Zakarii 10 - Cebaara Bible 2010

Yawe má syɔɔn yɛlɛ bàā nyɛ́ɛri yasunyi ma ban í

¹ Ye Yawe nyɛ́ɛri waa zěgi cáan nyìnbegèle nyɔ́ɔ na ki lǎli ni! Yawe a káfalagi yìrige bi zěkpolo-pàlaya cáan be ma, si yáriri fìin be séyi ni.

² Níì cán ǹdebiigèle yele yíbe lè ke syɛɛnlurugori i nyɛ jànvaa, kanyaabèle i jànvaa yanyaayi kéele nyuu ni tèé, pe ŋúnɔyi joolo i nyɛ jànvaa syɛ́ɛnrɛ, pe kɛɛlɛli syɛ́ɛnrɛ si i nyɛ fúu. Koro na be curugu ni máari àmɛɛ yaweeyiligēle nyɛ lè, pe i nyɛ foomɔ wòolo ní, níì cán nàʔafɔlɔ o nyɛ be na í.

Syɔɔli nyɔɔfaliga kéele

³ «Mii fúngi n tanʔa gbanʔama bànaʔabèle kurugo, mii a keele tɛ́ʔɛ sikepɔbèle na. Ncan Yawe wi lè Nyɛ̀ʔɛni Sùlasiibéle Kafɔlɔ, wi a pan ba kacànna kpéʔele wi yaweeri gboolo na, pe lè Zyuda kpáagi wòolo, wi a be pye àmɛɛ wiyɛɛ kpɔ́ɔmɔ syɔ́nʔɔ nyɛ lè kapɛɛnnɛ na,

⁴ Zyuda ni kpáagi jɛ̀ɛ́nnɛ kadɛnɛgɛ a yiri, woro ni cèferili a yiri, woro ni kapɛɛnni sedege a yiri. Woro ni kùndigibèle myɛ a pínɛ yiri.

⁵ Pe a pye àmɛɛ nànniribēle nyɛ lè, bàā kàlari-kóloyi fáriga tánʔana kapɛɛnni ni. Pe a ra kapɛɛnni kpúmɔn, níì cán Yawe a pye ní be ní. Bele be lúgu syɔ́ɔnyi na lè fɛ̀ɛ́ri si poro tɔ́n.

⁶ Mii a Zyuda kpáagi fànʔa kpɔ́ʔɔ, si Zyozɛfu kpáagi syɔɔ. Mii a ní be sámaga télege, níì cán pe nyínimi i nyɛ mii na, pe a pye mɔ a jo mii da be cée í. Níì cán mii wi nyɛ Yawe be Kolocɔlɔw, mii a lóʔo be ma.

⁷ Efirayimi ye a pye àmɛɛ nànnirio nyɛ lè. Pe fúnyi a pye fundaanra na, àmɛɛ dùvɛɛnw wogaanra nyɛ lè. Pe jáabèle a koro nyaa sáā muguri, pe fúnyi a nyìn fundaanri na Yawe ni.

⁸ Mii a féfeeli wìi bi be kpóʔoro, níì cán mii n be nyúnyi syɔɔ, pe a ra nɛʔɛgi àmɛɛ pe da séli ni nɛʔɛgi lè.

⁹ Mii a be cariga bi lége syɛɛnfeleyi nínge ni, bi be yaʔa yaà léelige, pe a ra sɔ̀ngí da taagi mii na, pe ní be jáabèle a kòro sìi na, pe a lúru pan.

¹⁰ Mii a be yirige Ezyipiti tári ni, pe lúru pan, bi be yirige Asirii tári ni bi kpóʔoro peyɛɛ na. Mii a pan ní be ní Galaadi tári, ní Liban ma, tɛɛ̀tɛnɛgi a be yɛlɛ í.

¹¹ Pe a gàlagíw solomɔ lɔ́ʔɔ jeli, wi a sólomi lɔ̀ʔɔ kùnguruyo kpúmɔn, Niili tɛɛcùruyi myɛ si a waʔa. Asirii nɛ̀ɛnyɛnɛgi a kpúmɔn cáan, Ezyipiti fǎngi kàgbeele a wàlí láʔa yaà.

¹² Mii a be kpéʔele nànniribēle Yawe ni, pe a ra táanri wi mɛ́ɛgi na.» Yawe wi jo nya.