Yirile 37 - Cebaara Bible 2010

Joogaanni kásu kéele

¹ A Besaleyɛli kásuw sámaga ní akasya tíire ní. Wi tɔnɔganmi maa pye mɛ́tiri nibin ní santimɛtiribéle toko ní kagunɔ. Wi yɛ́ɛgi kpɔ́ʔɔganma si i nyɛ santimɛtiribéle togoye taanri ní kpɔrigɔ ní kagunɔ. A wi ǹjogi tɔnɔganma wɔ́ɔ̀ pye santimɛtiribéle togoye taanri ní kpɔrigɔ ní kagunɔ.

² A wi wi tɛ́ɛyi myɛ tɔ́n ní tɛɛteleo ní, n fúngi pínɛ kàdogi ní, níì wi nyɔɔwari pye tɛɛ̀ n wi màʔa n kpàra.

³ A wi tɛɛwaa gbàla n vèʔeye sicɛrɛ sámaga n táriga wi jɛ̀ɛ́ngèle sicɛrɛ na. Vèʔeye siin maa pye kàbangee na, a yàa siin i nyɛ kàbangee na.

⁴ A wi tiingéle sámaga akasya tíire woʔolo, níì ge tɛ́ɛyi myɛ tɔ́n ní tɛɛ̀ ní.

⁵ A wi tiingèle foro foro vèʔeyi ni, kásuw lɛ̀ʔɛgēle ni, jàngó bàā kásuw lée.

⁶ A wi kapeegèle kùsulugo tɛ́ʔɛ sámaga ní tɛɛteleo ní. Ki tɔnɔganmi maa pye mɛ́tiri nibin ní santimɛtiribéle toko ní kagunɔ. Ki yɛ́ɛgi kpɔ́ʔɔganma si i nyɛ santimɛtiribéle togoye taanri ní kpɔrigɔ ní kagunɔ.

⁷ A wi syerubɛnbéle siin sámaga kapeegèle kùsulugo tɛ́ʔɛ láʔagéle siin na ní tɛɛ̀ ní, wee be kpúmɔn lè.

⁸ Wi maa syerubɛnwaa yérige láʔalee na níì wee yérige lee na. Wi maa syerubɛnbèle sámaga n pínɛ ní kapeegèle kùsulugo tɛ́ʔɛ láʔagéle ní.

⁹ A syerubɛnbèle bee be fókaanyi yìrige ǹjogi ni n tɛ́ʔɛ n kapeegèle kùsulugo tɛ́ʔɛ tɔ́n. Níì yɛ́ɛyi wáa peyɛɛ ma. Syerubɛnbèle maa yɛ́ɛyi le kapeegèle kùsulugo tɛ́ʔɛ ni.

Búruw wi kaan Kolocɔlɔɔ ma lè wi tàbaliw

¹⁰ A wi tàbali sámaga akasya tíire wóo. Wi tɔnɔganmi maa pye mɛ́tiri nibin. Wi yɛ́ɛgi kpɔ́ʔɔganma si i nyɛ mɛ́tiri tíla. Wi ǹjogi tɔnɔganma si i nyɛ santimɛtiribéle togoye taanri ní kpɔrigɔ ní kagunɔ.

¹¹ A wi tɛɛteleo tɛ́ʔɛ n wi tɛ́ɛyi myɛ tɔ́n, níì wi nyɔɔwari pye tɛɛ̀ n wi màʔa n kpàra.

¹² A wi kádiri sámaga n wi màʔa n kpàra. Wi yɛ́ɛgi kpɔ́ʔɔganma maa pye santimɛtiribéle kɔrɔtaanri, níì tɛɛ̀ pye kádiriw nyɔ́ɔwara n wi màʔa n kpàra.

¹³ A wi tɛɛ̀ kpúmɔn n pye vèʔeye sicɛrɛ tàbaliw kéele na, níì vèʔeyi táriga jɛ̀ɛ́ngéle sicɛrɛ na n yɛlɛ ní tɔ́lɔyi sicɛrɛ ní.

¹⁴ Vèʔeyi maa pye kádiriw láara ni, a be i tíingèle nii nɛɛ bee ni tàbaliw lée.

¹⁵ A wi tiingéle sámaga akasya tíire woʔolo, níì tɛɛ̀ tɛ́ʔɛ n ge tɛ́ɛyi myɛ tɔ́n. A koro pye tàbaliw láala kéele na.

¹⁶ Yayigeleri di yɛlɛ paa taari tàbaliw na lè, a wi toro sámaga, di lè wi tásaayi, ní wi yagbaagèle, ní wi yalegèle ní, n fàra wi pɛ́ɛgèle na sáriga-yólogow kéele na. Wi maa di sámaga ní tɛɛteleo ní.

Fètingɔyi kɔrɔsiin fetindaʔala kéele

¹⁷ A wi fètindaʔali sámaga ní tɛɛteleo ní. Wi n li sámaga ní tɛɛ̀ ní, wee be kpúmɔn lè. Li nɔ́gi ní li fètinganagi, ní li yalegèle, ní li puungèle, ní li tiifyɛɛnri niwiriye myɛ maa sámaga n pínɛ ní fètindaʔali ní.

¹⁸ Fètingɔyɔ kɔrɔni maa yirige fètinganagi na lɛ̀ʔɛgèle ni. Wi maa kɔyɔ taanri yirige n pye fètindaʔali lɛ̀ʔɛlee ni, a yàa taanri pye fètindaʔali lɛ̀ʔɛlee ni.

¹⁹ Amandi niwiriye yalegéle taanri, ní puungéle, ní tiifyɛɛnrɛ niwiriye maa pye fètingɔgɔ nibin na. A amandi niwiriye yalegèle kèle taanri, ní puungèle kèle, ní tiifyɛɛnri niwiriyaa wɔ́ɔ̀ pye fètingɔgee na. Fètingɔyi kɔrɔni pe yirige fètinganagi na lè, ànbée pe da yi pye.

²⁰ Gee si gi fètinganagi tiimaa kéele kwɔ́ɔ lè, amandi niwiriye yalegéle sicɛrɛ maa pye gee bee na n fàra ki puungèle, ní gi tiifyɛɛnri niwiriye na.

²¹ Puunnɔ nibin n pye fètingɔ-séliyi siin tɛɛwàliga láara ni, fètinganagi na, a puunnaa pye fètingɔyee siin tɛɛwàliga láara ni, fètinganagi na, á puundaanri wóli pye fètingɔyee siin tɛɛwàliga láara ni. Kánmi bee na fètindaʔali fètingɔyɔ kɔrɔni da pye.

²² Fètinni puungéle ní li fètingɔyi maa sámaga n pínɛ nibin. Li woboli myɛ n pye tɛɛ̀, wee be kpúmɔn lè, li n pye tɛɛteleo wólo.

²³ A wi li fètingèle kɔrɔsiin, ní li lele yáriri, ní li cɔɔnkoli-yáriri sámaga ní tɛɛteleo ní.

²⁴ Tɛɛteleo cúlobéle toko ní kpɔrigɔ wi da tɛ́ʔɛ n fètindaʔali ní li yayigeleri myɛ sámaga.

Nùndaanni yasorigoro sáriga-wòlo-yafanʔa

²⁵ A wi nùndaanni yasorigoro sáriga-wòlo-yafanʔa sámaga ní akasya tíire ní. Ki tɔnɔganmi maa pye mɛ́tiri tíla. Ki kpɔ́ʔɔganmi si wɔ́ɔ i nyɛ mɛ́tiri tíla. Ki tɔnɔganmi ní gi yɛ́ɛgi kpɔ́ʔɔganma maa pye sèjira. Ki ǹjogi tɔnɔganma si i nyɛ mɛ́tiri nibin. Ki nyɛ́ngèle maa sámaga n pínɛ ní gi ní.

²⁶ A wi tɛɛteleo tɛ́ʔɛ n gi tɛ́ɛyi myɛ tɔ́n, ki ǹjogi, ní gi lɛ̀ʔɛgèle myɛ, n fàra gi nyɛ́ngèle na n gi màʔa. Níì tɛɛwaa sámaga gi nyɔɔwari n gi màʔa.

²⁷ Níì tɛɛ̀ vèʔeye pye ki nyɔɔwari láara ni, ki lɛ̀ʔɛgèle siin na. Wi maa yàa siin pye kàbangee na, níì yàa siin pye kàbangee na. Tíingèle ní pe a ra gi lée lè, a vèʔeyi bee pye tíingèle bee tɛɛleye ki láali kéele na.

²⁸ A wi tíingéle sámaga akasya tíire woʔolo, níì tɛɛ̀ tɛ́ʔɛ n ge tɛ́ɛyi myɛ tɔ́n.

²⁹ A wi syɔɔn kalifaali sìnmɛ sámaga n fàra nùndaanni yáriga wodelege na, n yɛlɛ ní nùndaanna yáriga sámagafɔlɔ falipyeganma ní.