Yirile 29 - Cebaara Bible 2010

Sáriga-wòlobèle sámaga-yaʔala kéele

¹ «Wéle, kérigèle gele mɔ a kpéʔele lè koro ga pye bi be sámaga yaʔa paa sáriga-wòlori fáli kpéʔele mii ma lè, koro ge nyɛ: Ki n yɛlɛ mi tɛɛlɛ fun náapɛɛlɛ, ní tɛɛlɛ fun bàpɔɔlɔ siin cò,

² mí bile míivɔɔnimɔ láa mi levé fun búru, ní levé fun kàgbalaya sámaga ní sìnmɛ ní n fàra levé fun ŋɔ̀miyɔ na, yee na pe a sìnmɛ wo lè.

³ Mí di le sɛ̀ʔɛlɛ ni máā maa ní di ní sɛ̀ʔɛli bee ni mii yɛ́ʔɛ ma yakanʔa bi fàra náapeli, ní bàpɔbèle siin na.

⁴ Mɔ a pan ní Aarɔn, ní wi jáabèle ní syɛ́ɛnmi tɛɛ̀faraga fànikpaʔa kpaaweele ma, mi ba be wéli ní lɔ̀ʔɔ ní.

⁵ Mí yaleri láa, mi burodɔnɔgi le Aarɔn na, mí burodɔnɔgee taʔa yaà, gee na efɔdiw a le bi taʔa lè. Mí efɔdiw le wi na n náà fàra fìcibigi yáriga na, mí efɔdiw sɛntiiri tɛ́ʔɛ mi wi pwɔɔ.

⁶ Mí nyùnbwɔɔgi taʔa wi nyǔngi na, kpɔ́ʔɔri jàra wi lè kàlifaali wóo mi woro táriga nyùnbwɔɔgi na.

⁷ Mɔ a kàlifaali sìnmɛ láa bi pàa wo wi nyǔngi na bi wi kàlifáa Kolocɔlɔɔ ma.

⁸ Mí pan ní wi jáabèle ní mi ba burodɔnɔyi le be na.

⁹ Mí sɛntiiribèle pwɔɔ Aarɔn ní wi jáabèle na, mí nyùndɔnyɔ tɔ́n be na. Kánmi bee na sáriga-wòlori a kòro be falì, gee bee a pye bàngwɔɔ làlwasɛbɛɔ. Kánmi bee na mɔ a Aarɔn ní wi jáabèle kàlifáa mii Kolocɔlɔɔ ma.

¹⁰ Máā maa ní náapeli ní syɛ́ɛnmi tɛɛ̀faraga fànikpaʔa yɛ́ʔɛ ma. Aarɔn ní wi jáabèle a ba be kɔ́yi taʔa náapeli nyúngo na.

¹¹ Mɔ a náapeli kɔni mii Yawe yɛ́ʔɛ ma Syɛ́ɛnmi Tɛɛfaraga fànikpaʔa kpaaweele yɛ́ʔɛ ma.

¹² Mí náapeli sìsyaanwaa tàmi ní mɔ kabeli ní mi taʔa sáriga-wòlo-yafaangi nyɛ́ngéle na, mí sìsyaansanw myɛ wo sáriga-wòlo-yafaangi nɔ́ʔɔ ma.

¹³ Mɔ a sǐnmi myɛ láa, bee bi fúngi yárira tɔ́n lè, ní fàlifiiw wi yɛ̀ɛ́li tɔ́n lè, n fàra li zǎloogèle siin, ní ge sǐnmi na pi ge tɔ́n lè mi dee bee sórigo sáriga-wòlo-yafaangi na.

¹⁴ Kàjáa mɔ a sa náapeli káara, ní li sáligi, ní li fíri sórigo kěgi kàdoʔo ma. Kapeele kùsulugo sáriga wii.

¹⁵ Mɔ a bàpɔwaa nibin cò, Aarɔn ní wi jáabèle si be kɔ́yi taʔa bàpɔw nyúngo na.

¹⁶ Mí bàpɔw bee kɔni mí wi sìsyaanw láa mi wi yɔ́ɔ yɔ́ɔ mi sáriga-wòlo-yafaangi màʔa.

¹⁷ Mí bàpɔw cɛnɛ cɛnɛ, mí fúngi yárira, ní tɔ́lɔyi jée mi taʔa kaacɛnɛri, ní nyǔngi na.

¹⁸ Mi bàpɔw myɛ sórogi sáriga-wòlo-yafaangi na. Sáriga-sórigoo wii mii Yawe ma wee be sórigo náagi ni lè, woro wee núngo gi mii Yawe dɛ́nɛ lè.

¹⁹ Mí bàpɔ-siin wów cò, Aarɔn ní wi jáabèle si be kɔ́yi taʔa wi nyúngi na.

²⁰ Mí bàpɔw kɔni mí wi sìsyaanwaa láa mi taʔa Aarɔn kàliige líiweeli na, ní wi jáabèle kàliige líiweegéle na, ní be kàliige kɔ́yi kabenigbɔnbēle na ní be kàliige tɔ́lɔyi kabenigbɔnbēle na. Mí sìsyaansanw yɔ́ɔ yɔ́ɔ mi sáriga-wòlo-yafaangi màʔa mi kpàra.

²¹ Sìsyaanwee wi a pye sáriga-wòlo-yafaangi na lè, mí woro wàa láa n fàra kàlifaali sìnmɛ na mi nyari nyari Aarɔn ní wi yaleri na, ní wi jáabèle, ní be yaleri na. Kánmi bee na Aarɔn ní wi yaleri, ní wi jáabèle ní be yaleri a yaʔa kɔlɔ̀ na Kolocɔlɔɔ ma.

²² Mɔ a bàpɔw sìnmɛ láa, bi fàra nángi, ní sǐnmi na bi fúngi yárira tɔ́n lè, ní fàlifiiw wi yɛ̀ɛ́li tɔ́n lè ní zǎloogèle siin, n fàra sǐnmi na pi ge màʔa lè, ní kàliige céeli. Níì cán syɔɔn télegeli sáriga bàpɔlɔ wii.

²³ Levé fun búruw sɛ̀ʔɛlɛ li nyɛ mii Yawe yɛ́ʔɛ ma wodɛʔɛlɛ ní lè, mí wɔ́ɔ mi loro sǐnmi ŋɔ̀migaa nibin wòlo bi fàra kàgbalabile na.

²⁴ Mɔ a ti myɛ le Aarɔn ní wi jáabèle kadaʔala ni, si di fíige bi màʔa Yawe yɛ́ʔɛ ma sáriga-fíigeo.

²⁵ Koro kàdoʔo ma mi di yirige be kɔ́yi ni mi taʔa sáriga-sórigow na mi sórigo sáriga-wòlo-yafaangi na, sáriga wii, wee náagi sórogi ni kwóo Yawe yɛ́ʔɛ ma lè, woro wee núngo gi Yawe dɛ́nɛ lè.

²⁶ Mi Aarɔn kàlifaali kéele sáriga bàpɔlɔ fìcibige láa mi gi fíige mi màʔa sáriga-fíigeo mii Yawe yɛ́ʔɛ ma, gee bee a pye mɔ lɛɛli.

²⁷ Fìcibigi be fíige lè, ní céeli be yirige níì li fíige lè, loro lee be yirige Aarɔn ní wi jáabèle kàlifaala sáriga bàpɔlɔ ni lè, ki n yɛlɛ mi dee bee córo yacanra.

²⁸ Dee bee a pye Aarɔn ní wi jáabèle lɛɛlɛ. Wee bee a pye bàngwɔɔ làlwa, wee wi a pye lè beè Isirayɛli ye ma, ncan wee bee a pye sáriga-yirigeo. Ki a pye Isirayɛli ye í da wi yirigi be pínɛnyɛnnɛgi sáriga yaweegéle ni, dee bee a ra yirigi bàā yaari mii Yawe ma.

²⁹ Aarɔn sáriga-wòlori fáli yalere a ba kaan wi pìíbèle ma naa wi kàdoʔo ma. Pe a di le lǎli ni pe a sǐnmi wo be na bi be kàlifáa Kolocɔlɔɔ ma lè.

³⁰ Wi jáabèle ni, wee wi a sáriga-wòlori fáli láa naa lè wi kàdoʔo ma, woro a di le canya kɔrɔsiin fúngo ni si náa ra jǐn Syɛ́ɛnmi Tɛɛfaraga fànikpaʔa ni bàā fáliw kpéʔele tɛɛcǎngi ni.

³¹ Mɔ a be télegeli sáriga bàpɔlɔ káara láa bi sa sɔʔɔ tɛɛcàngaa ni.

³² Aarɔn ní wi jáabèle a bàpɔw káara ní sɛ̀ʔɛli búru káa Syɛ́ɛnmi Tɛɛfaraga fànikpaʔa kpaaweele na.

³³ Kánmi bee na yáriri ti a pye lè kapeegèle kùsulugo fáli kpéʔelele wóro be télegeli ní be kàlifaali kéele na, pe a di lìi. Kàjáa syɔɔnwaa nikwɔɔ ga yɛlɛ wi lìi di na í, níì cán ti i nyɛ yacanra.

³⁴ Pe télegeli sáriga káaraa, wàlá búruwaa ga syɔ́ɔn, mɔ a ti wogorori sórigo ní naà ní, wàa ga yɛlɛ wi di káa í, níì cán ti i nyɛ yacanga.

³⁵ Tundunree myɛ mii joo n gbàn mɔ ma lè Aarɔn ní wi jáabèle télegele kéele na, ki n yɛlɛ mi di kpéʔele mi foro be na, mi canya kɔrɔsiin pye be kàlifaali fáli na mii Kolocɔlɔɔ ma.

³⁶ Canʔa o canʔa mɔ a náapɛɛlɛ wòlo sáriga kapeeli kéele na bi kapeeli kùsulugo fáli kpéʔele. Mɔ a sáriga-wòlo-yafaangi jée mùnu kapeegèle kùsulugo fáliw bee kpéʔelele báriga ni. Mɔ a sǐnmi wo gi na jàngó bi gi yaʔa kɔlɔ̀ na Kolocɔlɔɔ ma.

³⁷ Mɔ a kapeegèle kùsulugo fáli kpéʔele sáriga-wòlo-yafaangi na canya kɔrɔsiin fúngo ni bi gi yaʔa kɔlɔ̀ na Kolocɔlɔɔ ma. Sáriga-wòlo-yafaangi a pye yacandelege. Yárigee faala ga tánga gi na lè, gee bee a yaʔa kɔlɔ̀ na Kolocɔlɔɔ ma.

Canʔa o canʔa sáriga-wòlori kéele tɔlɔyɔ siin

³⁸ «Yáriree mɔ a ra wóo lè sáriga sáriga-wòlo-yafaangi na, toro di nyɛ dee naa: yɛ̀ʔɛlɛ nibin nibin bàpiigéle siin canʔa o canʔa, sìnyaʔa ni.

³⁹ Mɔ a bàpilaa nibin wòlo sáriga nyǐngi nyɔ́ɔ na, si làa nibin wòlo cângwɔɔgi nyɔ́ɔ na.

⁴⁰ Mí míivɔɔnimɔ cúlobéle taanri láa bee pe a nyáʔami lè olivye tɔ́nʔɔnɔɔ sinmɛ lítiri nibin ní tíla ni. Mi toro pínɛ mi wòlo sáriga ní bàpiiselili ní, bi fàra sáriga-yólogoo duvɛɛn lítiri nibin ní tíla yakanʔa na.

⁴¹ Mí wɔ́ɔ cângwɔɔgi nyɔ́ɔ bàpile sáriga wòlo. Yáriree mɔ da pínɛ n wòlo ní nyǐngi nyɔ́ɔ bàpile ní lè, yakanʔa ní sáriga-yólogoo, mí wɔ́ɔ dee bee tàa wòlo ní cângwɔɔgi nyɔ́ɔ wólo ní. Mɔ a di wòlo sáriga, wee náagi sórogi ni kwóo lè á wi núngi Yawe dɛ́nɛ.

⁴² Bàngwɔɔ sáriga-sórigoo wii yele yìrigèle myɛ syɛ̀ɛnnɛ ma Syɛ́ɛnmi Tɛɛfaraga fànikpaʔa kpaaweele na mii Yawe yɛ́ʔɛ ma. Nɛɛ bee mii a ra yele fàrá sáā nyuu ní mɔ ní tɛ́ɛgi bee ni.

⁴³ Mii a ra Isirayɛli ye fàrá tɛ́ɛgi bee ni, tɛ́ɛgi bee a pye tɛɛcànga mii nìjangbɔɔri báriga ni.

⁴⁴ Mii a Syɛ́ɛnmi Tɛɛfaraga fànikpaʔa ní sáriga-wòlo-yafaangi sámaga yaʔa kɔlɔ̀ na, si wɔ́ɔ Aarɔn ní wi jáabèle sámaga yaʔa kɔlɔ̀ na, koro ga pye paa sáriga-wòlori fáli kpéʔele mii ma.

⁴⁵ Mii a tɛ́ɛn Isirayɛli ye níngi ni bi pye be Kolocɔlɔw.

⁴⁶ Pe a gi cán bi cán mii wi nyɛ Yawe poro Kolocɔlɔw, si wɔ́ɔ gi cán bi cán mii wi poro yirige Ezyipiti tári ni koro ga pye bi ba tɛ́ɛn poro níngi ni. Mii wi nyɛ Yawe be Kolocɔlɔw.