Zyaki 1 - Cebaara Bible 2010

Fòów kéele

¹ Mii Zyaki wi nyɛ lè Kolocɔlɔɔ púlo ní wɔ́ɔ i nyɛ Kàfɔw Zyezu Kirisi wóo, mii a sɛ́bɛw naa tórigo yele ma, yele bele ye nyɛ lè Isirayɛli syɛɛnfeleyi kɛɛ ní siin yodaʔaya níì cariga dulunyanw tɛ́ɛyɛ myɛ ni lè, mii i yele syáanri!

Tágali ní sícilimi kéele

² Ni senyɛ̀nnɛ, kagbanyee myɛ féleye yi tuun yele na lè, ki n yɛlɛ yaa fundaanra kpéʔele gbanʔama,

³ àmɛɛ yele gi cán lè ncan kagbanyee yi tuun yele na lè ni yele tágali sɛʔɛ ni wéle, yele i kpàracogi tama yee bee báriga ni.

⁴ Ki si n yɛlɛ yaa kpàracogo kpéʔele kérigèle myɛ ni làla o làla, koro ga pye yele í nyɔɔ foro si pye tɛɛlɛ fun, yarigaa faala a kɔ́ yele fɔ̀n í.

⁵ Kapye sícilimɛ n fɔ̀n yele wàa ma, ki n yɛlɛ wi bi nyɛ́ɛri Kolocɔlɔɔ ma, wi a bi kaan wi ma, níì cán woro wi syɛ́ɛnbèle myɛ kaangi saʔa, wi si o fúlo wi nyɛ́ɛrifɔbèle na í.

⁶ Kàjáa ki n yɛlɛ wi bi nyɛ́ɛri ní tágala ní, ki ga yɛlɛ waa wiyɛɛ gábala wi fúngi ni nyáana í. Níì cán syɔ́ɔnwee wi nyɛ́ɛri ní kàkabalaga ní lè, wi i nyɛ àmɛɛ sólomi lòkpɔʔɔ kunguruyo nyɛ lè, yee káfalagi gáā lée ni wáa lè kàbanyi myɛ na.

⁷ Ki ga yɛlɛ syɔ́ɔnw bee félege í kɔ́ ra sɔ̀ngí woro a yarigaa taa Kàfɔw ma í,

⁸ funyo siin fɔ́lɔ wi nyɛ, ní wɔ́ɔ i wiyɛɛ gábala wi kapyegèle myɛ ni.

Fóomi ní lɔ́ri

⁹ Kapye wolo senyɛnwaa i nyɛ fóomi ni á Kolocɔlɔɔ wi kpɔ́ʔɔ, ki n yɛlɛ waa fundaanra kpéʔele gee bee na.

¹⁰ Wolo senyɛnwaa ga wɔ́ɔ̀ pye lɔrɔfɔlɔ á Kolocɔlɔɔ wi cɛ́rɛ, ki n yɛlɛ waa fundaanra kpéʔele gee bee na. Níì cán lɔrɔfɔw kwɔ́ɔganma a ba pye àmɛɛ nyàáfyɛɛnri nyɛ lè.

¹¹ Cángi ga yiri ni wáa gbanʔama, ki káfugbangi n nyàági kaan ki n fána. Nyàáfyɛɛnri n wɔ́ɔ̀ kɔlɔ n wo, ti nìjanri n fala n kwɔ́ɔ. Kánmi bee na lɔrɔfɔlɔ a ba kwɔ́ɔ bi yiri wi lɔ́ri caala ni.

Kagbanyi ní lɛ́ɛlɛgi kéele

¹² Syɔ́ɔnwee wi kòro ni kpàracogo kpéʔele lè kagbanyi ni, wee bee i nyɛ dùba pyà. Níì cán àmɛɛ yi wi sɛʔɛ n wéle lè á wi fànʔa taa yi na, wi a kpɔ́ʔɔri nyùndɔnnɔ taa li lè sìíw wólo, lee Kolocɔlɔɔ joo wi a kaan bele má be tàmaga le ní woro ní lè.

¹³ Keelaa ga ni syɔɔn kárima bi lége kapeele ni, ki ga yɛlɛ wi kɔ jo Kolocɔlɔɔ wi woro kárima í. Níì cán yarigaa faala a gbǎn Kolocɔlɔɔ kárima wi kapeele kpéʔele í, woro tiimaa si wɔ́ɔ o syɔɔn kárima wi kapeele kpéʔele í.

¹⁴ Kàjáa gee gi syɔɔn kárima ni légi kapeele ni lè, koro gi nyɛ wi tiimaa fundaagi, àmɛɛ gi wi kíle ní i wi lɛ́ɛlɛ ni có lè.

¹⁵ Syɔɔn fundaagi n si baa ficɛnnɛ taa bi kapeele see. Kapeebyeri ga baa foro, ti n kùu see.

¹⁶ Mii senyɛn-nidaanmabèle, ki ga yɛlɛ yaa yeyɛɛ váana í,

¹⁷ ki n yɛlɛ ye gi cán yakaanree myɛ di nyɛ lè wojanra ní, ní kpɔ́ʔɔree di nyɔɔ n foro lè, toro myɛ i yìrigí Kolocɔlɔɔ ma, woro wee wi gbɛ̀ɛ́nmi yárira myɛ kpéʔele lè, ti lè nyɛ̀ʔɛni na, woro wee wi wɔ́ɔ̄ nyɛ lè wi o fɛ̀ɛ́ í, wi si wɔ́ɔ o kàragí àmɛɛ nyínmi nyɛ lè í.

¹⁸ Wi n wolo séli n see kavɔn kányɛɛgi syɛ́ɛnrɛ báriga ni, wi n gee bee kpéʔele n yɛlɛ ní wi tiimaa kínidɛnɛgi ní, koro ga pye wolo í pye wozelibèle woro ma wi yafaanri myɛ nínge ni.

Kolocɔlɔɔ syɛ́ɛnri lóʔolo ní di kpéʔeleli kéele

¹⁹ Mii senyɛn-nidaanmabèle, ye gi cán ki n yɛlɛ syɔɔn o syɔɔn í wári wi líiyi cáan bàā lúro, wi si a wári kɔ́ ra nyuu í, wi fúngi si a wári kɔ́ ra taanri í,

²⁰ níì cán syɔɔn fundanʔari a gbǎn Kolocɔlɔɔ kasingèle foro í.

²¹ Gee bee na gi yɛlɛ ye láʔa nɔ́nʔɔri kèlē myɛ na si wɔ́ɔ láʔa kanaa-sìnzinri myɛ na yele kpéʔele lè, syɛ́ɛnree Kolocɔlɔɔ le yele fúnyi ni àmɛɛ lùguro nyɛ lè, ki n yɛlɛ ye dee bee cò ní funjànya ní, toro dee ti a gbǎn yele pìígèle syɔɔ lè.

²² Gee Kolocɔlɔɔ syɛ́ɛnri joo lè, ki n yɛlɛ yele í da gee bee kpéʔele, ki ga yɛlɛ yele í pye ti lóʔofɔbèle yagana sáā yeyɛɛ váana í.

²³ Níì cán syɔ́ɔnwee wi Kolocɔlɔɔ syɛ́ɛnri lúro lè wi si o gi kpéʔele àmɛɛ di joo lè í, wee bee i nyɛ àmɛɛ syɔɔnwaa nyɛ lè wee wi wiyɛɛ wéle lè dùbale ni,

²⁴ lǎli ni wi ga wiyɛɛ wéle n kwɔ́ɔ lè, wi n sɔ̀lɔ n fala ní wɔ́ɔ̀ fɛ̀ʔɛ terire wiyɛɛ kánmi na.

²⁵ Kàjáa Kolocɔlɔɔ làlwaw wi foro lè ní i wɔ́rɔdi kaangi wo ma, syɔ́ɔnwee ga ni wee bee sɛʔɛ ni wéle lè ní kɔ̀rɔsíi ní, níì kòro gee bee na ni kpéʔele ní lòmaana ní, Kolocɔlɔɔ a dùbaw taʔa wee bee na wi kérigèle myɛ ni wi kpéʔele lè, níì cán wi o nyɛ làlwaw bee syɛ́ɛnrɛ lóʔofɔlɔ ní i fɛ̀ʔɛ́ di na í, kàjáa wi i táanri ni yɛlɛgi ní di ní.

²⁶ Wàa ga ni wiyɛɛ zɔ̀ngí n jo woro i nyɛ Kolocɔlɔɔ kôdanʔaɔ, wi si o wi nyɔɔsyɛɛnri kɔ̀rɔsíi í, syɔ́ɔnw bee i wiyɛɛ váana, wi Kolocɔlɔɔ kôdanʔari i nyɛ gbanzan.

²⁷ Wee wi Kolocɔlɔɔ kólogi táanri ni síngi lè kolomɔ fun wolo Tóow Kolocɔlɔɔ ma, woro wi nyɛ wee wi syée lè n sa ni círibèle ní lɔgucebèle wéle ní i be dɛ̀ɛmɛ́ pe fɔ̀rɔyi kèlē na, ní wɔ́ɔ i wiyɛɛ kɔ̀rɔsíi péemi kèlē na ge nyɛ lè dulunyanw ni.