Yirile 30 - Cebaara Bible 2010

Nùndaanni yáriga sáriga-wòlo-yafanʔa

¹ «Ki n yɛlɛ mi sáriga-wòlo-yafanʔa sámaga bàā nùndaanni yárira sórogi gi na. Ki sámaga ní akasya tíire ní.

² Ki tɔnɔganmi n yɛlɛ bi pye mɛ́tiri tíla, ki kpɔ́ʔɔganmi si wɔ́ɔ pye mɛ́tiri tíla. Ki tɔnɔganmi ní gi kpɔ́ʔɔganmi a pye sèjira. Ki ǹjogi tɔnɔganma si pye mɛ́tiri nibin. Ki nyɛ́ngèle si yirige pínɛ ní gi ní.

³ Mí tɛɛteleo tɛ́ʔɛ mi gi tɛ́ɛyi myɛ tɔ́n, gee bee n jo ki ǹjogi, ní gi lɛ̀ʔɛgèle myɛ, n fàra ki nyɛ́ngèle na, bi gi màʔa. Mí tɛɛwaa sámaga wi pye ki nyɔɔwari bi gi màʔa.

⁴ Mí tɛɛ̀ vèʔeye siin-ziin sámaga ki nyɔɔwari láara ni, ki lɛ̀ʔɛgèle siin na. Yàa a pye kàbangee na, yàa í pye kàbangee na jàngó bàā ki láali tíingéle forogi yaà beè.

⁵ Mɔ a tíingéle sámaga akasya tíire woʔolo, mí tɛɛ̀ tɛ́ʔɛ mi ge tɛ́ɛyi myɛ tɔ́n.

⁶ Mí sáriga-wòlo-yafaangi tɛ́ʔɛ fànipariw yɛ́ʔɛ ma, wi lè séeraw kásu yɛ́ʔɛ ma, kapeegèle kùsulugo tɛ́ʔɛ yɛ́ʔɛ ma ki lè séeraw kásu ǹjoʔo ni, beè mii a ra mɔ fàrá lè.

⁷ Aarɔn a be pye paa nùndaanni yáriga sórogi. Canʔa o canʔa nyɛ̀ʔɛ nyɔ́ɔ na, wi a be pye be kàa sórigo lǎli ni wi ga ni jà fètingèle sámaga yaʔa lè.

⁸ Aarɔn ga ni fètingèle nii cângwɔɔgi nyɔ́ɔ na lǎli ni lè, wi a wɔ́ɔ kàa sórigo. Gee bee a pye nùndaanna yáriga, gee ki a ra sóori lè làla o làla mii Yawe yɛ́ʔɛ ma, yele yìrigèle myɛ syɛ̀ɛnnɛ lala ni.

⁹ Yele a kɔ́ nùndaanna yárigaa nikwɔɔ wòlo sáriga gi na í. Yele a wɔ́ɔ kɔ́ sáriga-sórigoo, wàlá míimɛ sáriga wòlo gi na í. Yele a wɔ́ɔ kɔ́ sáriga-yólogoo faala wo gi na í.

¹⁰ Aarɔn a ra kapeegèle kùsulugo fáli kpéʔele sáriga-wòlo-yafaangi nyɛ́ngéle na tɔlɔgɔ nibin yɛɛlɛ o yɛɛlɛ. Kapeegèle kùsulugo fáli yaweele sisyaan wi a ra téeri bàā kapeegèle kùsulugo fáli kpéʔele. Kapeegèle kùsulugo fáli a ra kpéʔele gi na yɛɛlɛ o yɛɛlɛ tɔlɔgɔ nibin yele yìrigèle myɛ syɛ̀ɛnnɛ lala ni. Gee bee a pye yacandelege mii Yawe yɛ́ʔɛ ma.»

Nyùnzyɔɔ-wáliw kaanna tɛɛcǎngi kéele na

¹¹ A Yawe gi joo Mowizi ma níì jo:

¹² «Lǎli ni mɔ ga ni jà Isirayɛli ye córo bi be nyɔ́ɔgi cán lè, pe myɛ nibin nibin n yɛlɛ bi be tiimaa nyùnzyɔɔri sàra kaan mii Yawe ma, koro ga pye pe ga be córo lǎli ni lè, káfalagi yáama a kɔ́ too be na í.

¹³ Bele myɛ pe a córo lè, gee pe a kaan lè, koro gi nyɛ gee naa: Pe myɛ nibin nibin a kaan wálifiio gerabéle kagunɔ kagunɔ, bi yɛlɛ ní tɛɛcǎngi wáli nyɔ́ɔ tíla ní. Wáliw bee a wòlo bi kaan Yawe ma.

¹⁴ Syɛ́ɛnbèle bele myɛ pe a córo lè bi séli yɛ̀ʔɛlɛ toko wóbèle na, ní poro yɛ́ʔɛ ma wóbèle, poro pe a yakaangi bee wòlo bi kaan Yawe ma.

¹⁵ Lɔrɔfɔlɔ ga yɛlɛ wi kàa fàra nyɔ́ɔgi bee na í, fɔ̀ngɔfɔlɔ ga wɔ́ɔ̀ yɛlɛ wi kàa fɔ̀n wálifiiw gíramibéle kagunɔ ni í woro wee pe a láʔala bi kaan mii Yawe ma jàngó bi peyɛɛ nyúnyi syɔɔ lè.

¹⁶ Mɔ a nyùnzyɔɔ-wáliw syɔɔ Isirayɛli ye ma, si wi le Syɛ́ɛnmi Tɛɛfaraga fànikpaʔa fáli ni. Gee bee a pye Isirayɛli ye ma sɔ̀ngudaara mii Yawe yɛ́ʔɛ ma pe tiimaw nyùnzyɔɔrɔ kéele na.»

Jéemununi pɛɛkpɔʔɔ kéele

¹⁷ A Yawe gi joo Mowizi ma níì jo:

¹⁸ «Ki n yɛlɛ mi kanyɛɛnrɛ pɛɛkpɔʔɔ sámaga. Ki nɔ́gi si pye kanyɛɛnrɛ wóʔo. Ki a pye jéemununi kéele na. Mí gi tɛ́ʔɛ Syɛ́ɛnmi Tɛɛfaraga fànikpaʔa, ní sáriga-wòlo-yafaangi nínge ni, mí lɔ̀ʔɔ le gi ni.

¹⁹ Aarɔn ní wi jáabèle a ra kɔ́yi ní tɔ́lɔyi jé gi ni.

²⁰ Pe ga ni jà jée Syɛ́ɛnmi Tɛɛfaraga fànikpaʔa ni lǎli ni lè, pe peyɛɛ jée lǒgi bee ni, koro ga pye pe a kɔ́ kùu í. Pe ga wɔ́ɔ naà nùuni sáriga-wòlo-yafaangi na fáliw kéele na bi sárigaw sórigo, wee be sórogi naà ni lè,

²¹ pe a be kɔ́yi ní be tɔ́lɔyi jée kánmi bee na jàngó pe a kɔ́ kùu í. Gee bee a pye bàngwɔɔ làlwasɛbɛɔ wi ní wi yòdaʔayi ma yirigèle myɛ wòolo lala ni.»

Sìnjǎnmi kéele

²² A Yawe gi joo Mowizi ma níì jo:

²³ «Nùndaanni yárira di nyɔɔ lè, ki n yɛlɛ mi toro tàa láa. Toro di nyɛ: Míiri, koro lǒgi cúlobéle kagunɔ, ní kanɛli cúlobéle siin ní tíla, ní nùndaanna yáriga cúlobéle siin ní tíla,

²⁴ ní kasi cúlobéle kagunɔ bi yɛlɛ ní tɛɛcǎngi córomɔ nyɔ́ɔ ní, ní olivye sìnmɛ lítiribéle kɔrɔni.

²⁵ Mi dee bee kpéʔele syɔɔn kalifaali sìnmɛ, bi yɛlɛ ní nùndaanni yárira sámagafɔɔlɔ fálipyeganma ní, pi a pye syɔɔn kalifaali sìnmɛ.

²⁶ Mi bi pàa wo Syɛ́ɛnmi Tɛɛfaraga fànikpaʔa, ní séeraw kásu na,

²⁷ ní tàbaliw, ní wi yayigeleri myɛ, ní fètindaʔali, ní li yayigeleri, ní nùndaanni yasorigoro sáriga-wòlo-yafanʔa,

²⁸ ní sáriga-sórigow sáriga-wòlo-yafanʔa, ní gi yayigeleri myɛ na, n fàra pɛɛkpɔɔgi ní gi nɔ́gi na.

²⁹ Mɔ a yáriri bee sámaga yaʔa Kolocɔlɔɔ ma, ti a pye yacandelere. Yariga o yariga ki ga tánga di na lè, ki a yaʔa kɔlɔ̀ na Kolocɔlɔɔ ma.

³⁰ Mɔ a sǐnmi wo Aarɔn ní wi jáabèle na bi be yaʔa kɔlɔ̀ na mii Kolocɔlɔɔ ma jàngó paa sáriga-wòlori fáli kpéʔele mii ma.

³¹ Ki joo Isirayɛli ye ma mí be pye: ‹Sǐnmi bee a pye mii ma syɔɔn kalifaali sìnmɛ yele làrigèle myɛ syɛ̀ɛnnɛ nínge ni.

³² Ki ga yɛlɛ pe bi pàa wo syɔɔnwaa cére na í. Yele a kɔ́ pàa sámaga bi bee naa wíri ní yanijanri ní í. Pi i nyɛ yacanga, koro na ki n yɛlɛ bi córo ànbée.

³³ Syɔ́ɔnwee wi ga bi felege sámaga lè, wàlá n bi pàa taʔa syɔɔnwaa nikwɔɔ na lè, syɔ́ɔnw bee a kwɔ́ɔ yirige wi syɛ́ɛnbèle nínge ni.› »

Nùndaanni yariga sámaga-yaʔala kéele Kolocɔlɔɔ ma

³⁴ A Yawe gi joo Mowizi ma níì jo: «Ki n yɛlɛ mi nùndaanna yáriraa láa, ti lè sitakite, ní onikisi, ní galibanɔmi, ní nùndaanni yáriraa n fàra nùndaanna yasorigogo wodelege na. Ti nyáʔami tiyɛɛ ni, ti tímanaganmi í pye sèjira.

³⁵ Mɔ a dee bee tɛ́ʔɛ nùndaanna yasorigogo sámaga, ti nyáʔami tiyɛɛ ni bi yɛlɛ ní nùndaanna yasamagaɔ fáli pyeganma ní, solomɔ si pye gi ni. Ki a pye fɔɔnrɔ fun, si yaʔa kɔlɔ̀ na Kolocɔlɔɔ ma.

³⁶ Mí gi kàa súu míige mi tɛ́ʔɛ Séeraw kásu yɛ́ʔɛ ma, Syɛ́ɛnmi Tɛɛfaraga fànikpaʔa ni, beè mii a ra mɔ fàrá lè. Ki a pye yele ma yacandelege.

³⁷ Nùndaanni yáriga mɔ a sámaga lè, yele a tíi si kɔ́ gi felege sámaga ní yanijanri ní bi yaʔa yeyɛɛ ma í. Ki a pye mɔ ma yarigaa, gee ki a yaʔa lè kɔlɔ̀ na Yawe ma.

³⁸ Syɔ́ɔnwee faala wi ga gi felege sámaga jàngó bàā gi nǔngi taagi lè, wee bee a kwɔ́ɔ yirige wi syɛ́ɛnbèle nínge ni.»