Zakarii 11 - Cebaara Bible 2010

Séekpoloyi n kpúmɔn n cáan

¹ Liban, mɔ kɔriyi múgu, náagi si mɔ sɛdiri tíiri sórigo!

² Yaa cɛ́ɛn, siipirɛ tíire, níì cán sɛdiri tíiri n too, tiitɔnɔ-cǎnyi n kálagi! Yaa cɛ́ɛn, Basyan syɛni tíiri, níì cán kákpotɔngi n jaa!

³ Bànaʔabèle cɛ́ɛnmɛ i lúro, níì cán pe nìjanri n kálagi. Càarabiiyi kaanama i lúro, níì cán Zyuridɛn nɛ̀ɛnyɛnɛgi n kálagi.

Bànaʔabèle siin kéele

⁴ Yawe mii Kolocɔlɔw n jo: «Da bǎbèle nàʔá, bele be yaʔa kaàkpoo-tɛ́ɛgi yɛ́ʔɛ na lè!

⁵ Bele be be syoo lè, pe i be kɔnɔgi, wɔʔɔlɔ si o nangi be na í. Bele be be pára lè, pe myɛ nibin nibin i gi nyuu níì jo: ‹Yawe n yɛlɛ waa wi kpɔ̀ʔɔrɔ́ níì cán mii n lɔrɔ taa!› Pe nyínimi ga téè be nàʔafɔwaa taa í.

⁶ Níì cán mii a ní tée nyinimɛ taa tári syɛ̀ɛnnɛ na í,» Yawe wi jo nya. «Wéle, mii tiimaa a syɔɔn ye le peyɛɛ kɔ́yi ni, ní be fànʔafɔw kɔ́yɔ ni. Pe a tári cɔ̀nʔɔ cɔ̀nʔɔ. Mii si a be yirige be kɔ́yi ni í.»

⁷ Lǎli bee ni a mii pye bǎbèle nàʔafɔlɔ, bele be yaʔa kaàkpoo-tɛ́ɛgi yɛ́ʔɛ na lè, poro bele be tɔ̀nɔ n pye foomɔ wòolo ní n sɔ̀lɔ bǎbèle bele na lè. Mii n bànaʔa-kpèegēle siin láa, a mii i làa yiri tàmaga, ní i lee yiri Pínɛnyɛnnɛgɛ, a mii i bǎbèle nàʔá.

⁸ Mii n bànaʔabèle taanri láʔa yaà yeʔe nibin fúngo ni. Mii da níì pye bi gbǎn be kpàraco í, mii láagi maa wɔ́ɔ̀ wòlo be ni.

⁹ Lǎli bee ni a mii jo: «Mii a ní da yele nàʔá í! Wee wi ga ni caa bi kùu lè, wi kùu, wee wi ga ni caa bi kwɔ́ɔ gi ni lè, wi kwɔ́ɔ gi ni, bele be kòro lè, poro sáā peyɛɛ gáa!»

¹⁰ A mii mii bànaʔa-kpèeli láa, lee mɛ́ʔɛ gi lè Tàmagi, n li kabi bi mii joogaanni sàa, lee mii da kpéʔele ní syɛɛnfeleyi myɛ ní lè.

¹¹ A li si wɔ́ɔ̀ sàa cángi bee. Bǎbèle be pye foomɔ wòolo ní n sɔ̀lɔ pe myɛ na lè, níì be yákiriw yaʔa mii na, a poro gi cán Yawe syɛ́ɛnri ti da pye.

¹² Mii n be pye: «Ki ga yɛlɛ yele ma ye mii sàraw kaan mii ma. Koro ga jáa yele a kɔ́ wi kaan í.» A be wálifiio támabéle toko ní kpɔrigɔ cáan cúlow na n pye mii sàraw.

¹³ A Yawe mii pye: «Wi wáa cóofaanw ma, sàrakpɔɔw bee be tímana mii kéeli na lè woro wii!» A mii wálifiiw bee támabéle toko ní kpɔrigɔ syɔɔ n sáà wáa cóofaanw ma Yawe kpáagi ni.

¹⁴ Koro kàdoʔo ma a mii mii bànaʔa-kpèeziin wóli kabi, lee mɛ́ʔɛ gi nyɛ lè Pínɛnyɛnnɛgɛ, koro ga pye bi Zyuda ní Isirayɛli ye senyɛnnɛgi ceri.

¹⁵ A Yawe mii pye: «Ní mi bànaʔa-nilabalaga yárira láa!

¹⁶ Níì cán wéle, mii tiimaa a bànaʔawaa yìrige tári ni, bǎbèle be kwɔ́ɔ gi ni lè, pe kéeli a tée wári wi na í. Bǎwee wi cɛ́rɛ n sɔ̀lɔ lè wi a tée kári sa wee bee caa í, wi a tée wogbaliw pɔʔɔ í, wi a wɔ́ɔ lìile kaan wee má wi cólogo lè í. Kàjáa wi a ra sǐnmi wòolo káara káa fwɔɔ bàā be fèriyi sulugu.

¹⁷ Wɔʔɔli a pye nyùngo fun bànaʔaw na, woro wee wi bǎbèle wáa ni yaari lè! Ki n yɛlɛ ŋɔséew í nan wi kɔ́gi, ní wi kàliige nyapili na! Ki n yɛlɛ wi kɔ́gi í waʔa péw, wi kàliige nyapili í fùn táari!»