Zakarii 7 - Cebaara Bible 2010

Súnw lele Zyerusalɛmi jaali sɔ̀ngudaara kéele na

¹ Dariyusi fǎngi yɛɛsicɛrɛ wólo na, a Yawe syɛ́ɛnri nan Zakarii na, yɛ́ɛli yeye kpanjɛrɛ wóʔo na ki lè Kisilevi yégi, koro canya sicɛrɛ wógi na.

² Betɛli ye maa Saresɛɛri, ní Eregɛmi-Melɛki tun ní wi syɛ́ɛnbèle ní, pe sa Yawe nyɛ́ɛri gbanʔama,

³ si gi joo Nyɛ̀ʔɛni Sùlasiibéle Kafɔlɔ Yawe kpáagi sáriga-wòlobēle, ní kanyaajoobèle ma si jo: «A gi yɛlɛ lé mii í da nyaan yeye kagunɔ wógi na si niyɛɛ cò yáriri kàbaan na, àmɛɛ mii gi kpéʔele n kwɔ́ɔ lè yɛ̀ʔɛlɛ saʔa ni?»

⁴ Yawe wi lè Nyɛ̀ʔɛni Sùlasiibéle Kafɔlɔ, wi syɛ́ɛnri n nan mii na, wi n jo:

⁵ «Ki joo tári syɛ̀ɛnnɛ myɛ, ní sáriga-wòlobèle ma, mí be pye: ‹Lǎli ni yele súnw le lè, níì pye kùu káyaʔa na yeye kagunɔ wógi, ní yeye kɔrɔsiin wógi na, àmɛɛ gi kpéʔele lè ki yɛ̀ʔɛlɛ togoye taanri ní kpɔrigɔ wi wee, kányɛʔɛ na mii kéeli na lé yele súnnɛʔɛw bee le?

⁶ Lǎli ni yele ga ni líi lè ní i gbo, yele o gáā líi ní i gbo yeyɛɛ kéeli na ì?›

⁷ Syɛ́ɛnri bee ban Yawe da joo kanyaajoo-sélibèle ma a be joo ì, lǎli ni syɛ̀ɛnnɛ pye lè wodɛ́ɛnbéle ní Zyerusalɛmi ni, kí i nyɛ sági n fàra gi kěyi na yi gi màʔa lè, á syɛ̀ɛnnɛ wɔ́ɔ̀ pye wòrogulo kàbangi tára, ní tɛɛfiigi ni lè ì?»

⁸ A Yawe syɛ́ɛnri nan Zakarii na, ti n jo:

⁹ «Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo, wi n jo: ‹Yaa kútiiw nyuu kányɛɛgi na ní sínnɛ ní, yaa funjànga, ní nyinimɛ taagi yeyɛɛ na.

¹⁰ Yele a kɔ́ ra fǎngi gbàngí lɔgucaa, ní círio, ní nibɔɔn, ní foomɔfɔlɔ na í, yele wàa faala a kɔ́ ra kapeʔe sɔ̀ngí wi fúngi ni wi syɛɛnnyɛnnɛ kánma na í.›

¹¹ Kàjáa a be cée, pe ga fɔ̀lɔ bi lóʔo í, a be céemɛ fókaannyunyo nyɛ́ʔɛ níì be líiweegèle pɛɛn jàngó poro a kɔ́ lóʔo í.

¹² Pe n be zɔ̌nbèle nìri àmɛɛ jaman nyɛ lè, koro ga pye poro a kɔ́ ra làlwaw syɛ́ɛnrɛ lúro í, ní syɛ́ɛnri Nyɛ̀ʔɛni Sùlasiibéle Kafɔlɔ Yawe tórigo naa poro ma wi Pǐli báriga ni lè, dee wi kaan wi kanyaajoo-sélibèle ma a be joo lè. A koro pye sábabu á Nyɛ̀ʔɛni Sùlasiibéle Kafɔlɔ Yawe fúngi tanʔa gbanʔama.

¹³ «Lǎli ni mii da ni be yeri lè, pe ga lóʔo í, kánmi bee na ki wɔ́ɔ baa pye lǎli ni pe ba ni yiri lè, mii ga lóʔo í,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

¹⁴ «Mii n be cariga syɛɛnfeleyi myɛ nínge ni, yee yi lè pe da yi cán í. A tári kòro tɛɛ̀kalagiga pe kàdoʔo ma, syɔɔn faala da ni sɔ̀lɔ́ yaà wàlá ni maa yaà í, tári bee di pye lè fundaanra wóro, pe n di pye tɛɛ̀kalagiga.»