Zakarii 1 - Cebaara Bible 2010

ZAKARII YANYAAYI ( 1:1—8:23 ) Yawe i Isirayɛli ye yiri

¹ Dariyusi fǎngi yɛɛziin wólo yeye kɔrɔtaanri wógi na, a Yawe syɛ́ɛnri nan kanyaajoow Zakarii na, wi lè Berekiya jáaw, Berekiya wi lè Ido jáaw, wi n jo:

² «Yawe fúngi maa tɔ̀nɔ n tanʔa gbanʔama yele tóolɛɛbèle kurugo.

³ Ki joo be ma mi be pye: ‹Yawe wi lè Nyɛ̀ʔɛni Sùlasiibéle Kafɔlɔ wi n jo: Ye lúru mii ma, mii a wɔ́ɔ lúru yele ma.› Yawe wi lè Nyɛ̀ʔɛni Sùlasiibéle Kafɔlɔ woro wi jo nya.

⁴ ‹Yele a kɔ́ pye àmɛɛ yele tóolɛɛbèle da pye lè í, poro bele má booma kanyaajoobèle da ni gi nyuu lè níì jo: Yawe wi lè Nyɛ̀ʔɛni Sùlasiibéle Kafɔlɔ wi n jo: Ye láʔa yele kóbeeyi, ní yele nàʔabeemi na. Kàjáa pe ga lóʔo í, pe ga líiyi cáan n lóʔo mii ma í, Yawe wi jo nya.

⁵ A yele tóolɛɛbèle, sán be nyɛ? A kanyaajoobèle a dée gbǎn kòro lé beè sìi na làla o làla?

⁶ Syɛɛnjóori, ní làlwaw kèlē si mii da joo mii falipyebèle ma, pe lè kanyaajoobèle, gele bee ga nan yele tóolɛɛbèle na ì? Pe n lúru n pan níì gi joo níì jo: Yawe wi lè Nyɛ̀ʔɛni Sùlasiibéle Kafɔlɔ, wi n wolo cò n yɛlɛ ní gi ní àmɛɛ wi da gi kɔ̀rirɔ n tímana bi kpéʔele wolo na lè n yɛlɛ ní wolo tánʔaganmi, ní wolo nàʔami ní.› »

Yanyaazeligi: Syɔ́ɔnyi kéele

⁷ Dariyusi fǎngi yɛɛziin wólo, yeye kɛɛ ní nibin wógi na, ki lè Syebati yégi, koro canya toko ní sicɛrɛ wógi na, a Yawe syɛ́ɛnri nan kanyaajoow Zakarii na, wi lè Berekiya jáaw, Berekiya wi lè Ido jáaw, a Zakarii jo:

⁸ Mii n yanyaʔa nyaa yébiligi ni, koro gi nyɛ gee naa: Mii maa nànwaa nyaa a wi lúgu syɔɔnnyɛnʔɛ na, ní i nyɛ woyéreo ní miiriti tíiri nínge ni, jǐnweʔe ni. Syɔɔnnyɛɛnyɛ, ní wogbɔ́nɔ-kpɔnɔyɔ, ní woviiye maa pye wi kàdoʔo ma.

⁹ A mii jo: «Yìí yi nyɛ yee naa, ni kàfɔlɔ?» Nyɛ̀ʔɛni tunduɔn wi da ni nyuu ní mii ní lè, a woro mii pye: «Mii a gi yaʔa mɔ í gi nyaa, yee yi nyɛ lè.»

¹⁰ Nǎnwee wi pye lè woyéreo ní miiriti tíiri nínge ni, a woro gi joo níì jo: «Bele Yawe tun be tári fǎn màʔa lè, poro bɛɛ.»

¹¹ A pe gi jo Yawe nyɛ̀ʔɛni tundunwee má wi pye lè woyéreo ní miiriti tíiri nínge ni níì jo: «Wolo n tári fàn n màʔa, wéle, tári myɛ i nyɛ ŋɔ́ndaala na, níì tɛ́ɛn sági.»

¹² Lǎli bee ni, a Yawe nyɛ̀ʔɛni tunduɔn syɛ́ɛnri láa n gi joo níì jo: «Ee Yawe, mɔ wi lè Nyɛ̀ʔɛni Sùlasiibéle Kafɔlɔ, làla jòorí mɔ a pye nyinimɛ fun Zyerusalɛmi, ní Zyuda kěyi kéele na, yoro yee kurugo mɔ fúngi tanʔa lè gbanʔama nlaa yaà yɛ̀ʔɛlɛ togoye taanri ní kpɔrigɔ fúngo ni?»

¹³ Nyɛ̀ʔɛni tunduɔn wi da ni nyuu ní mii ní lè, a Yawe syɛɛntaanra, ní kɛɛlɛlɛ syɛ́ɛnrɛ joo wi ma syɛɛnlurugori.

Yawe a ní Zyerusalɛmi nyɛ́nɛ wòlo

¹⁴ Nyɛ̀ʔɛni tunduɔn wi da ni nyuu ní mii ní lè, a woro mii pye: «Yákpoli wáa mi gi joo mí jo: ‹Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: Zyerusalɛmi, ní Siyɔn yéjaagi tɔ̀nɔ́ i nyɛ mii ni.

¹⁵ Mii fúngi si n tanʔa gbanʔama syɛɛnfeleyi kurugo, yoro yee yi tága yiyɛɛ na lè. Níì cán mii fúngi maa tanʔa cɛɛri, kàjáa a yoro kàa fàra wɔʔɔgi na.›

¹⁶ Gee bee na Yawe syɛ́ɛnri naa joo níì jo: ‹Mii a lúru pan Zyerusalɛmi ma ní nyinidaara ní. Mii kpɔ̀ʔɔrɔli kpaʔa a ní faan gi ni.› Yawe wi lè Nyɛ̀ʔɛni Sùlasiibéle Kafɔlɔ, woro wi jo nya, ‹Yatimana-mɛ́ɛnni a ní sánʔa cáan Zyerusalɛmi na.›

¹⁷ Ní mi gee naa joo mí jo: ‹Yawe wi lè Nyɛ̀ʔɛni Sùlasiibéle Kafɔlɔ, wi n jo: Mii kěyi a ní nyìn lɔ́ri na bi sɔ̀lɔ, Yawe a ní Siyɔn kpɛʔɛlɛ, wi a ní Zyerusalɛmi nyɛ́nɛ wòlo.› »