Yirile 35 - Cebaara Bible 2010

TƐƐCANGI FAANNA KEELE Cândɛnɛgi i nyɛ cânŋɔndaʔa

¹ A Mowizi Isirayɛli syɛ́ɛnmi myɛ yeri n kpóʔoro ní baa be pye: «Gee Yawe joo n gbàn níì jo gi kpéʔele lè, koro gi nyɛ gee naa:

² Fáliw n yɛlɛ waa kpéʔele canya kɔrɔni fúngo ni, kàjáa canya kɔrɔsiin wógi n yɛlɛ gi pye cangaa gee yele yɛlɛ bi yaʔa kɔlɔ̀ na Kolocɔlɔɔ ma lè, koro gi nyɛ cândɛnɛgi, ki lè cânŋɔndaagi, gee gi yɛlɛ bi yaʔa Yawe ma lè. Syɔɔnwee wi ga fali kpéʔele lè cángi bee ni, ki n yɛlɛ pe wi kpóo.

³ Yele a kɔ́ naà le yele kàcoolaa faala ni cândɛnɛgi canʔa ni í.»

Isirayɛli ye i maa ní be yakaanri ní

⁴ A Mowizi gi joo Isirayɛli yòdaʔayi syɛ̀ɛnnɛ myɛ ma níì jo: «Gee Yawe níì joo n gbàn lè, koro gi nyɛ gee naa: Wi n jo:

⁵ ‹Ki n yɛlɛ ye tàa láʔala yele kɔ́lɔ yáriri na ye kaan mii Yawe ma. Syɔɔn o syɔɔn fúngo ni gi nyɛ bi mii kaan lè, waa maa ní yakaanri naa ní Yawe ma di lè tɛ́ɛw, ní wálifiiw, ní kanyɛɛnri,

⁶ ní kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fàni fɛ́ɛlɛfɛɛlɛw, n fàra sike-síiri na,

⁷ n wɔ́ɔ̀ fàra bàpɔbèle sáliya na pe nyɛ́nɛgɛ lè, ní dofɛn sáliyi, ní akasya tíiri,

⁸ ní fètinni sìnmɛ, ní nùndaanni yárira, dee bee a pye kàlifaali sìndíremɛ, ní nùndaanni yasorigoro sámagala kéele na,

⁹ ní onikisi kàdɛɛngèlē, n fàra kàdɛɛngèle kèle na, gele pe a táriga efɔdiw ní fìcibigi yáriga na lè.

¹⁰ Bele myɛ be nyɛ lè yele ni fáliw cánvɔɔlɔ, gee Yawe joo n gbàn lè, ki n yɛlɛ be pan pe ba gi myɛ kpéʔele ànbée.

¹¹ Koro gi nyɛ tɛɛkòrojǎngi, ní gi fànikpaagi, ní gi yatɔngi, ní gi yakparagèle, ní gi tiikpakpaayi, ní gi tiipalagèle, ní gi gàángèle, ní ge yataʔayi,

¹² ní joogaanni kásu, ní wi tíingèle, ní kapeegèle kùsulugo tɛ́ʔɛ, ní fànipariw,

¹³ ní tàbaliw, ní wi tíingèle, ní wi yayigeleri myɛ, ní búruw wi kaan Kolocɔlɔɔ ma lè,

¹⁴ ní fètindaʔali, ní li yayigeleri, ní li fètingbogèle, ní sǐnmi pi a pye lè fètinni kéele na,

¹⁵ ní nùndaanni yasorigoro sáriga-wòlo-yafanʔa, ní gi tíingèle, ní kàlifaali sìnmɛ, ní nùndaanni yárira, ní kpɔ̀ʔɔrɔli fànikpaʔa kpaaweetɔn-fàni,

¹⁶ ní sáriga-sórigow sáriga-wòlo-yafanʔa, ní gi kanyɛɛnri cɔ̀ɔ, ní gi tíingèle, ní gi yayigeleri myɛ, ní pɛɛkpɔɔgi, ní gi nɔ́gi,

¹⁷ ní kàcooli fàniya, ní li gàángèle, ní ge yataʔayi, ní kàcooli kpaaweetɔn-fàni,

¹⁸ ní kpɔ̀ʔɔrɔli fànikpaʔa ceferigéle, ní kàcooli cèferigéle, ní ge mɛ́ɛngèle,

¹⁹ ní tɛɛcǎngi falipye-buroyo, yi lè sáriga-wòlow Aarɔn sáriga-wòlori fáli búroyo yi yaʔa kɔlɔ̀ na Kolocɔlɔɔ ma lè, ní wi jáabèle búroyo, sáriga-wòlori fáli kéele na.› »

²⁰ A Isirayɛli syɛ́ɛnmi myɛ núngo Mowizi taana n kári.

²¹ Bele myɛ fúnyo ni ki da pye bi kaan lè, a be fúnyi tɔ̀nɔ n pye kaanni na, a bele bee pan ní be yakaanri ní Yawe ma Syɛ́ɛnmi Tɛɛfaraga fànikpaʔa fáli kéele na, ki fáliw myɛ kéele na, ní yaleri kéele na di yaʔa kɔlɔ̀ na Kolocɔlɔɔ ma lè.

²² A nǎnbèle i maa n wɔ́ɔ̀ fàra cébèle na. Bele myɛ fúnyo ni ki da pye bi kaan lè, a be i maa ní líiyi vèʔebēle, ní fínaagèle vèʔebēle, ní kabegèle vèʔebēle ní, n fàra kajingèle na. Kánmi bee na syɛ́ɛnbèle myɛ pan ní tɛɛ̀ yáriri ní n baa kaan Yawe ma sáriga-fíigeo.

²³ Bele myɛ ma kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fànifɛɛlɛfɛɛlɛw, ní sike-síiri pye lè n fàra bàpɔbèle sáliya na, yee be nyɛ́nɛgɛ lè, ní dofɛn sáliyi, a be pan ní dee bee ní.

²⁴ Bele myɛ pe da wálifiio wàlá kanyɛɛnrɛ láʔala lè n pye yakanʔa, a be pan ní yakaanri bee ní Yawe ma. Bele má akasya tíire da pye lè fáliw myɛ kpéʔelele kéele na, a be pan ní di ní.

²⁵ Cébèle bele myɛ be pye lè fáliw cánvɔɔlɔ, a poro jèsee càana ní be kɔ́yi ní, níì pan ní jèseew bee ní, wi lè kɔ́luruna céri wóo, ní wonyɛɛnw, ní wonyɛɛntelew, ní lɛn fànifɛɛlɛfɛɛlɛw wóo.

²⁶ Cébèle bele myɛ fúnyo ni gi pye lè, a be wɔ́ɔ i nyɛ fáliw cánvɔɔlɔ, a poro sike-síiri càana.

²⁷ A syɛ́ɛnmi kùndigibéle pan ní onikisi kàdɛɛngèlē ní n fàra kàdɛɛngèle kèle nikwɔɔ na, gele pe a táriga táriga lè efɔdiw ní fìcibigi yáriga na.

²⁸ Pe maa wɔ́ɔ̀ pan ní nùndaanni yárira ní, n fàra fètinni sìnmɛ, ní kàlifaali sìnmɛ, ní nùndaanni yasorigoro na.

²⁹ Fáliwee kéele Yawe da joo n gbàn Mowizi ma níì jo wi kpéʔele lè, Isirayɛli ye myɛw, n nǎnbèle pínɛ cébèle ni poro bele myɛ fúnyo ni gi pye bi kaan fáliw kéele na lè a poro pan ní kínidɛnɛgɛ yakaanra ní Yawe ma.

Besaleyɛli ní Oholiyabi n too fáliw na

³⁰ A Mowizi gi joo Isirayɛli pìíbèle ma níì jo: «Ye wéle, Yawe n Besaleyɛli yeri wi mɛ́ɛgi na wi lè Zyuda syɛɛnfelegi wówaa. Besaleyɛli wi lè Urii jáaw, Urii wi lè Huri jáaw.

³¹ Wi n wi nyìn woro pǐli na, li lè cánni, ní yákiriw, ní sícilimi wólo, koro ga pye wi fáliw féleye myɛ pyeganma cán.

³² Wi n fànʔa kaan wi ma wi gbǎn ra fáliw pyeganvɔnmɔ sélegi, bàā tɛ́ɛw, ní wálifiiw, ní kanyɛɛnri fáli kpéʔele.

³³ Bi wɔ́ɔ ra kàdɛɛngèle tangi gele be táragi lè, si wɔ́ɔ ra tíiri tangi, sáā kacánmi fáli féleye myɛ kpéʔele.

³⁴ Wi n wɔ́ɔ̀ syɛ́ɛnbèle tamana fundooro kaan wi ma, ní wɔ́ɔ̀ di kaan Ahisamaki jáaw Oholiyabi ma wi lè Dan syɛɛnfelegi wówaa.

³⁵ Wi n be nyìn cánni na koro ga pye pe gbǎn ra yatanri fáli, ní kacánmi fáli myɛ kpéʔele, bàā fàniw súu, si wɔ́ɔ ra kɔ́luruna céri fàni, ní wonyɛɛnw, ní wonyɛɛntelew, ní lɛn fànifɛɛlɛfɛɛlɛw tíin, bi wɔ́ɔ ra fali féleyi myɛ kpéʔele, sáā falifɔɔn sélegi.