Zyaki 4 - Cebaara Bible 2010

Dulunyanw tàmaga kéele

¹ Kàsiiw ní kàkabalayi yi nyɛ lè yele níngi ni, sán di yìrigí? Yele fundaayi kèlē ge túngu lè yele céri ni làla o làla, koro má ban di yìrigí ì?

² Yele i yarira saʔa láa pingi yele si o di taagi í. A koro gi kaan a yele i syɛ́ɛnbèle kúu. Yele i nyabɛɛnnɛ kpéʔele syɛ́ɛnbèle yárira na, yele si a gbǎn di taa í, gee bee na yele kàkabalayi kpéʔele ní i túngu ní yeyɛɛ ní, gee yele caa lè, yele o gi taagi í, níì cán yele o gi nyɛ́ɛri Kolocɔlɔɔ ma í.

³ Yele i nyɛ́ɛri yele si o taagi í, níì cán sɔ̀nguri yele sɔ̀ngí lè ní i nyɛ́ɛri, ti ga nyɔɔ í, gee yele caa lè, yele i sɔ̀ngí yele ga gi taa yele í da yele nyɛ́nɛ kérigèle kpéʔele ní gi ní.

⁴ Yele kanɔnʔɔbyebèle! Yele ga gi cán ncan wee wi ga tàmaga le ní dulunyanw ní lè, wee bee i nyɛ Kolocɔlɔɔ nígoo ì? Syɔ́ɔnwee faala wi caa bi pye tàmaga na ní dulunyanw ní lè, wee bee n wiyɛɛ gbéʔele Kolocɔlɔɔ nígoo.

⁵ A yele i gi sɔ̀ngí lé Kolocɔlɔɔ syɛɛnsɛbɛri n gi joo nyùngo fun, àmɛɛ gi joo lè níì jo: «Pìígèle Kolocɔlɔɔ le wolo ni lè, ke kéeli n wi dɛ́nɛ gbanʔama fwɔɔ n nan yejaʔa na?»

⁶ Koro ní ki myɛ ní kpɔ́ʔɔri Kolocɔlɔɔ kaangi lè, ti n kpɔ́ʔɔ n sáà sɔ̀lɔ, níì cán ki n joo wi syɛɛnsɛbɛri ni níì jo: «Bele be peyɛɛ nyɛ́nɛ lè, Kolocɔlɔɔ i nyɛ nigooro na ní bele bee ní, bele si be nyɛ lè, màabyebèle wi i nyɔɔgi bele bee na.»

⁷ Gee bee na gi yɛlɛ yaa lúro Kolocɔlɔɔ ma, yé yére ye Dàzɔɔnw sige ye tun ní wi ní, koro ga pye wi a fǎn léeli yele na.

⁸ Ki n yɛlɛ ye nùuni Kolocɔlɔɔ na, wi a wɔ́ɔ nùuni yele na. Yele bele ye nyɛ lè kapeebyebèle, ye yele kɔ́yi jée ye yirige yele kapeegèle ni, yele bele ye nyɛ lè fúnyi siin-ziin fɔɔlɔ, ye yele fúnyi sámaga yi pye funviiye.

⁹ Ki n yɛlɛ yaa funbɛɛnrɛ kpéʔele yele kapeegèle kéele na, yáā nyaan yaa peele. Ye yele kataanri kàriga ti pye nyatinmɛ, yé wɔ́ɔ yele fundaanri kàriga ti pye funbɛɛnrɛ.

¹⁰ Ki n yɛlɛ ye yeyɛɛ jɛ́rɛ Kàfɔw yɛ́ʔɛ ma, koro ga pye wi a yele kpólo.

Mɔ a kɔ́ ra kútii kúunri senyɛnwaa na í

¹¹ Ni senyɛ̀nnɛ, ki ga yɛlɛ yele í da syɛɛnpeeri nyuu da wáa yeyɛɛ na í. Syɔ́ɔnwee wi syɛɛnpeeri nyuu ni wáa wi senyɛnwaa na lè, wàlá wi i wi córo wi n kolo, Kolocɔlɔɔ làlwaw na wee bee syɛɛnpeeri nyuu ni wáa ní i wi córo wi n kolo. Mɔ si ga ni làlwaw kologi, mi gi cán gee làlwaw nyuu lè, mɔ o táanri ni yɛlɛgi ní gee bee ní í, fwɔɔ mɔ i wi córo wi n kolo.

¹² Bi si gi taa Kolocɔlɔɔ nibin wi nyɛ làlwaw kaanfɔlɔ ní wɔ́ɔ i nyɛ kútiijoow, fànʔa i nyɛ wi ma bi gbǎn syɔɔn syɔɔ, fànʔa wɔ́ɔ i nyɛ wi ma bi gbǎn syɔɔn kálagi. Mɔ si wi nyɛ wìí, mɔ wee wi mɔ syɛɛnnyɛnwaa córo lè wi n kolo?

Wo a kɔ́ ra woyɛɛ gbɔ́ʔɔgi í

¹³ Ye lóʔo mii ma, yele bele ye gi nyuu lè níì jo: «Níjanʔa wàlá nyɛ̀ʔɛna wolo a kári kèkpɔɔgi yaa ma, wolo si a sa kòro yaà beè bi yɛɛlɛ nibin kwɔ́ɔ sáā jàgi wáa, koro ga pye wolo í wáli saʔa taa!»

¹⁴ Bi gi taa kéelee li a ba pye lè nyɛ̀ʔɛna, yele ga lee bee cán í! Jòorí yele sìíw kánma tɔ̀ʔɔ́ nyɛ? Yele i nyɛ àmɛɛ nìgolowirige nyɛ lè, gee gi gáà tɔ́n lè làla cɛɛri ni, koro kàdoʔo ma ki n cariga.

¹⁵ Ki maa yɛlɛ yele í dée gi joo kánmi naa na si jo: «Ní ki ga pye Kàfɔw nyɛ́nɛ kéele, wolo ga baa pye beè sìi na, wolo a gee ní gee kpéʔele.»

¹⁶ Kàjáa yele kpɔ́ɔmi sɔ̀ngurɔ kèlē n gi kaan, a yele i yeyɛɛ gbɔ́ʔɔgi. Ye gi cán kpɔ́ɔmi bee myɛ n pee.

¹⁷ Koro na kapye syɔɔn n kacànnaa cán, lee wi yɛlɛ bi kpéʔele lè, wi si ga li kpéʔele í, wi n kapeele pye.