Zakarii 5 - Cebaara Bible 2010

Yanyaa-kɔrɔni wógi: Dángaw sɛ́bɛmigio kéele

¹ A mii níì nyapiigèle yìrige ni wéle, a mii yanyaagaa nyaa, koro gi nyɛ gee naa: Ki n pye sɛ́bɛmigio, wee wi yìrigí lè.

² A nyɛ̀ʔɛni tunduɔn mii pye: «Nyàʔá mɔ nyaagi?» A mii wi yari: «Sɛ́bɛmigio mii nyaa a wi i yìrigí. Wi tɔnɔganmi i nyɛ mɛ́tiribéle kɛɛ, wi kpɔ́ʔɔganmi si i nyɛ mɛ́tiribéle kagunɔ.»

³ A wi mii pye: «Dángaw wii, wee wi caragi ni syée tári myɛ yɛ́ʔɛ kurugo lè. Níì cán bi yɛlɛ ní wee bee ní, kàyuubèle myɛ a nɛnɛ bi yirige nɛɛ naa, ní bi wɔ́ɔ yɛlɛ ní wee bee ní syɔɔn o syɔɔn wi jànvaa kàliyi kɛ̀ɛ́ lè, woro a wɔ́ɔ nɛnɛ bi yirige nɛɛ naa.

⁴ Mii a wi cariga,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya, «Wi a sa jée kàyuuw kpaʔa ni, ní wee wi jànvaaw kàliya kɛ̀ɛ́ mii mɛ́ɛgi na lè, woro kpáagi ni, koro ga pye wi tɛ́ɛn yaà bi gi sórigo ní gi yatɔnri, ní gi kàdɛnɛri myɛ ní.»

Yanyaa-kɔrɔsiin wógi: Céwee wi nyɛ lè péemi sìndɛʔɛ ni

⁵ Nyɛ̀ʔɛni tunduɔn wi da ni nyuu ní mii ní lè, a woro sɛ̀ʔɛrɛ naa n baa mii pye: «Koro na mɔ nyapiigèle yìrige mi gi wéle, gee gi yirigi yaà lè.»

⁶ A mii wi yari: «Nyàʔá gi nyɛ koro?» A wi jo: «Yakirigi gi yirigi.» A wi níì jo: «Koro gi nyɛ be kolomi tári myɛ ni.»

⁷ Wéle, a pùlɔ́n yatɔngɔ i láari yaà, gee gi pye lè círiri, á cɔlɔɔ si i nyɛ yakirigi fúngo ni wodɛ́ɛɔn ní.

⁸ A wi jo: «Péemi bii.» A wi céw ŋɔrigɔ n wáa yakirigi fúngo ni níì pùlɔ́nw yatɔngɔ tɔ́n yakirigi nyɔ́ɔ na.

⁹ A mii nyapiigèle yìrige ni wéle, a mii yanyaagi naa nyaa: Ki n pye càbala siin. Káfalagi maa ni funu be fókaanyi ni. Be fókaanyi maa pye àmɛɛ karakpáa wóyo nyɛ lè. A be yakirigi yìrige n yaʔa tári ní nyɛ̀ʔɛni nínge ni.

¹⁰ A mii gi joo nyɛ̀ʔɛni tunduɔn ma, wee wi da ni nyuu ní mii ní lè níì wi pye: «Sán be yakirigi láa ni syée?»

¹¹ A wi mii yari: «Pe i syée sa kpaʔa faan gi ma Syineyari tári ni. Ki ga sámaga n kwɔ́ɔ, pe a sa gi tɛ́ʔɛ yaà beè gi tɛ́ɛgi ni.»