Yirile 34 - Cebaara Bible 2010

Làlwaw kàlagori-fɔ́ngéle kéele

¹ A Yawe Mowizi pye: «Kàdɛnɛyɛ kàlagorigèle kèle siin tan ge pye àmɛɛ wozeligèle da pye lè, mii a syɛ́ɛnri sɛ́bɛ kàlagorigèle bee na, dee ti da pye wozeligèle na mɔ jabagi lè.

² Ki n yɛlɛ mɔ í pye wozamagagwɔɔɔ ní nyǐngi nyɔ́ɔ na pɛɛn pɛɛn, mí lúgu Sinayii nyanbelegi na nyǐngi nyɔ́ɔ na, mi sa yére nɛɛ bee mii yɛ́ʔɛ ma ki ǹjogi ni téw.

³ Syɔɔn faala ga yɛlɛ wi pínɛ lúgu ní mɔ ní í. Syɔɔn faala ga wɔ́ɔ̀ yɛlɛ wi nyaa nyanbelegi tɛ́ɛgaa faala ni í. Alí yaweeyiligēle ní yaweekpologèlē ga wɔ́ɔ̀ yɛlɛ bi nyàā káa nyanbelegi naa nyɔ́ɔ na í.»

⁴ A Mowizi kàdɛnɛyi kàlagorigēle siin tan a ge pye àmɛɛ wozeligèle da pye lè, níì sɔ̀li n yìri nyǐngi nyɔ́ɔ na n lúgu Sinayii nyanbelegi na, n yɛlɛ ní gi ní àmɛɛ Yawe da gi joo n gbàn wi ma lè. Kàdɛnɛyi kàlagorigēle siin si i nyɛ wi kɔ́gi ni.

⁵ A Yawe tìgi fàfaangi ni n baa yére yaà ní Mowizi ní níì wiyɛɛ mɛ́ɛgi yeri ki lè Yawe.

⁶ A Yawe sɔ̀lɔ wi yɛʔɛ̀ ma níì jo: «Mii Yawe, mii Yawe wi nyɛ nyinidaari Kolocɔlɔɔ, wee wi nyɔɔgi syɔɔn na lè, mii fúngi o wári taanri í. Mii i nyɛ funjàngafɔlɔ ní tágala syɔ́ɔn, dee bee i nyɛ mii ma saʔa,

⁷ mii wee wi funjànga kpéʔele ní syɔɔn ní lè bi taa sa nan yòdaʔayi yìrigēle saala kagunɔ na, ní i kolomi ní làlwaw céele ní kapeele kùsulugo syoo. Kàjáa mii o tànʔa kaangi kolomɔ fɔ́lɔ ma í. Mii i tofɔbèle kolomɔ gɔlɔ́ wóo pe jáabèle ní be pìinyanbiiyi na bi taa sa nan yòdaʔayi yìrigēle taanri ní yòdaʔayi yìrigēle sicɛrɛ wólo na.»

⁸ A Mowizi fala n wi nyúngi jùngu kelekele n tìgi n too tári na n Yawe kpɔ̀ʔɔrɔ.

⁹ Níì jo: «Kàfɔw, kapye mii n kacànna taa mɔ ma, mii i mɔ nyɛ́ɛri, Kàfɔw, ki n yɛlɛ mi pye wolo níngi ní, níì cán syɛɛnfelegi naa líiweele n pɛɛn. Ki n yɛlɛ mi wolo kolomi, ní wolo kapeeli kùsulugo syɔɔ. Mí wolo kpéʔele mɔ tiimaa kɔ́rigɔ.»

Joogaanni kpéʔelele níìgēle

¹⁰ A Yawe jo: «Wéle, mii tiimaa a joogaanna kpéʔele. Mii a kakpoloyo kpéʔele mɔ syɛ́ɛnbèle myɛ nyɛ́nɛ na, yee yi lè yi felege ga kɔ́ɔ̀ kpéʔele tári tɛ́ɛgaa faala ni í, wàlá syɛɛnfelegaa faala ma í. Syɛ́ɛnbèle bele myɛ nínge ni mɔ nyɛ lè wee, pe a mii Yawe kapyeli nyaa, li lè fyáakpɔɔrɔ wólo, loro lee mii a kpéʔele ní mɔ ní lè.

¹¹ Gee mii nyuu ni gbàngí mɔ ma lè gee níjanʔa, ki n yɛlɛ mi yákirii yaʔa gi na. Koro gi nyɛ mii a Amɔri ye, ní Kanaan ye, ní Hɛti ye, ní Perezi ye, ní Hɛvi ye, ní Yebusi ye nɛnɛ bi yirige yaà mɔ yɛ́ʔɛ ma.

¹² Táree ni mɔ syée sa jée lè, ki n yɛlɛ mi sa ra miyɛɛ kɔ̀rɔsíi, mɔ a kɔ́ joogaanna kpéʔele ní tári bee syɛ̀ɛnnɛ ní í. Gee bee ga tíi níì pye, pe a pye yele níngi ni karinyanga.

¹³ Ki si n yɛlɛ ye be sáriga-wòlo-yafaanyi cáan cáan, ye be yasunyi gàángéle tɔ́nʔɔnɔ, yé wɔ́ɔ ye be Asyera tiikóriyi cɛnɛ cɛnɛ.

¹⁴ Mɔ a kɔ́ tìgi bi too kolocɔlɔwaa yɛ́ʔɛ ma bi wi kpɔ̀ʔɔrɔ í. Níì cán Yawe mɛ́ɛgi gi nyɛ Yejaʔa. Wi i nyɛ yejaʔa Kolocɔlɔɔ.

¹⁵ Mɔ a kɔ́ joogaanna faala kpéʔele ní tári bee syɛ̀ɛnnɛ ní í, jàngó lǎli ni pe ga pye kanɔnʔɔri na ní be yasunyi ni lè, ní i sárigaw wóo yi ma lè, pe kɔ́ mɔ yeri mɔ í sa lìi wi na í.

¹⁶ Mɔ a wɔ́ɔ gi nyaa mɔ í da be pìíbèle lée bàā kaangi mɔ jáabèle ma pe càbala. Cébèle bee ga pye kanɔnʔɔri na ní be yasunyi ní, pe a wɔ́ɔ ra mɔ jáabèle kàragí paa kanɔnʔɔri kpéʔele ní poro yasunyi ní.

¹⁷ Mɔ a kɔ́ tunmɔrɔ gbàla bi sámaga mɔ kolocɔlɔɔ í.

¹⁸ Ki n yɛlɛ maa levé fun búruw séri kpéʔele canya kɔrɔsiin fúngo ni, wi làridɛ̀ɛ́nni ni, li lè Abiibi yégi ni. Mɔ a ra levé fun búruw líi, bi yɛlɛ ní gi ní àmɛɛ mii gi joo n gbàn mɔ ma lè. Níì cán Abiibi yégi ni mɔ yiri Ezyipiti ni.

¹⁹ Nànbiiseligèle myɛ i nyɛ mii wòʔolo, n fàra mɔ yaweeri nànbiiseligéle myɛ na, gee bee n jo yaweekpologèle, ní yaweeyiligèle wòʔolo myɛw.

²⁰ Ki n yɛlɛ mi jòfani nànbiiselili nyùnzyɔɔrɔ kpéʔele ní bàpile wàlá ní kapiige ní. Mɔ si ga pye mɔ o caa bi li nyùnzyɔɔri kpéʔele í, mi li yátiiveʔew kabi. Ki n yɛlɛ maa mɔ nanbiiseligèle myɛ nyùnzyɔɔrɔ kpéʔele. Syɔɔn faala ga yɛlɛ wi ba yére mii yɛ́ʔɛ ma ní kɔwaaya ní í.

²¹ Ki n yɛlɛ maa báara canya kɔrɔni. Ki ga pye can-kɔrɔsiin wógi na, mi ŋɔ́n mi daa. Alí ki ga pye yaliilùgu-lǎli ni wàlá yaliilaa-lǎli ni, ki n yɛlɛ maa cândɛnɛgi jàtée.

²² Mɔ a ra yaliiseliri fɛ́tii kpéʔele bilew yaliiselire larilaala ni, si wɔ́ɔ ra yaliilaari fɛ́tii kpéʔele yɛɛgbaraw na.

²³ Mɔ nanbèle myɛ a ra peyɛɛ gbóʔoro tɔlɔyɔ taanri yɛɛlɛ o yɛɛlɛ Kàfɔw Yawe yɛ́ʔɛ ma wi lè Isirayɛli ye Kolocɔlɔw.

²⁴ Níì cán mii a syɛɛnfeleyi nɛnɛ yirige yi tɛ́ɛyi ni mɔ yɛ́ʔɛ ma, si mɔ tári láʔagoloyo lúrugo kàdoʔo ma. Mɔ ga ni maa lǎli ni lè tɔlɔyɔ taanri n ba ni yèré mii Yawe mɔ Kolocɔlɔw yɛ́ʔɛ ma, syɔɔn faala a tée nyabɛɛnnɛ taa mɔ tári na í.

²⁵ Mɔ ga pan ní sìsyaanw sáriga yaweele ní ba kɔni mii ma, mɔ a kɔ́ sárigaw bee pínɛ wòlo ní levé búru ní í. Sɔ̀lɔ-mí-yaʔali fɛ́tii káara ga wɔ́ɔ̀ yɛlɛ di syɔ́ɔn bi ba nan nyǐngi nyɔ́ɔ na í.

²⁶ Ki n yɛlɛ maa maa ní mɔ ségi yaliifɔnrɔ yaliiselire ní mii Yawe mɔ Kolocɔlɔw kpaʔa ma. Mɔ a kɔ́ kapiige sɔʔɔ ki nɔɔ̀ yíremɛ ni í.»

²⁷ A Yawe gi joo Mowizi ma níì wi pye: «Ki n yɛlɛ mi syɛ́ɛnri naa sɛ́bɛ. Níì cán joogaanni mii kpéʔele ní mɔ ní Isirayɛli ye ní lè, mii n li kpéʔele n yɛlɛ ní di ní.»

²⁸ A Mowizi kwɔ́ɔ yaà canya togoye siin ní yébiliye togoye siin ní Yawe ní, wi ga yaliire lìi í, wi ga lɔ̀ʔɔ gbaa í. A Yawe joogaanni syɛ́ɛnrɛ sɛ́bɛ kàdɛnɛyi kàlagorigēle na, ti lè kajoogèle kɛɛ.

Mowizi lúrubanni kéele tɛɛkòrogi ma

²⁹ A Mowizi tìgi Sinayii nyanbelegi na. Séeraw kàdɛnɛyɛ kàlagorigēle siin maa pye wi kɔ́gi ni lǎli ni wi tìgi lè. Wi si da gi cán ncan àmɛɛ Yawe joo ní woro ní lè, woro yɛ́ɛgi i yaà ni daragi í.

³⁰ A Aarɔn ní Isirayɛli ye myɛw i Mowizi wéle, a be wi yɛɛcɔɔli nyaa li i daragi. A be fyáa bi nùuni wi na.

³¹ A Mowizi be yeri, a Aarɔn ní syɛ́ɛnmi kùndigibéle myɛ pan wi ma. A wi baa joomɔ pye ní be ní.

³² Koro kàdoʔo ma, a Isirayɛli ye myɛ náà nùuni yaà. Kérigèle gele Yawe joo n gbàn wi ma Sinayii nyanbelegi na lè, a wi gele bee myɛ joo n tɛ̀ɛn be ma.

³³ Lǎli ni Mowizi joo n kwɔ́ɔ be ma lè, a wi fàni tɔ́n wiyɛɛ yɛ́ɛgi na.

³⁴ Lǎli ni Mowizi ga ni jǐn bi sa yére Yawe yɛ́ʔɛ ma lè bi joo ní wi ní, fwɔɔ bi taa ba lúru yiri, wi i gáà fàniw láʔa. Lǎli ni wi ga yiri lè, kérigèle gele ke ga joo n gbàn wi ma lè, wi n baa ge joo n tɛ̀ɛn Isirayɛli ye na.

³⁵ Isirayɛli ye maa ni Mowizi yɛɛcɔɔli wéle, a be li nyaa a li i daragi. Mowizi si maa ni fàniw lúrugu ni tɔ́ngi wi yɛ́ɛgi na fwɔɔ bi taa sa nan lǎli na, lee ni wi ga ni jà lúru jée bi joo ní Yawe ní lè.