Zakarii 12 - Cebaara Bible 2010

Zyerusalɛmi syɔɔli kéele kapɛɛnni ma

¹ Joogbanna, Yawe syɛ́ɛnri Isirayɛli kéeli na. Yawe wi nyɛ̀ʔɛgèle yérige ǹjogi ni lè, níì tári kàpɔɔn le, ní wɔ́ɔ̀ syɔɔn pili sámaga wi ni lè, wi n jo:

² «Wéle, mii tiimaa a Zyerusalɛmi kpéʔele yɛɛwɔɔ̀ yagbaʔa syɛɛnfeleyi myɛ ma yi wi màʔa lè, Zyuda si na, ànbée ki a wɔ́ɔ kpéʔele woro na lǎli ni pe ga tɛ́ɛn Zyerusalɛmi taana kapɛɛnni kánma na lè,

³ cángi bee na mii a Zyerusalɛmi kpéʔele kàdɛnɛgɛ, gee syɛɛnfeleyi myɛ a ra caa bi láa yìrige lè. Bele myɛ pe ga ni caa bi gi láa yìrige lè, pe a kpàli gbanʔama. Tári syɛɛnfeleye myɛ si a yiyɛɛ gbóʔoro gi kánmi na.»

⁴ Yawe n jo: «Cángi bee na, mii a nyáʔamina wáa syɔ́ɔnyi myɛ na, si cúromɔ wáa yi tɛ́ɛnfɔbèle na. Kàjáa mii nyɛ́nɛ a pye Zyuda kpáagi wòolo na, mii si a syɛɛnfeleyi syɔ́ɔnyɔ myɛ kpúmɔn ní fúunro ní.

⁵ Zyuda kùndigibèle a ra gi nyuu be fúnyi ni si jo: ‹Zyerusalɛmi ye be nyɛ wolo fǎngi, Yawe wi lè Nyɛ̀ʔɛni Sùlasiibéle Kafɔlɔ, pe Kolocɔlɔw, woro bárigaw ni.›

⁶ Cángi bee na mii a Zyuda kùndigibèle kpéʔele àmɛɛ naakpɔʔɔ kpùmɔnʔɔnɔ nyɛ lè kàjere nínge ni, ní àmɛɛ nìmubwɔɔlɔ náa nyɛ lè bilepwɔɔgéle láara ni. Syɛɛnfeleyi myɛ yi be màʔa lè, pe a yi kálagi péw kàliige, ní kàmɔnɔ ma. Zyerusalɛmi ye si a ní kòro yaà wodɛ́ɛnbéle ní be tɛ́ɛgi ni ki lè Zyerusalɛmi.»

⁷ Yawe a Zyuda kpáagi wòolo syɔɔ gbɛnʔɛnɛ, koro ga pye Davidi yòdaʔayi, ní Zyerusalɛmi ye a kɔ́ ra gi sɔ̀ngi bi jo poro n sɔ̀lɔ Zyuda syɛ́ɛnbèle wozanbèlē na í.

⁸ Cángi bee na Yawe a Zyerusalɛmi ye tɔ́n. Wàa ga ni fági be ni, woro a pye cángi bee na mɔ a jo Davidi wii. Davidi kpáagi si pye mɔ a jo Kolocɔlɔɔ wii, bi pye mɔ a jo Yawe nyɛ̀ʔɛni tunduɔn wii pe yɛʔɛ̀ ma.

Kùu káyaʔa tári myɛ ni

⁹ Cángi bee na syɛɛnfeleyee myɛ yi a pan Zyerusalɛmi kánmi na lè, mii a kanmaa pye bi yi kálagi.

¹⁰ Lǎli bee ni mii a kpɔʔɔrɔ pìle ní nyɛ́ɛrigbɔʔɔ pile tìrige bi tɔ́n Davidi kpáagi, ní Zyerusalɛmi ye na, pe si a ra wéle mii ma, mii wee be súu n fùru lè. Pe a pye wi kùu káyaagi na, àmɛɛ syɔɔn gáà pye pìinibinge kuu káyaʔa na lè, pe a ra nyaan wi kéeli na gbanʔama, àmɛɛ syɔɔn nyaan lè gbanʔama pìiselio fɔnnɔ kéele na.

¹¹ Cángi bee na kùu káyaagi a kpɔ́ʔɔ Zyerusalɛmi ni, àmɛɛ Hadadirimɔn kùu káyaagi pye lè Megido jǐnlɔgi ni.

¹² Tári a pye kùu káyaʔa na, nariga o nariga a pye gi woʔò na ki nibin. Davidi syɛɛnfelegi nariga a pye gi woʔò na ki nibin, cébèle a pye pe woʔò na pe yagwɔɔlɔ. Natan syɛɛnfelegi nariga a pye gi woʔò na ki nibin, cébèle a pye pe woʔò na pe yagwɔɔlɔ.

¹³ Levii syɛɛnfelegi nariga a pye gi woʔò na ki nibin, cébèle a pye pe woʔò na pe yagwɔɔlɔ. Syimeyii syɛɛnfelegi nariga a pye gi woʔò na ki nibin, cébèle a pye pe woʔò na pe yagwɔɔlɔ.

¹⁴ Nariyi wozanya myɛ a pye yi woyò na nibin nibin, cébèle a pye pe woyò na pe yagwɔɔlɔ.