Zyaki 3 - Cebaara Bible 2010

Nyínni kéele

¹ Ni senyɛ̀nnɛ, ki ga yɛlɛ yele saamaw í kɔ́ yeyɛɛ bye tamafɔɔlɔ í, níì cán yele n gi cán, wolo bele wo syɛ́ɛnbèle tama lè, wolo kútiiw a ba gbàn bi sɔ̀lɔ wozanbèle wóo na.

² Wo myɛ i pùuní kánmi féleye saʔa na. Syɔ́ɔnwee wi ga pye lè wi o nyuu ni tuun keelaa faala ni í, wee bee i nyɛ tɛɛlɛ fun syɔ́ɔn, ní wɔ́ɔ̀ wiyɛɛ cǒmi cán kánmi myɛ na.

³ Wolo i kàrafeebèle nii syɔ́ɔnyi nyɔ́ɔyɔ ni jàngó yaa lúro wolo ma, lǎli bee ni a wolo gbàn ni yi woboyi kàragí yi i syée wolo nyɛ́nɛ tɛ́ɛyi ni.

⁴ Ye wɔ́ɔ ye kɔ́rɔkpoloyi kéele wéle àmɛɛ yi kpólo lè gbanʔama, á káfalakpoloyi si i yi kaangi a yi i syée kelekele, koro ní ki myɛ ní àmɛɛ kɔ́rɔbiniyi wírē nyɛ lè wobiipiigéle ní, a yi fànvɔbèle sèʔê gbàn ni gele bee téeri ni yi kàragí ni tórogi kàbangee faala na be caa yaa syée lè.

⁵ Anbée si nyínni wɔ́ɔ̄ nyɛ céri tɛ́ɛlaa, lee li cɛ́rɛ lè, níì gbàn ni joogbɔɔmi nyuu. Ye wéle àmɛɛ naàpiipiile a wɔ́ɔ gbǎn kɔlikpɔʔɔ kaan gi cò bàā sóori lè!

⁶ Nyínni wɔ́ɔ i nyɛ àmɛɛ naà nyɛ lè, loro ni péemi myɛ taagi, pi nyɛ lè dulunyanw ni, li i nyɛ wolo céri tɛ́ɛlaa, a wolo céri myɛ i taagi li péemi na, nlaa pe syɔɔn see lè, kérigèle myɛ wi kpéʔele lè wi sìíw canya ni, loro li náagi nii gele bee na, náagi bee i nyɛ tɛɛwɔʔɔgi wóʔo, gee Sutanaw le li na lè.

⁷ Syɔɔn n fànʔa taa yaweeri féleye myɛ na ni di fwɔɔgi, ti lè tɔlɔyɔ sicɛrɛ-jɛrɛ wóri, ní féjɛɛnri, ní dee ní di fulolo lè, n fàra lǒgi fúngo wóro na, ànbée ki da ni kpéʔele nlaa yaà ki sélimi na.

⁸ Kàjáa gee gi nyínni kéele kwɔ́ɔ lè, syɔɔn faala o beè wee wi kɔ́ɔ̀ gbàn n li fwɔɔgɔ lè í, li n pee, syɔɔn a gbǎn fànʔa taa li na bàā li kàragí í. Li n nyìn sɔ́ɔnri na, dee di syɛ́ɛnbèle kúu lè.

⁹ Ní loro ní wolo Kàfɔw kpɔ̀ʔɔrɔ́ wi lè wolo Tóow, loro wonijanni ní wolo wɔ́ɔ̄ syɛ́ɛnbèle dángi, poro bele Kolocɔlɔɔ faan a be woro tiimaa wíri lè.

¹⁰ Kolocɔlɔɔ kpɔ̀ʔɔrɔli ní dángaw syɛ́ɛnrɛ di yirigi nyɔɔnijangi ni lè, ni senyɛ̀nnɛ, koro ga yɛlɛ kaa kpéʔele í.

¹¹ A lòtanʔa ní lòpɛnʔɛ a gbǎn pínɛ yiri lé púlowee-níjanna ni?

¹² Ni senyɛ̀nnɛ, a děsyaantiige a gbǎn olivye tíige yasanra san lé? Ba ɛrɛzɛn tírige a gbǎn děsyanʔa san lé? Lòtanʔa a wɔ́ɔ gbǎn taa solomɔ lɔ́ʔɔ ni í.

Sícilimi bi yìrigí lè nyɛ̀ʔɛni na

¹³ A wàa i yaà lé yele níngi ni, wee wi wiyɛɛ zɔ̀ngí lè sícilio ní keele cánvɔlɔ? Ki n yɛlɛ wi gi tɛ̀ɛn wi nàʔajǎnmi báriga ni, gee bee n jo, gee myɛ wi kpéʔele lè, wi a ra gi kpéʔele ní màama, ní sícilimɛ ní.

¹⁴ Kàjáa yele fúnyi ga nyìn nyabɛɛnni ní fungbɔɔgi na, ki ga yɛlɛ yaa yeyɛɛ nyɛ́nɛ ní yele sícilimi bee ní í, yele ga ni koro kpéʔele, ye gi cán yele n kányɛɛgi cée.

¹⁵ Sícilimi bee o yìrigí nyɛ̀ʔɛni na í. Kàjáa pi i nyɛ dulunyanw naa, ní syɔɔn tiimaa funzɔngumi, ní màdebèle wómɔ.

¹⁶ Níì cán beè nyabɛɛnni ní fungbɔɔgi nyɛ lè, funwaliyi ní kanaa-sìnbyeri féleye myɛ wɔ́ɔ i nyɛ nɛɛ bee.

¹⁷ Kàjáa sícilimi bi yìrigí lè nyɛ̀ʔɛni na, wozeligi gi nyɛ pi i nyɛ tɛɛlɛ fun, gee gi taʔa lè gee bee na, koro gi nyɛ yɛɛ̀nyingi kéele n bi dɛ́nɛ, fûnnyingi si wɔ́ɔ i nyɛ bi ni, pi o jáma í, pi i nyinimɛ ní kacàngēle kpéʔele làrigèle myɛ ni, syɛɛnjóotɛɛyɛ siin joolo o nyɛ bi ni í, pi i nyɛ funviire na.

¹⁸ Bele be kàsiitunbèle bɛ̀ɛgí ní peyɛɛ ní lè ní i pe kérigèle kpéʔele ní fûnnyinge ní, bele bee a be kasinbyeri tɔ̀nɔ taa.