Zakarii 4 - Cebaara Bible 2010

Yanyaa-kagunɔ wógi: Fètindaʔali ní Olivye tíiyi kéele

¹ Nyɛ̀ʔɛni tunduɔn wi da ni nyuu ní mii ní lè, a woro lúru n pan n baa mii yìrige ŋúnɔmi na àmɛɛ be nàɔn yìrigí wi ŋúnɔmi na lè.

² A wi mii pye: «Nyàʔá mɔ nyaagi?» A mii wi yari: «Fètindaʔala mii nyaagi, li myɛ tɔ̀nɔ́ i nyɛ tɛɛ̀, sìngbolo si i nyɛ li ǹjogi ni, fètingéle kɔrɔsiin si i nyɛ li na, n fàra sìnmɛ tɛɛsɔ̀lɔgēle kɔrɔsiin na, fètingèle kéele na ge nyɛ lè fètindaʔali ǹjoʔo ni.»

³ Olivye tíiye siin n pye li taana, kàa n pye sìngboli kaliige ma, gee si i nyɛ li kàmɔnɔ ma.

⁴ A mii níì syɛ́ɛnri láa n gi joo nyɛ̀ʔɛni tunduɔn ma wi da ni nyuu ní mii ní lè, níì wi pye: «Nyàʔá gi nyɛ gee bee, ni kàfɔlɔ?»

⁵ Nyɛ̀ʔɛni tunduɔn wi da ni nyuu ní mii ní lè, a woro mii yari: «Gee gi nyɛ lè gee bee, mɔ ga gi cán lé í?» A mii jo: «Eʔe ni kàfɔlɔ.»

Nyɔɔfaliya, Zorobabɛli kéeli na

⁶ Lǎli bee ni a wi níì mii yari: «Syɛ́ɛnri di nyɛ dee naa, dee Yawe joo Zorobabɛli ma lè, wi n jo: ‹Sée báriga ni ban í, fànʔa báriga ni ban í, kàjáa mii Pǐli báriga ni wii,› Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

⁷ Nyanbe-nyundɔnɔgɔ, mɔ wi nyɛ wìí? Mɔ a tìgi bi pye fála fála Zorobabɛli yɛ́ʔɛ ma. Nɛɛ bee wi a kàdɛnɛzeligi kíle yirige fundaanra yakpowáara nínge ni, pe a ra gi nyuu si jo: ‹Kpɔ́ʔɔri n tɔ̀nɔ n yɛlɛ gi na.› »

⁸ Yawe syɛ́ɛnri n nan mii na, wi n jo:

⁹ «Zorobabɛli kɔ́yi yi kpáagi naa kàpɔɔn le, wi kɔ́yi si yi a wɔ́ɔ gi faan foro, mɔ a gi cán bi cán Yawe wi lè Nyɛ̀ʔɛni Sùlasiibéle Kafɔlɔ, woro wi mii tun yele ma.

¹⁰ Koro na wìí wi yapiigèle sélimɛ canʔa faʔa? Syɔɔn ga gûnzin-yárigi nyaa Zorobabɛli kɔ́gi ni, wi a ra fundaanra kpéʔele. Kɔrɔsiinw bee i nyɛ Yawe nyapiigèle, gele ge tári myɛ wéle ni forogi lè.»

¹¹ A mii syɛ́ɛnri láa n gi joo wi ma níì wi pye: «Olivye tíiyi bee siin yi nyɛ lè fètindaʔali kàliige, ní li kàmɔnɔ ma, yìí yi nyɛ yoro?»

¹² A mii níì syɛ́ɛnri láa tɔziin n gi joo wi ma níì wi pye: «Olivye tíiyi káganya siin yi nyɛ lè tɛɛ̀ kobiigèle siin taana, beè tɛɛ̀ cére sǐnmi fóo ni yirigi lè, yìí yi nyɛ yoro?»

¹³ A wi mii yari: «Yee yi nyɛ lè yee bee, mɔ ga yi cán lé í?» A mii wi yari: «Eʔe ni kàfɔlɔ.»

¹⁴ A wi jo: «Wonyɛnɛ-wòlobèle siin be yèré lè tári myɛ Kàfɔlɔ yɛ́ʔɛ ma, poro bɛɛ.»