Zakarii 9 - Cebaara Bible 2010

ISIRAYƐLI NI SYƐƐNFELEYI WOZANYA ( 9:1—11:17 ) Syɛɛnfeleyi yi nyɛ Isirayɛli ye taana lè yoro kútiiw ní yi syɔɔli

¹ Joogbanna, Yawe syɛ́ɛnri Hadiraki tári kéele na. Ti n baa kòro Damasi na, níì cán Yawe má syɔɔn ye nyɛ, àmɛɛ Isirayɛli syɛɛnfeleyi myɛ nyɛ lè.

² Ti n wɔ́ɔ̀ kòro Hamati na, wi lè Damasi láʔagologi na, ní Tiiri, ní Siidɔn na, yi ní yi sícilimi myɛ ní.

³ Tíiri n kènirige faan wiyɛɛ kéeli na. Wi n wálifiiw fàari n kpóʔoro àmɛɛ támiige nyɛ lè, níì tɛ́ɛw kpóʔoro àmɛɛ kàlari-kóloyi fáriga nyɛ lè.

⁴ Wéle, Kàfɔw a gi nɛnɛ syɔɔ, wi a wi fǎngi wáa sólomi lɔ̀ʔɔ ni, náagi a gi lìi.

⁵ Asikalɔn a gee bee nyaa, fyáara si wi cò. Gaza a wɔ́ɔ gi nyaa, sáā cɛ̀lɛ́ gbanʔama, ní Ekurɔn wɔ́ɔgēle, níì cán wi sɔ̀ngumi tɛɛtaʔaga a fɛ̀ɛrɛ wáa wi na. Fànʔafɔlɔ a ní pye Gaza ni í. Syɔɔn faala a ní pye Asikalɔn ni í.

⁶ Syɛɛnfele-nyáʔamiga a tɛ́ɛn Asidɔdi ni, mii a Filisitini ye nɛ̀ɛnyɛnɛgi yáriga kwɔ́ɔ yirige yaà.

⁷ Mii a sìsyaanw láʔa wi nyɔ́ɔgi na bi wi kapeekpoloyi yirige wi gǎngèle lariga ni. Woro a wɔ́ɔ kòro wolo Kolocɔlɔw wóo. Wi a pye àmɛɛ kùndigi nyɛ lè Zyuda ni, Ekurɔn a pye àmɛɛ Yebusi ye nyɛ lè.

⁸ Mii a tɛ́ɛn bi mii kpáagi màʔa jàngó kapɛɛnkpumɔnbéle a kɔ́ nan gi na í, bi gi syɔɔ wee má wi sɔ̀lɔ́ ni syée lè, ní wee má wi lúru ni maa lè, syɔɔn faala a ní pan ba fǎngi gbàn mii syɛ́ɛnbèle na í. Níì cán tɔ́ɔliw ni mii nyɛ́nɛ i be na.

Fànʔafɔw wi a ba yɛɛ̀nyingi kaan lè

⁹ Siyɔn calipili, da yegi fundaanri báriga ni! Da fundaanra yákpolo wáa, Zyerusalɛmi calipili! Mɔ fanʔafɔw wéle wee, wi i maa mɔ ma. Wi n sín, ní i nyɛ fàndaaɔ, wi n wiyɛɛ jɛ́rɛ, níì lúgu jòfani na, jòfanipile na, jòfanicaa pyà na.

¹⁰ Mii a kapɛɛnkpumɔn-wòtorobèle kwɔ́ɔ yirige Efirayimi ni, bi syɔ́ɔnyi kwɔ́ɔ yirige Zyerusalɛmi ni. Kapɛɛnkpumɔn-sedeyi a kwɔ́ɔ yiri yaà. Wi a yɛɛ̀nyinge kéele joo syɛɛnfeleyi ma, wi kùndigiri a séli solomɔ lógaa na bàā syée kàa ma, ti a séli Ufurati cábigi na bi sa nan tári láʔagéle na.

Kàsolebèle yaʔala kéele

¹¹ Mɔ si na, mɔ joogaanni sìsyaan kéele na, mii n mɔ kasolebèle yirige weecurugi ni, ki lè lɔ̀ʔɔ fun.

¹² Ye lúru yaa syée kènirigi ma, kàsolebèle, yele bele má sɔ̀ngumɔ tɛɛtaʔaga nyɛ lè saʔa! Mii ní i gi nyuu níjanʔa níì jo mii a gi tɛɛyɛ siin lúrugo mɔ ma.

¹³ Níì cán mii i mii sedegi pwoo, koro gi nyɛ Zyuda, mii i Efirayimi kpéʔele ki ŋaaŋɔɔnyi, ee Siyɔn, mii a mɔ jáabèle sɔ́ɔn wáa Yavan pìíbèle na! Mii a mɔ kpéʔele àmɛɛ kapɛɛnkpumɔn-nànnirio ŋɔsée nyɛ lè.

¹⁴ Yawe a wiyɛɛ dɛ̀ɛn pe ǹjogi ni, wi wɛ̀ɛ́li a kári àmɛɛ nyɛ̀ʔɛni nyɛ́ʔɛnɛmɛ nyɛ lè. Kàfɔw Yawe a búruw wìi, wi a pan wòrogulo kàbangi káfalakpɔʔɔ ni.

¹⁵ Yawe wi lè Nyɛ̀ʔɛni Sùlasiibéle Kafɔlɔ wi a ra be kpáaw wéle. Pe a ra káa, pe a ra kàvɔrɔdɛnɛyi tɔ́nʔɔnɔ. Pe a ra gbo, pe a ra tugu da yìrigí àmɛɛ dùvɛɛn nyɛ lè, pe a nyìn àmɛɛ yalele nyɛ lè, ní àmɛɛ sáriga-wòlo-yafaangi jɛ̀ɛ́ngéle nyɛ lè.

¹⁶ Yawe be Kolocɔlɔw a be syɔɔ cángi bee na àmɛɛ bàala nyɛ pe lè wi syɛ́ɛnbèle. Níì cán pe i nyɛ fànʔafɔ-nyùndɔnnɔ kadɛɛngèlē, gele ge daragi wi tásaligi na lè.

¹⁷ Ki a tɔ̀nɔ́ pye kataanna! Ki a tɔ̀nɔ́ nyɔɔ! Bilew a ra fànʔa kaangi nìgɔcaripiigèle ma, duvɛɛnfɔnw sáā fànʔa kaangi pìcaapiigèle ma.