔrɔni.

¹⁸ Koro kàdoʔo ma a wi níì Kolocɔlɔɔ nyɛ́ɛri, a nyɛ̀ʔɛni níì zěgi yaʔa ki i tuun, a yaliiri séli ni nyɔɔgi.

¹⁹ Ni senyɛ̀nnɛ, yele wàa ga pùuni n kányɛɛgi kólogo yaʔa, á wàa wi dɛ̀ɛmɛ a wi lúru n pan gi ma,

²⁰ ki n yɛlɛ ye gi cán bi cán, syɔ́ɔnwee wi ga kapeebyewaa lúrugo lè wi kólogi na gee wi da pùuni n láa lè, wee bee n kapeebyewaa syɔɔ kùu ma, níì gi kaan kapeenɛʔɛgèle myɛ ke da pye lè wi na, a Kolocɔlɔɔ ge kùsulugi syɔɔ.