Zakarii 14 - Cebaara Bible 2010

Kapɛɛnsanni, ní Yawe panni kéele

¹ Wéle, canʔa i maa Yawe ma, gee ni pe a ba mɔ yáriri lɛɛ peyɛɛ na lè mɔ níngi ni!

² Mii a syɛɛnfeleyi myɛ kpóʔoro Zyerusalɛmi na, kapɛɛnni kánma na. Kěgi a syɔɔ taa, páā kpáayi fuguri, sáā tuun cébèle na. Kěgi tíla a cò bi kári, kàjáa syɛ́ɛnbèle wozanbèlē a kwɔ́ɔ yirige kěgi ni í.

³ Yawe a yiri bi kapɛɛnni kpúmɔn ní syɛɛnfeleyi bee ní, mɔ a jo cángee na wi kapɛɛnnɛ kpúmɔn lè kapɛɛnni canʔa na.

⁴ Wi tɔ́lɔyi a taʔa cángi bee na Olivye tíiri nyanbelege na, gee gi nyɛ lè Zyerusalɛmi zǐnmi na, canʔafolomɔ kabangi na. Olivye tíiri nyanbelege a yabi níngi ni bi séli canʔafolomɔ ma bi sa nan canʔajeemɛ na, bi pye jǐnlɔgɔ, gee ki a kpɔ́ʔɔ lè gbanʔama. Nyanbelegi tílagaa a lúru kàdoʔo ma bi kári solomɔkulo kàbangi na, tílagee si lúru kàdoʔo ma bi kári wòrogulo kàbangi na.

⁵ Lǎli bee ni yele a fàn bi jée mii nyanbeleyi jǐnlɔgɔ ni, níì cán nyanbeleyi jǐnlɔgɔ a kári fwɔɔ bi sa nan Asali na. Yele a fàn àmɛɛ yele da fàn lè tári cúngolo kéele na Zyuda fànʔafɔw Ozyasi lǎli ni. Yawe mii Kolocɔlɔw a pan, wi wojanbèle myɛ a pye ní wi ní.

⁶ Cángi bee na gbɛ̀ɛnmɛ a pye yaà í, wéeri ní suniriw wi a pye yaà.

⁷ Ki a tɔ̀nɔ́ pye cangaa, gee gi nyɛ lè ki nibin, gee Yawe cán lè, kàa a ní pye canʔa kàa si pye yébilige í. Kàjáa ki ga pye cângwɔɔgi nyɔ́ɔ na gbɛ̀ɛ́nmi a yiri.

⁸ Cángi bee na sìi lóyo a ra yirigi Zyerusalɛmi ni, yi tílaw a ra fóo ra syée canʔafolomɔ solomɔ lógi ma, yi tílawee sáā syée canʔajeemɛ solomɔ lógi ma. Ki a pye kánmi bee na wɔ̀ɔ́gi làla, ní gbɛ̀ɛ́ngi làla ni.

⁹ Yawe a pye tári myɛ fànʔafɔlɔ. Cángi bee na, Yawe nibin wi a pye yaà, wi mɛ́ɛgi a pye ki nibin.

¹⁰ Tári myɛ a ba kàri tɛɛfiige bi séli Geba na bi sa nan Irimɔn na, ki nyɛ lè Zyerusalɛmi wòrogulo kàbangi na. Zyerusalɛmi a yìrige ǹjogi ni bi télege wi tɛ́ɛgi ni, bi séli Bɛnzyamɛ kpàánweeli na bi sa nan kpàánwee-sélili tɛ́ʔɛ na, fwɔɔ bi sa nan jɛ̀ɛ́ngèle kpàánweele na, si ní séli Hananeyɛli kpaataʔa-tɔ́nɔgi na fwɔɔ bi sa nan fànʔafɔw ɛrɛzɛn tɛ́ɛnùguyo na.

¹¹ Pe a tɛ́ɛn gi ni, kafuunnɔ a ní pye yaà í. Zyerusalɛmi a tɔ̀nɔ́ tɛ́ɛn yɛɛ̀nyinge na sági.

¹² Syɛɛnfeleyee myɛ yi ga baa kapɛɛnni kpúmɔn ní Zyerusalɛmi ní lè, wɔʔɔgee Yawe a taʔa yi na lè, koro gi nyɛ gee naa: Bi be yaʔa woyérebéle ní be tɔ́lɔyi na, pe céri a ra fɔ́ɔnri bàā ŋuu, pe nyapiigèle a ra fɔ́ɔnri da yirigi pe nyapiiweeyi ni bàā tuun, pe nyíngèle a ra fɔ́ɔnri da yirigi pe nyɔ́ɔyi ni bàā tuun.

¹³ Cángi bee na Yawe a nyáʔamigbɔɔlɔ lége be níngi ni. Pe a ra kɔ́yi có peyɛɛ na, pe myɛ nibin nibin a ra kɔ́yi yìrigí peyɛɛ kánmi na.

¹⁴ Zyuda a wɔ́ɔ ra kapɛɛnni kpúmɔn Zyerusalɛmi ni, syɛɛnfeleyi myɛ yi wi màʔa lè, pe a yi lɔ́ri fàari bi kpóʔoro saʔa, ti lè tɛ́ɛw, ní wálifiiw, ní yaleri.

¹⁵ Wɔʔɔgi wonijanga a wɔ́ɔ pye syɔ́ɔnyi ní jòfanikàriyi, ní fàlibaayi, ní yaweeri myɛ na ti a pye be tɛɛkòroyi ni lè.

¹⁶ Lǎli bee ni syɛɛnfeleyee myɛ yi pan n baa kapɛɛnni kpúmɔn ní Zyerusalɛmi ní lè, yoro wogorobèle myɛ a ra maa yɛɛlɛ o yɛɛlɛ bi ba ra tíri da tuun fànʔafɔw yɛ́ʔɛ ma, wi lè Nyɛ̀ʔɛni Sùlasiibéle Kafɔlɔ Yawe, si wɔ́ɔ ba ra Kpáagèle Láara Tɛ́ɛnnɛ fɛ́tii kpéʔele.

¹⁷ Lǎli bee ni tári narigbaayee ga pye yi o maa Zyerusalɛmi ma n ba ni tíri ni tuun fànʔafɔw yɛ́ʔɛ ma lè í, wi lè Nyɛ̀ʔɛni Sùlasiibéle Kafɔlɔ Yawe, zàʔá a ra tuun yi ma í.

¹⁸ Ezyipiti narigbaagi ga pye ki ga fɔ̀lɔ bi pan í, ki ga pye ki ga pan í, wɔʔɔgee Yawe a taʔa syɛɛnfeleyi na yi lè yi ga fɔ̀lɔ bi pan ba Kpáagèle Láara Tɛ́ɛnnɛ fɛ́tii kpéʔele lè í, koro félegi ki a too gi na.

¹⁹ Koro ki a pye Ezyipiti kpúmɔnri, ní syɛɛnfeleyi myɛ kpúmɔnrɔ, yee yi ga pye lè yi ga pan n baa Kpáagèle Láara Tɛ́ɛnnɛ fɛ́tii kpéʔele lè í.

²⁰ Cángi bee na ki a sɛ́bɛ syɔ́ɔnyi wèegēle na bi jo: «Sámaga yaʔali kéele Yawe ma!» Yawe kpáagi kòdogéle si pye àmɛɛ sáriga-wòlo-yafaangi taana yagbaagéle nyɛ lè.

²¹ Kòdɔɔlɔ o kòdɔɔlɔ li nyɛ lè Zyerusalɛmi, ní Zyuda ni, li a pye yacanga Yawe ma wi lè Nyɛ̀ʔɛni Sùlasiibéle Kafɔlɔ. Bele myɛ pe ga pan ba sáriga wòlo lè, pe a kòdogèle bee kèle láa bàā káari soori. Cángi bee na jàgiwáaɔ faala a ní pye Yawe kpáagi ni í wi lè Nyɛ̀ʔɛni Sùlasiibéle Kafɔlɔ.