Yirile 33 - Cebaara Bible 2010

Kolocɔlɔɔ n gi joo n gbàn Mowizi ma wi kólogi láa waa syée

¹ A Yawe Mowizi pye: «Yiri nɛɛ naa maa syée, mɔ ní syɛ́ɛnbèle bele mɔ yirige Ezyipiti tári ni lè, yaa syée tári ma, dee nyɔ́ɔ mii da fàli ní kàliga ní lè Abirahami, ní Izaaki, ní Zyakɔbi ma níì jo mii a di kaan pe yòdaʔayi ma.

² Mii a nyɛ̀ʔɛni tundunwaa tórigo mɔ yɛ́ʔɛ ma, si Kanaan ye, ní Amɔri ye, ní Hɛti ye, ní Perezi ye, ní Hɛvi ye, ní Yebusi ye nɛnɛ.

³ Ye sa jée tári bee ni ti nyìn lè nɔ́nɔw, ní sárigi na ni fóo. Mii tiimaa si a kári ní yele ní í, jàngó mii a kɔ́ yele kálagi bi wo yaʔa kólogi na í, níì cán yele i nyɛ sìnloʔobéle.»

⁴ Lǎli ni syɛ́ɛnmi syɛɛnpɛɛnri bee lóʔo lè, a be pye kùn káyaʔa na. Pe wàa faala ga wi yaferede le í.

⁵ A Yawe Mowizi pye: «Ki joo Isirayɛli ye ma mí be pye: ‹Yele i nyɛ líiweepɛɛnnɛ syɛɛnfelege. Mii ga pye yele níngi ni tánʔani na, ki a mɔn í, mii si yele kálagi bi kwɔ́ɔ péw. Gee bee na ki n yɛlɛ ye yele yaferedi wòlo yeyɛɛ na tɔ́ɔliw ni, koro ga pye mii si gi cán kánmee na mii a yele cò bi sɛɛ lè.› »

⁶ A Isirayɛli ye canʔana Horebi nyanbelegi na n sáà be yaferedi wòlo peyɛɛ na.

Syɛ́ɛnmi Tɛɛfaraga fànikpaʔa kéele

⁷ A Mowizi fànikpaagi láa n sáà canʔana n kóri wiyɛɛ ma tɛɛkòrogi kàdoʔo ma ní i gi yiri Syɛ́ɛnmi Tɛɛfaraga fànikpaʔa. Syɔ́ɔnwee faala wi ga ni caa bi Yawe yíbe lè, wee bee i gáà yiri n kári Syɛ́ɛnmi Tɛɛfaraga fànikpaʔa ma ki da pye lè tɛɛkòrogi kàdoʔo ma.

⁸ Lǎli ni Mowizi ga yiri ni syée fànikpaagi ma lè, pe myɛ i gáà yiri n yére pe fànikpaayi kpaaweegéle na níì nyapiigèle le wi ni ni wéle bi taa wi n sáà jée fànikpaagi ni.

⁹ Lǎli ni Mowizi ga jée fànikpaagi ni lè, fàfaantɔnɔgi n tìgi n yére fànikpaagi kpaaweele na, Yawe si n ni nyuu ní Mowizi ní.

¹⁰ Syɛ́ɛnmi myɛ maa ni fàfaantɔnɔgi nyaagi fànikpaagi kpaaweele na. Lǎli bee ni pe myɛ maa ni yìrigí ni yèré ní i tíri ni tuun pe myɛ nibin nibin pe fànikpaaya kpaaweegéle na ni kpɔ̀ʔɔrɔli kpéʔele.

¹¹ Yawe ní Mowizi maa ni peyɛɛ nyaagi ní i nyuu ní peyɛɛ ní àmɛɛ syɔɔn ní wi tàannyɛnnɛ gáā nyuu lè. Koro kàdoʔo ma Mowizi n si lúru n kári tɛɛkòrogi ma. Kàjáa Nun jáaw Zyozuwe wi lè Mowizi falipye-nìgɔcariw, wi da ni yirigi fànikpaagi ni í.

Yawe i nyuu ní Mowizi ní

¹² A Mowizi gi joo Yawe ma níì jo: «Wéle, mɔ n mii pye: ‹Syɛ́ɛnbèle naa kɔ́ri mi yirige!› Wee si mɔ a tórigo ní mii ní lè, mɔ ga wi tɛ̀ɛn mii na í. Bi gi taa mɔ n jo: ‹Mii n mɔ cán mɔ mɛ́ɛgi na, mɔ n caà kacànna taa mii ma.›

¹³ Tɔ́ɔliw ni doò, kapye mii n kacànna taa mɔ ma, mi mɔ kakɔrirɔgèle tɛ̀ɛn mii na. Lǎli bee ni mii a mɔ sámaga cán, kánmi bee na mii a mɔ dubaw taa. Mí sɔ̀ngi mi taa gi na mi cán syɛ́ɛnmi naa i nyɛ mɔ wómɔ.»

¹⁴ A Yawe wi yari: «Mii tiimaa a ra syée ní mɔ ní. Mii a ŋɔ́ndaala kaan mɔ ma.»

¹⁵ A Mowizi wi pye: «Kapye mɔ tiimaa a ra syée ní wolo ní í, mɔ a kɔ́ wolo kɔ́ri bi yirige nɛɛ naa í.

¹⁶ Nyàʔá ki a gi tɛ̀ɛn mii ní mɔ syɛɛnfelegi n kacànna taa mɔ ma? Mɔ ga pínɛ ni syée ní wolo ní, wo nyɛ lè mii ní mɔ syɛɛnfelegi, koro ban ki a gee bee tɛ̀ɛn ì, syɛɛnfeleyi myɛ yi nyɛ lè tári yɛ́ʔɛ kurugo yoro si wolo cán bi wàli ì?»

¹⁷ A Yawe Mowizi pye: «Syɛ́ɛnri naa mɔ joo lè, mii a wɔ́ɔ di foro níì cán mɔ n kacànna taa mii ma, a mii wɔ́ɔ̀ mɔ cán mɔ mɛ́ɛgi na.»

¹⁸ A Mowizi jo: «Ki n yɛlɛ mi gi yaʔa mii í mɔ nijangbɔɔri nyaa.»

¹⁹ A Yawe jo: «Mii a mii funjǎngi myɛ yaʔa gi sɔ̀lɔ mɔ yɛ́ʔɛ ma, si wɔ́ɔ mii mɛ́ɛgi yeri mɔ ma ki lè Yawe. Wee na mii a nyɔɔ lè, mii a nyɔɔ wee bee na. Wee mii ga ni caa bi kpàraco lè, mii a wi kpàraco.»

²⁰ A wi níì jo: «Mɔ a gbǎn mii yɛ́ɛgi nyaa í, níì cán syɔɔn faala a gbǎn mii nyaa si kòro sìi na í.»

²¹ A Yawe jo: «Tɛɛgaa gi gee mii taana, yére nɛɛ naa fálagi na.

²² Mii nìjangbɔɔri ga ni sɔ̀lɔ́ lǎlee ni lè, mii a mɔ lége fálaweegi fúngo ni si mɔ tɔ́n ní mii kɔ́gi ní bi taa mii í sɔ̀lɔ bi kwɔ́ɔ.

²³ Koro kàdoʔo ma mii a kɔ́gi láʔa mɔ si mii kàdogi nyaa. Kàjáa mɔ a gbǎn mii yɛ́ɛgi nyaa í.»