Yirile 31 - Cebaara Bible 2010

Tɛɛcǎngi falipyebèlē kéele

¹ A Yawe gi joo Mowizi ma níì jo:

² «Wéle, mii n Besaleyɛli yeri wi mɛ́ɛgi na n yirige Zyuda syɛɛnfelegi ni, wi lè Urii jáaw, ní i nyɛ Huri pìinyanbiige.

³ Mii n wi nyìn Kolocɔlɔɔ pǐli na, n sícilimɛ, ní cánna ní yákirii kaan wi ma, koro ga pye wi fáliw féleye myɛ pyeganma cán.

⁴ Koro ga pye wi gbǎn ra tɛ́ɛw, ní wálifiiw, ní kanyɛɛnri fáliw pyeganvɔnmɔ sélegi,

⁵ bàā kàdɛɛngèle tangi gele be táragi lè, si wɔ́ɔ ra tíiri tangi sáā fáliw féleye myɛ kpéʔele.

⁶ Wéle, mii n wɔ́ɔ̀ Ahisamaki jáaw Oholiyabi fàra wi na wi pye wi dɛ̀ɛmɛfɔlɔ, Oholiyabi wi lè Dan syɛɛnfelegi wówaa. Mii n sícilimɛ le fáliw kacanbèlē myɛ fúnyo ni, koro ga pye gee myɛ mii jo n gbàn mɔ ma lè pe gi kpéʔele.

⁷ Koro gi nyɛ Syɛ́ɛnmi Tɛɛfaraga fànikpaʔa, ní Séeraw kásu, ní kapeegèle kùsulugo tɛ́ʔɛ ki a pye lè wi ǹjogi ni, ní fànikpaagi yayigelere myɛw,

⁸ ní tàbaliw, ní wi yayigeleri, ní tɛɛtelew fètindaʔala ní li yayigeleri myɛw, ní nùndaanni yárira sórigolo sáriga-wòlo-yafanʔa,

⁹ ní sáriga-sórigow sáriga-wòlo-yafanʔa ní gi yayigeleri myɛw, n fàra jéemununi pɛɛkpɔʔɔ ní gi nɔ́gi na,

¹⁰ ní tɛɛcǎngi falipye-buroyo, Aarɔn wi lè sáriga-wòlow, woro ní wi jáabèle falipye-buroyo, yee pe a ra nii bàā sáriga-wòlori fáli kpéʔele lè,

¹¹ ní kàlifaali sìnmɛ, ní nùndaanni yáriga ki a pye lè tɛɛcǎngi kéele na. Pe a ti myɛ kpéʔele foro àmɛɛ mii gi joo n gbàn mɔ ma lè.»

Cândɛnɛgi yaʔala kéele

¹² A Yawe gi joo Mowizi ma níì jo:

¹³ «Ki joo Isirayɛli ye ma mí be pye: ‹Ki n yɛlɛ yele í tɔ̀nɔ́ mii cândɛnɛyi yaʔa. Gee bee a pye fɛ̀ɛ mii ní yele níngi ni yele yìrigèle myɛ syɛ̀ɛnnɛ ma, wee báriga ni pe a gi cán lè bi cán mii wi nyɛ Yawe, wee wi yele sámagi ni yaari wiyɛɛ ma lè.

¹⁴ Koro na yele yɛlɛ bi cândɛnɛgi yaʔa, níì cán ki a pye yacanga yele ma. Wee wi ga cândɛnɛgi kálagi lè, pe a wee bee kpóo. Syɔ́ɔnwee wi ga faliwaa faala kpéʔele lè gi ni, wee bee a kwɔ́ɔ yirige wi syɛ́ɛnbèle nínge ni.

¹⁵ Fáliw a ra kpéʔele canya kɔrɔni fúngo ni, kàjáa canya kɔrɔsiin wógi a pye cândɛnɛgɛ, bi pye ŋɔ́ndaala canʔa, gee ki a yaʔa kɔlɔ̀ na Yawe ma lè. Syɔ́ɔnwee wi ga faliwaa kpéʔele lè cândɛnɛgi canʔa ni, pe a wee bee kpóo.

¹⁶ Isirayɛli ye n yɛlɛ bi cândɛnɛgi yaʔa, pe n yɛlɛ bàā cândɛnɛgi kéele kpɔ́ʔɔgi da syée yaà pe yìrigèle myɛ syɛ̀ɛnnɛ nínge ni. Gee bee a kòro bàngwɔɔ joogaanna.

¹⁷ Gee bee a kòro fɛ̀ɛ mii ní Isirayɛli ye níngi ni bàā syée yaà làla o làla. Níì cán Yawe n nyɛ̀ʔɛgèle ní tári sámaga canya kɔrɔni fúngo ni, a ki ga pye canya kɔrɔsiin wógi na, a wi fáliw yérige níì ŋɔ́n n daa.› »

¹⁸ Lǎli ni Yawe joo n kwɔ́ɔ ní Mowizi ní lè Sinayii nyanbelegi na, a wi Séeraw kàlagorigēle siin kaan wi ma, kàdɛnɛyɛ kàlagorigèle gele na Kolocɔlɔɔ da sɛ́bɛri sɛ́bɛ ní wi tiimaa kabeli ní lè.