Yirile 36 - Cebaara Bible 2010

¹ Besaleyɛli ní Oholiyabi, ní nǎnbèle myɛ be pye lè fáliw cánvɔɔlɔ, poro bele myɛ má Yawe sícilimɛ ní cánna kaan lè, koro ga pye be Kolocɔlɔɔ kpɔ̀ʔɔrɔli tɛ́ɛcànga fáli myɛ kpéʔele, poro a fáliw bee kpéʔele foro, wee kéele Yawe joo n gbàn lè.»

² A Mowizi Besaleyɛli ní Oholiyabi yeri n fàra nǎnbèle bele myɛ na be nyɛ lè fáliw cánvɔɔlɔ, poro bele fúnyo ni Yawe sícilimɛ le lè, poro bele myɛ fúnyo ni gi pye lè bi fáliw sámaga kpéʔele foro.

³ Yakaanree myɛ Isirayɛli ye da ni láʔala lè n ba ni kaangi tɛɛcǎngi fáli kéele na, a falipyebèle bee i syée n sa ni dee bee lée Mowizi yɛ́ʔɛ ma. Syɛ́ɛnbèle maa ni maa canʔa o canʔa nyɛ̀ʔɛ nyɔ́ɔ na ní kínidɛnɛgi yakaanra ní Mowizi ma.

⁴ Lǎli bee ni nǎnbèle be pye lè fáliw cánvɔɔlɔ, ni Kolocɔlɔɔ kpɔ̀ʔɔrɔli tɛɛcànga fáli kpéʔele, a poro myɛ nibin nibin fáliw yaʔa yaà,

⁵ ní baa gi joo Mowizi ma níì jo: «Kpɔ̀ʔɔrɔli tɛ́ɛcànga sámagala kéele Yawe joo n gbàn lè níì jo gi kpéʔele, syɛ́ɛnbèle i maa ní gi sámagali yárira ní a di nɛʔɛ n baa sɔ̀lɔ fáliw kánma na.»

⁶ A Mowizi tun níì jo pe nyaari be sɔ̀lɔ syɛ́ɛnmi tɛ́ɛkòrogo ni pe gi jáari pe jo: «Nàɔn yoo cɔlɔɔ yoo, syɔɔn faala ga yɛlɛ wi ní pan ní yakanʔa ní, gee wi a wòlo bi kaan kpɔ̀ʔɔrɔli tɛ́ɛcànga fáli kéele na lè í.» Kánmi bee na be syɛ́ɛnbèle yérige, wàa ga níì pan ní yarigaa ní í.

⁷ Yáriree pe da kaan lè, a toro fáliw kwɔ́ɔ, a tàa kòro.

Tɛɛkòrojǎngi kéele

⁸ Nǎnbèle bele myɛ be pye lè fáliw cánvɔɔlɔ, poro bele be fáliw kpéʔele lè, a poro kpɔ̀ʔɔrɔli fànikpaʔa sámaga ní fàniya kɛɛ ní, yi n pye lɛn fànifɛɛlɛfɛɛlɛɔ wóyo, yee be sára lè yi i nyɛ kɔ́luruna cére fàni, ní fàninyɛɛɔn, ní fàninyɛɛn-tèleo wóyo, níì syerubɛnbéle sámaga yi na, n yɛlɛ ní kacánbèle fálipyeganma ní.

⁹ Fàniyi myɛ nibin nibin tɔnɔganma n pye mɛ́tiribéle kɛɛ ní sicɛrɛ-jɛrɛ, yi yɛ́ɛyi kpóloganma si i nyɛ mɛ́tiribéle siin-ziin. Fàniyi myɛ tímanaganma n pye sèjira.

¹⁰ A be fàniyi bee yàa kagunɔ sogisogi yiyɛɛ na, níì yee kagunɔ sogisogi yiyɛɛ na.

¹¹ Fàniyee yi jɔli n sogi yiyɛɛ na lè, a be kɔ́luruna cére mɛnɛpiire kùru weegèlē n táriga yi nyɔ́ɔgi na. Ní wɔ́ɔ̀ gee bee wonijanga kpéʔele fànitɔnɔyee siin wóʔo nyɔ́ɔ na pe jɔli n sogi yiyɛɛ na lè.

¹² A be mɛnɛpiiraa togoye siin ní kpɔrigɔ kùru weegèlē n táriga fàniyee wozelige nyɔ́ɔ na, ní wɔ́ɔ̀ tàa togoye siin ní kpɔrigɔ kùru weegèlē n táriga siin wógi nyɔ́ɔ na. Mɛnɛpiiri bee wéegéle maa sín ní keyɛɛ ní.

¹³ A be tɛɛ̀ yakparagéle togoye siin ní kpɔrigɔ sámaga n tɛ́ʔɛ n fàniyi pínɛ n sogi yiyɛɛ na ní yakparagèle bee ní. A kpɔ̀ʔɔrɔli fànikpaʔa pínɛ n pye nibin.

¹⁴ A be fàniyaa sámaga sike-síire wóyo, yoro í pye kpɔ̀ʔɔrɔli fànikpaʔa yatɔngɔ. Yi maa pye fàniya kɛɛ ní nibin.

¹⁵ Fàniyi bee myɛ nibin nibin tɔnɔganma maa pye mɛ́tiribéle kɛɛ ní kagunɔ kagunɔ. Yi yɛ́ɛyi kpóloganma si i nyɛ mɛ́tiribéle siin-ziin. Fàniyi bee kɛɛ ní nibin tímanaganma maa pye sèjira.

¹⁶ A be fàniyi bee yàa kagunɔ sogisogi yiyɛɛ na níì yee kɔrɔni sogisogi yiyɛɛ na yi kologo.

¹⁷ Fàniyee kagunɔ be jɔli n sogisogi yiyɛɛ na lè, a be mɛnɛpiire togoye siin ní kpɔrigɔ kùru weegèlē n táriga kagunɔ wógi nyɔ́ɔ na. Yee kɔrɔni be jɔli n sogisogi yiyɛɛ na lè, a be wɔ́ɔ̀ mɛnɛpiiraa togoye siin ní kpɔrigɔ kùru weegèlē n táriga kɔrɔni wógi nyɔ́ɔ na.

¹⁸ A be kanyɛɛnrɛ yakparagéle togoye siin ní kpɔrigɔ sámaga n fàniyi bee sogi yiyɛɛ na, koro ga pye yi pye nibin.

¹⁹ A be yatɔngɔ sámaga fànikpaagi na ní bàpɔɔlɔ sáliya ní, yee be nyɛ́nɛgɛ lè, ní wɔ́ɔ̀ yatɔngaa sámaga ní dofɛn sáliya ní, n koro taʔa yee myɛ ǹjoʔo ni.

²⁰ A be tiikpakpaaya sámaga akasya tíire wóyo kpɔ̀ʔɔrɔli fànikpaʔa kéele na, níì yi yìrige n yérige.

²¹ Tiikpakpaayi myɛ nibin nibin tɔnɔganma maa pye mɛ́tiribéle kagunɔ kagunɔ. Yi yɛ́ɛyi kpóloganma si i nyɛ santimɛtiribéle togoye taanri ní kpɔrigɔ ní kagunɔ kagunɔ.

²² Tɔlɔyɔ siin-ziin maa pye tiikpakpaayi myɛ nibin nibin na, á be yi táriga yiyɛɛ na n kári. Kánmi bee na be Kolocɔlɔɔ kpɔ̀ʔɔrɔli fànikpaʔa tiikpakpaaya sámaga.

²³ Pe maa tiikpakpaaya toko sámaga wòrogulo kàbangi na kpɔ̀ʔɔrɔli fànikpaʔa kéele na.

²⁴ A be wálifiio yataʔaya togoye siin sámaga tiikpakpaayi toko láara ni. Yataʔaya siin-ziin yi pye tiikpakpaayi myɛ nibin nibin láara ni jàngó tiikpakpaʔa o tiikpakpaʔa tɔ́lɔyɔ siin í taʔa yee bee na.

²⁵ A be tiikpakpaaya toko pye kpɔ̀ʔɔrɔli fànikpaʔa kàbanziin wóʔo na, solomɔkulo kàbangi na,

²⁶ n fàra yi wálifiiw yataʔaya togoye siin na. Tiikpakpaʔa o tiikpakpaʔa maa yére yataʔaya siin na.

²⁷ Kpɔ̀ʔɔrɔli fànikpaʔa kadoʔo ma wi pye lè canʔajeemɛ kabangi, pe maa tiikpakpaaya kɔrɔni pye kàbangi bee na.

²⁸ A be tiikpakpaayaa siin pye canʔajeemɛ kabangi jɛ̀ɛ́ngéle na fungo ma.

²⁹ Pe maa yi sígi yiyɛɛ na táàma ní sáà yi fínaagèle cò n sámaga n táriga yiyɛɛ na ní vèʔege ní. Koro wonijangi pe da kpéʔele yee myɛ siinw na yi pye jɛ̀ɛ́ngèle siin na lè.

³⁰ Anbée tiikpakpaayi kɔrɔtaanri da pye, n fàra yi wálifiiw yataʔaya kɛɛ ní kɔrɔni na. Yataʔaya siin-ziin maa pye tiikpakpaayi myɛ nibin nibin láara ni.

³¹ A be tiipalagéle kagunɔ sámaga akasya tíire woʔolo kpɔ̀ʔɔrɔli fànikpaʔa lɛʔɛlee tiikpakpaaya kéele na,

³² tiipalagèle kèle kagunɔ si i nyɛ kpɔ̀ʔɔrɔli fànikpaʔa lɛʔɛziin wóli kàdoʔo ma tiikpakpaaya kéele na canʔajeemɛ kabangi na.

³³ A be níngi tiiparila sámaga, a loro foro tiikpakpaayi ni n séli láʔalee ma n sáà nan lee na.

³⁴ A be tiikpakpaayi tɛ́ɛyɛ myɛ tɔ́n ní tɛɛ̀ ní, níì yi vèʔeyi pye tɛɛ̀ wóyo jàngó tiipalagèle í foro nɛɛ bee, níì tiipalagèle tɛ́ɛyɛ myɛ tɔ́n ní tɛɛ̀ ní.

³⁵ A be fànipariw sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo, ní lɛn fànifɛɛlɛfɛɛlɛɔ ní, wee be sára lè, níì syerubɛnbéle sámaga fànipariw na n yɛlɛ ní kacánmi fálipyeganma ní.

³⁶ A be akasya tíire gaangéle sicɛrɛ sámaga wi kéeli na, níì tɛɛ̀ tɛ́ʔɛ n ge tɛ́ɛyi myɛ tɔ́n, n fàra tɛɛ̀ yacɔrɔgéle na. Níì wálifiio gbàla n kpéʔele gàángèle yataʔaya sicɛrɛ.

³⁷ A be fànikpaagi kpaaweetɔn-fàni sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè. Ki maa pye fàni súuro fálipyeganma na.

³⁸ A be wi gàángèle kagunɔ sámaga, n fàra ge yacɔrɔgèle na. A be tɛɛ̀ tɛ́ʔɛ n ge ǹjogi yataʔaya, ní ge vèʔeyi tɛ́ɛyɛ myɛ tɔ́n. Ke yataʔayi kagunɔ n pye kanyɛɛnrɛ.