Zakarii 13 - Cebaara Bible 2010

¹ Cángi bee na púloweele a múgu Davidi kpáagi wòolo, ní Zyerusalɛmi ye ma, kapeeli ní nɔ́nʔɔri jéemununɔ kéele na.

Kolocɔlɔɔ a yasunyi ní kanyaajoo-fáanabèle kwɔ́ɔ bi yirige yaà

² Yawe wi lè Nyɛ̀ʔɛni Sùlasiibéle Kafɔlɔ, wi n jo: «Cángi bee na mii a yasunyi mɛ́ɛyɛ kwɔ́ɔ bi yirige tári ni, koro ga pye syɔɔn a ní kɔ́ sɔ̀ngí taa yi na í. Mii a wɔ́ɔ kanyaajoobèle ní nɔ́nʔɔri pìle yirige tári ni,

³ wàa ga ní ni kérigèle nyaagi ni nyuu, wi tóow ní wi nɔ́ɔw pe wi see lè, poro a wi pye: ‹Mɔ a kòro sìi na í, níì cán mɔ n jànvaa joo Yawe mɛ́ɛgi na!› Wi tóow ní wi nɔ́ɔw pe wi see lè poro a wi súu fùru wi kanyaajoori làla ni.

⁴ Cángi bee na lǎli ni kanyaajoobèle ga ni kérigèle nyaagi ni nyuu lè, fɛ̀ɛrɛ a be taa be yanyaayi kéele na. Pe a ní síire búroyo le í, jàngó bàā syɛ́ɛnbèle fáana da pùuní í.

⁵ Pe myɛ nibin nibin a ra gi nyuu si jo: ‹Mii o nyɛ kanyaajooo í, tári mii fála, níì cán nlaa yaà mii cárimi làla ni, tári mii fála.›

⁶ Pe si ga wi pye: ‹Nyàʔá si gi nyɛ kpàliyi bee nyúngo, yi nyɛ mɔ kɔ́yi na lè?› Wi a be yari: ‹Koro n taa àmɛɛ pe mii kpúmɔn lè bele kpaʔa ni pe da tàmaga le ní mii ní lè.›

Pe n Yawe cán ncan wi i nyɛ Kolocɔlɔɔ

⁷ «Ŋɔsée, yìri mii bànaʔaw kánma na, ní nǎnw kánma na wi lè mii pínɛnyɛnw!» Yawe wi lè Nyɛ̀ʔɛni Sùlasiibéle Kafɔlɔ woro wi jo nya. «Bànaʔaw kpúmɔn mi kpóo bǎbèle si cariga fala. Mii si a mii kɔ́gi kàriga wobiigèle kàbaan na.»

⁸ Yawe n jo: «Lǎli bee ni, tílayi taanri ni, yaa siin a kwɔ́ɔ bi yiri tári myɛ ni, tíla-taanri wógi si kòro beè.

⁹ Mii a tíla-taanri wógi bee le náagi ni, mii a nɔ́nʔɔri yirige be ni àmɛɛ be nɔ́nʔɔrɔ yirigi wálifiio ni lè, mii a be sɛʔɛ wéle àmɛɛ be tɛɛ̀ sɛʔɛ ni wéle lè. Pe a mii mɛ́ɛgi yeri, mii a lóʔo be ma. Mii a gi joo si jo: ‹Poro be nyɛ mii syɛ́ɛnbèle!› Pe a gi joo si jo: ‹Yawe wi nyɛ wolo Kolocɔlɔw!› »