Yirile 40 - Cebaara Bible 2010

Fànikpaagi kórilo, ní gi kàlifaali Kolocɔlɔɔ ma

¹ A Yawe gi joo Mowizi ma níì jo:

² «Yɛ́ɛli yézelige cânzelige na, ki n yɛlɛ mi kpɔ̀ʔɔrɔli fànikpaʔa kóri, ki lè Syɛ́ɛnmi Tɛɛfaraga fànikpaʔa.

³ Mí séeraw kásu tɛ́ʔɛ yaà, mí wi sùlu ní fànipariw ní.

⁴ Mí pan ní tàbaliw ní mi ba wi yáriri sámaga mi taʔa wi na. Mí pan ní fètindaʔali ní, mí ba fètingèle taani li na.

⁵ Mí nùndaanni yárira sórigolo tɛɛ̀ sáriga-wòlo-yafanʔa tɛ́ʔɛ séeraw kásu yɛ́ʔɛ ma, mí fànipariw tɔ́n kpɔ̀ʔɔrɔli fànikpaʔa kpaaweele na.

⁶ Mí sáriga-sórigow sáriga-wòlo-yafanʔa tɛ́ʔɛ kpɔ̀ʔɔrɔli fànikpaʔa tɛɛ̀jeele yɛ́ʔɛ ma ki lè Syɛ́ɛnmi Tɛɛfaraga fànikpaʔa.

⁷ Mí pɛɛkpɔɔgi tɛ́ʔɛ Syɛ́ɛnmi Tɛɛfaraga fànikpaʔa, ní sáriga-wòlo-yafaangi lariga ni, mí lɔ̀ʔɔ le gi ni.

⁸ Mí kàcooli sùlu mi màʔa mi kpàra, mí li kpàánweetɔn-fàniw tɛ́ʔɛ mi li kpàánweeli tɔ́n.

⁹ Mí kàlifaali sìnmɛ láa mi pàa wo kpɔ̀ʔɔrɔli fànikpaʔa, ní yáriri myɛ na di nyɛ gi ni lè, bi ki ní gi yayigeleri myɛ sámaga nyɔɔ, ki a pye yacanga.

¹⁰ Mí pàa wo sáriga-sórigow sáriga-wòlo-yafanʔa, ní gi yayigeleri myɛ na, bi sáriga-wòlo-yafaangi sámaga yaʔa Kolocɔlɔɔ ma. Kánmi bee na sáriga-wòlo-yafaangi a pye yacandelege.

¹¹ Mí pàa wo pɛɛkpɔɔgi ní gi nɔ́gi na, bi gi sámaga yaʔa Kolocɔlɔɔ ma.

¹² Mí pan ní Aarɔn, ní wi jáabèle ní Syɛ́ɛnmi Tɛɛfaraga fànikpaʔa kpaaweele ma mi ba be wéli ní lǒgi ní.

¹³ Mí sáriga-wòlo-yaleri le Aarɔn na, mí sǐnmi wo wi na mi wi sámaga mi yaʔa kɔlɔ̀ na waa sáriga-wòlori fáli kpéʔele.

¹⁴ Mí wɔ́ɔ pan ní wi jáabèle ní mi ba burodɔnɔyɔ le be na.

¹⁵ Mí sǐnmi wo be na àmɛɛ mɔ bi wo be tóow na lè, koro ga pye paa sáriga-wòlori fáli kpéʔele mii ma sìnwori bee báriga ni. Gee bee a be lége sáriga-wòlori fáli ni pe yìrigèle myɛ syɛ̀ɛnnɛ ni, kwɔ́ɔmɔ fun.»

Mowizi n be pye a be kpɔ̀ʔɔrɔli fànikpaʔa kóri

¹⁶ Gee myɛ Yawe da joo n gbàn Mowizi ma lè, a wi gi kpéʔele.

¹⁷ Yɛɛziin wóli yézelige cânzelige na a be kpɔ̀ʔɔrɔli fànikpaʔa kóri.

¹⁸ Mowizi n kpɔ̀ʔɔrɔli fànikpaʔa kóri. Wi maa gi yataʔayi tɛ́ʔɛ tɛ́ʔɛ, níì gi tiikpakpaayi yérige, níì tiipalagèle le le, níì gàángèle yérige yérige.

¹⁹ A Mowizi fànikpoloyi tɔ́n kpɔ̀ʔɔrɔli fànikpaʔa na, ní náà gi ǹjogi yatɔngɔ taʔa gi na n yɛlɛ ní gi ní àmɛɛ Yawe da gi joo n gbàn wi ma lè.

²⁰ A wi séeraw kàlagorigēle láa n le kásuw ni, níì tiingèle le kásuw na, níì yatɔngi tɔ́n wi na ki lè kapeegèle kùsulugo tɛ́ʔɛ.

²¹ A wi kásuw láa n sáà lége kpɔ̀ʔɔrɔli fànikpaʔa ni níì fànipariw tɛ́ʔɛ n Séeraw kásu sùlu n wáa yaà n yɛlɛ ní gi ní àmɛɛ Yawe da gi joo n gbàn wi ma lè.

²² A Mowizi tàbaliw tɛ́ʔɛ Syɛ́ɛnmi Tɛɛfaraga fànikpaʔa ni, ki lè kpɔ̀ʔɔrɔli fànikpaʔa, koro solomɔkulo kàbangi na, fànipariw màʔama na.

²³ A Mowizi búruw taani wi na Yawe yɛ́ʔɛ ma n yɛlɛ ní gi ní àmɛɛ Yawe da gi joo n gbàn wi ma lè.

²⁴ A wi fètindaʔali tɛ́ʔɛ Syɛ́ɛnmi Tɛɛfaraga fànikpaʔa ni, tàbaliw yɛ́ʔɛ ma, kpɔ̀ʔɔrɔli fànikpaʔa worogulo kàbangi na.

²⁵ Níì fètingèle le Yawe yɛ́ʔɛ ma n yɛlɛ ní gi ní àmɛɛ Yawe da gi joo n gbàn wi ma lè.

²⁶ A wi tɛ́ɛw sáriga-wòlo-yafanʔa lége n tɛ́ʔɛ Syɛ́ɛnmi Tɛɛfaraga fànikpaʔa ni, fànipariw màʔama na,

²⁷ níì nùndaanni yáriga sórigo gi na n yɛlɛ ní gi ní àmɛɛ Yawe da gi joo n gbàn woro Mowizi ma lè.

²⁸ A wi kpaaweetɔn-fàniw tɛ́ʔɛ n kpɔ̀ʔɔrɔli fànikpaʔa kpaaweele tɔ́n.

²⁹ A Mowizi sáriga-sórigow sáriga-wòlo-yafanʔa tɛ́ʔɛ kpɔ̀ʔɔrɔli fànikpaʔa yɛ́ʔɛ ma ki lè Syɛ́ɛnmi Tɛɛfaraga fànikpaʔa, níì sáriga-sórigow, ní míimi sáriga wòlo gi na, n yɛlɛ ní gi ní àmɛɛ Yawe da gi joo n gbàn wi ma lè.

³⁰ A wi pɛɛkpɔɔgi tɛ́ʔɛ Syɛ́ɛnmi Tɛɛfaraga fànikpaʔa, ní sáriga-wòlo-yafaangi lariga ni, níì lɔ̀ʔɔ le gi ni jéemununi kéele na.

³¹ A Mowizi, ní Aarɔn, ní wi jáabèle kɔ́yi, ní tɔ́lɔyi jée gi ni.

³² Lǎli ni pe ga naà jée Syɛ́ɛnmi Tɛɛfaraga fànikpaʔa ni lè, wàlá bi nùuni sáriga-wòlo-yafaangi na lè, pe n peyɛɛ jée bi yɛlɛ ní gi ní àmɛɛ Yawe da gi joo n gbàn Mowizi ma lè.

³³ A wi kàcooli sùlu n kpɔ̀ʔɔrɔli fànikpaʔa, ní sáriga-wòlo-yafaangi màʔa, níì kpaaweetɔn-fàniw tɔ́n kàcooli kpàánweele na. Kánmi bee na Mowizi fáliw myɛ kpéʔele n kwɔ́ɔ.

Yawe nìjangbɔɔri n fànikpaagi nyìn

³⁴ Lǎli bee ni a fàfaangi tìgi n baa Syɛ́ɛnmi Tɛɛfaraga fànikpaʔa tɔ́n. A Yawe nìjangbɔɔri kpɔ̀ʔɔrɔli fànikpaʔa nyìn.

³⁵ Mowizi ga pye bi gbǎn jée Syɛ́ɛnmi Tɛɛfaraga fànikpaʔa ni í, níì cán fàfaangi maa kòro gi na, á Yawe nìjangbɔɔri kpɔ̀ʔɔrɔli fànikpaʔa nyìn.

³⁶ Fàfaangi ga yìri kpɔ̀ʔɔrɔli fànikpaʔa njoʔo ni lǎli ni lè, Isirayɛli ye n yìri n kári yɛʔɛ̀ ma. Kánmi bee na be tánʔagèle myɛ da pye.

³⁷ Fàfaangi si ga pye ki ga yìri í, pe o gáà yìri í fwɔɔ bi taa cángee na ki ga baa yìri lè.

³⁸ Yawe fàfaangi maa pye kpɔ̀ʔɔrɔli fànikpaʔa njoʔo ni cángi làla ni. Ki si ga pye yébiligi ni, ki n pye naà Isirayɛli kpáagi wòolo myɛ nyɛ́nɛ na, pe tánʔagèle myɛ ni.