Zakarii 6 - Cebaara Bible 2010

Yanyaa-kɔrɔtaanri wógi: Wòtorobèle sicɛrɛ kéele

¹ A mii níì nyapiigèle yìrige ni wéle, a mii yanyaagaa nyaa, koro gi nyɛ gee naa: Wòtorobéle sicɛrɛ maa ni yirigi nyanbeleye siin lariga ni, nyanbeleyi bee maa pye kanyɛɛnrɛ wóyo.

² Wòtoroseliw maa pwɔɔ syɔɔnnyɛɛnyɛ na, á wòtoro-siin wów pwɔɔ syɔɔnwɔɔyɔ na,

³ á wòtoro taanri wów pwɔɔ syɔɔnfiiye na, á wòtoro sicɛrɛ wów pwɔɔ syɔɔnnyɛɛn-súruyo na, yee na tɛɛnyɔngɔ-nyɔngɔyɔ nyɛ lè.

⁴ A mii syɛ́ɛnri láa n gi joo nyɛ̀ʔɛni tunduɔn ma, wee wi da ni nyuu ní mii ní lè, níì wi pye: «Yìí yi nyɛ wòtoro-syɔ́ɔnyi bee ni Kafɔlɔ?»

⁵ A nyɛ̀ʔɛni tunduɔn mii yari: «Nyɛ̀ʔɛgèle káfalaya sicɛrɛ yii, yee yi yirigi tɛ́ɛgee ni yi da pye lè woyéreye ní tári myɛ Kàfɔlɔ yɛ́ʔɛ ma.»

⁶ Syɔɔnwɔɔyee na wòtorowee pwɔɔ lè, yoro i yirigi ni syée solomɔkulo tári kàbaan na. Syɔɔnfiiyi si i yirigi yee bee kurugo, á tɛɛ̀nyɔngɔ-nyɔngɔyi wóyo si i yirigi ni syée wòrogulo kàbangi na.

⁷ A wonyɛɛnyi yiri, ní i gi nyɛ́ɛri pe gi yaʔa yoro í sa tári fǎn màʔa. A nyɛ̀ʔɛni tunduɔn yi pye: «Yaa syée ye sa tári fàn ye màʔa!» A yi sáà tári fàn n màʔa.

⁸ A wi mii yeri níì mii pye: «Wéle, yee yi yirigi ni syée solomɔkulo tári kàbaan na lè, yoro a mii Pǐli fúngo tìrige solomɔkulo tári kurugo.»

Kanyaajoori fànʔafɔ-nyùndɔnni tɔ́nnɔ kéele na Zyozuwe nyúngi ni

⁹ Yawe syɛ́ɛnri n nan mii na, wi n jo:

¹⁰ «Ki n yɛlɛ mi yakaanyi syɔɔ wojo-mí-káribèle ma, pe lè Helidayi, ní Tobiya, ní Yedayeya, mɔ tiimaa a kári cángi bee na, mɔ a kári Zyozyasi kpaʔa ma wi lè Sofonii jáaw, beè be fala lè, pe yìri lè Babilɔni ma.

¹¹ Mɔ a wòlo wálifiiw, ní tɛ́ɛw ni bi tɛ́ʔɛ fànʔafɔ-nyùndɔngéle sámaga bi tɔ́n sáriga-wòlobèle kàfɔlɔ Zyozuwe nyúngi ni, wi lè Yehosadaki jáaw.

¹² Mí gi joo wi ma mí jo: ‹Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: Nànwaa wi wee, wee mɛ́ʔɛ be yiri lè Fíinge, tɛ́ɛgee ni wi nyɛ lè wi a fìín yiri yaà, si Yawe kpɔ̀ʔɔrɔli kpaʔa faan.

¹³ Woro wi a Yawe kpɔ̀ʔɔrɔli kpaʔa faan. Woro na fǎngi fɛ̀ɛbēle a pye. Wi a tɛ́ɛn wi fàngoli na bàā fǎngi kpéʔele. Sáriga-wòloo a wɔ́ɔ pye wi taana wi fàngoli na, pe siinw a pínɛ bɛ̀ɛ nibin na.

¹⁴ Fànʔafɔ-nyùndɔngèle a pye Helɛmi, ní Tobiya, ní Yedayeya, ní Sofonii jáaw Hɛn wòʔolo, bi pye sɔ̀ngudaara yáriga Yawe kpɔ̀ʔɔrɔli kpaʔa ni.

¹⁵ Bele be léeli lè, poro a pan bi ba ra báara Yawe kpɔ̀ʔɔrɔli kpaʔa faanna na. Yele a gi cán bi cán Yawe wi lè Nyɛ̀ʔɛni Sùlasiibéle Kafɔlɔ, woro wi mii tun yele ma. Yele ga tɔ̀nɔ n kòro ni Yawe yele Kolocɔlɔw jóomɔ lúro, gee bee a kpéʔele.› »