Yirile 26 - Cebaara Bible 2010

Tɛɛkòrojǎngi kéele

¹ «Ki n yɛlɛ mi kpɔ̀ʔɔrɔli fànikpaʔa sámaga mii ma ní fànitɔnɔyɔ kɛɛ ní. Ki sámaga ní lɛn fànifɛɛlɛfɛɛlɛɔ ní wee be sára lè, ní kɔ́luruna céri fàni, ní fàninyɛɛnw, ní fàninyɛɛn-telew ní. Mí syerubɛnbéle sámaga yaà bi yɛlɛ ní kacánmi fálipyeganma ní.

² Fàniyi myɛ nibin nibin tɔnɔganma a pye mɛ́tiribéle kɛɛ ní sicɛrɛ-jɛrɛ, yi kpóloganmi si pye mɛ́tiribéle siin-ziin. Fàniyi myɛ tímanaganma a pye sèjira.

³ Pe a fàniyaa kagunɔ jɔli bi sogi yiyɛɛ na si yee kagunɔ jɔli bi sogi yiyɛɛ na.

⁴ Fàniyee yi jɔli n sogi yiyɛɛ na lè, ki n yɛlɛ mi kɔ́luruna cére mɛnɛpiire kùru weegèlē wozeligi nyɔ́ɔ na, mí wɔ́ɔ gee bee wonijanga kpéʔele siin wógi nyɔ́ɔ na.

⁵ Ki n yɛlɛ mi mɛnɛpiire togoye siin ní kpɔrigɔ kùru weegèlē fàniyee wozelige nyɔ́ɔ na, mí ní tàa togoye siin ní kpɔrigɔ kùru weegèlē siin wógi nyɔ́ɔ na. Mɛnɛpiiri bee wéegéle n yɛlɛ ge sín ní keyɛɛ ní.

⁶ Mí tɛɛ̀ yakparagéle togoye siin ní kpɔrigɔ sámaga mi fàniyi kpàra mi táriga yiyɛɛ na ní ge ní. Kánmi bee na kpɔ̀ʔɔrɔli fànikpaʔa a pínɛ pye nibin.

⁷ Mɔ a fàniyaa sámaga ní sike-síire ní, yoro í pye kpɔ̀ʔɔrɔli fànikpaʔa njoʔo ma tɔ́nnɔ kéele na. Mɔ a yee bee sámaga fàniyaa kɛɛ ní nibin.

⁸ Fàniyi bee myɛ nibin nibin tɔnɔganma n yɛlɛ bi pye mɛ́tiribéle kɛɛ ní kagunɔ kagunɔ. Yi kpóloganmi si pye mɛ́tiribéle siin-ziin. Fàniyi tímanaganma a pye mɛ́tiri nyɔ́ɔnijanga na.

⁹ Ki n yɛlɛ mi fàniyaa kagunɔ jɔli mi sogi yiyɛɛ na, mí yee kɔrɔni wàli mi kpéʔele kánmi bee na. Mi ba fàniyi kɔrɔni wóʔo wáa mi taʔa fànikpaagi yɛʔɛmaw na.

¹⁰ Fàniyee wozeliye yi jɔli n sogi yiyɛɛ na lè, ki n yɛlɛ mi mɛnɛpiire togoye siin ní kpɔrigɔ kùru weegèlē yee bee wozanga wóʔo nyɔ́ɔ na, fàniyee pe níì jɔli n sogi yiyɛɛ na lè n pye nibin mi mɛnɛpiiraa togoye siin ní kpɔrigɔ kùru weegèlē yee bee wozanga nyɔ́ɔ na.

¹¹ Mí kanyɛɛnrɛ yakparagéle togoye siin ní kpɔrigɔ sámaga, mí ge foro mɛnɛpiiri wéegéle ni. Kánmi bee na mɔ a fànikpaagi pínɛ pye nibin.

¹² Amɛɛ fàniyi wozanga a ba tɔnɔ yiri fànikpaagi tɔnɔganma ni lè, ki tílaw a ba tìgi wo kpɔ̀ʔɔrɔli fànikpaʔa kadoʔo ma.

¹³ Fànikpaagi fàniya a tɔnɔ yiri mɛ́tiri tíla kàbangaa na, ní mɛ́tiri tíla gee na. Tílawee a tìgi wo kpɔ̀ʔɔrɔli fànikpaʔa kabangee na, wee í tìgi wo kàbangee na bi gi tɔ́n.

¹⁴ Mí bàpɔɔlɔ sáliya tɛ́ʔɛ mi yatɔngɔ sámaga mi tɔ́n fànikpaagi na, yee pe a nyɛ́nɛgɛ lè. Mí ní yatɔngaa sámaga ní dofɛn sáliya ní, bi koro taʔa ǹjogi ni.

¹⁵ Mí tiikpakpaaya sámaga, akasya tíire wóyo kpɔ̀ʔɔrɔli fànikpaʔa kéele na mi yìrige mi yérige.

¹⁶ Tiikpakpaayi myɛ nibin nibin tɔnɔganma a pye mɛ́tiribéle kagunɔ kagunɔ, yi yɛ́ɛyi kpóloganma si pye santimɛtiribéle togoye taanri ní kpɔrigɔ ní kagunɔ kagunɔ.

¹⁷ Tɔlɔyɔ siin-ziin n yɛlɛ bi pye tiikpakpaayi myɛ nibin nibin na, yí sogi yiyɛɛ na bi kári. Kánmi bee na gi yɛlɛ mɔ í kpɔ̀ʔɔrɔli fànikpaʔa tiikpakpaaya myɛ sámaga.

¹⁸ Ki n yɛlɛ mi tiikpakpaaya toko sámaga, yoro í pye kpɔ̀ʔɔrɔli fànikpaʔa worogulo kàbaan lɛ̀ʔɛlɛ ni.

¹⁹ Mí yataʔaya togoye siin sámaga, wálifiio wóyo mi le tiikpakpaayi toko láara ni. Mɔ a yataʔaya siin-ziin le tiikpakpaayi myɛ nibin nibin láara ni,

²⁰ gee gi kpɔ̀ʔɔrɔli fànikpaʔa lɛʔɛziin wólo kéele kwɔ́ɔ lè li lè solomɔkulo kàbangi na, loro tiikpakpaayi a wɔ́ɔ pye toko.

²¹ Ní yi yataʔayi togoye siin yi lè wálifiiw wóyo, yoro siin-ziin í pye tiikpakpaʔa o tiikpakpaʔa láara ni.

²² Mɔ a tiikpakpaaya kɔrɔni sámaga kpɔ̀ʔɔrɔli fànikpaʔa kadoʔomaw kéele na, ki lè canʔajeemɛ kabangi.

²³ Ki n yɛlɛ mi tiikpakpaaya siin-ziin sámaga kpɔ̀ʔɔrɔli fànikpaʔa fungomaw jɛ̀ɛ́ngéle kéele na.

²⁴ Yi a sígi yiyɛɛ na táàma, vèʔege si sa yi fínaagèle cò bi sámaga táriga yiyɛɛ na. Koro wonijangi ki a kpéʔele yee myɛ siinw na yi nyɛ lè jɛ̀ɛ́ngèle siin na.

²⁵ Kánmi bee na tiikpakpaaya kɔrɔtaanri a pye yaà ní yi yataʔayi ní yi a pye lè wálifiio wóyo. Yi a pye yataʔaya kɛɛ ní kɔrɔni. Tiikpakpaayi myɛ yataʔaya siin-ziin a pye tiikpakpaayi myɛ nibin nibin láara ni.

²⁶ Mɔ a tiipalagéle kagunɔ sámaga akasya wòʔolo, kpɔ̀ʔɔrɔli fànikpaʔa lɛʔɛlaa nibin tiikpakpaaya kéele na,

²⁷ kèle kagunɔ í sámaga kpɔ̀ʔɔrɔli fànikpaʔa lɛʔɛziin wólo tiikpakpaaya kéele na. Kèle kagunɔ si wɔ́ɔ sámaga kpɔ̀ʔɔrɔli fànikpaʔa kadoʔomaw tiikpakpaaya kéele na canʔajeemɛ ma.

²⁸ Níngi tiiparila li a pye lè tiikpakpaayi nínge ni, li a séli láʔalee na bi sa sígi lee na.

²⁹ Mí tiikpakpaayi tɛ́ɛyɛ myɛ tɔ́n ní tɛɛ̀ ní. Mí tɛɛ̀ vèʔeye sámaga, yee ni tiipalagèle a foro lè. Mí tiipalagèle tɛ́ɛyɛ myɛ tɔ́n ní tɛɛ̀ ní.

³⁰ Kánmee bi tɛ̀ɛn mɔ na nyanbelegi na lè, ki n yɛlɛ mi kpɔ̀ʔɔrɔli fànikpaʔa sámaga mi yɛlɛ ní kánmi bee ní.

³¹ Ki n yɛlɛ mi fànipariɔ sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè. Pé syerubɛnbéle sámaga wi na bi yɛlɛ ní kacánmi fálipyeganma ní.

³² Mí wi cɔ̀rɔ akasya tíire gaangéle sicɛrɛ na, gele pe a tɔ́n ní tɛɛ̀ ní lè, ge tɛɛ̀ yacɔrɔgèle na. Gàángèle si yére wálifiiw yataʔaya sicɛrɛ na.

³³ Mɔ a fànipariw cɔ̀rɔ yakparagèle láara ni. Nɛɛ bee mɔ a séeraw kásu lége bi tɛ́ʔɛ fànipariw màʔama na. Fànipariw a tɛɛcǎngi, ní tɛɛcàndelegi bee wàli bi láʔa yiyɛɛ na yele ma.

³⁴ Ki n yɛlɛ mi kapeegèle kùsulugo tɛ́ʔɛ tɔ́n séeraw kásu nyɔ́ɔ na, tɛɛcàndelegi ni.

³⁵ Ki n yɛlɛ mi tàbaliw tɛ́ʔɛ fànipariw yɛ́ʔɛ ma, fètindaʔali si pye tàbaliw zìnmɛ na kpɔ̀ʔɔrɔli fànikpaʔa worogulo kàbangi na. Mí tàbaliw tɛ́ʔɛ solomɔkulo kàbangi na.

³⁶ Mí fànikpaagi tɛɛ̀jeele kpaaweetɔn-fàni sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè.

³⁷ Mí akasya tíire gaangéle kagunɔ sámaga kpaaweetɔn-fàniw kéele na, mí tɛɛ̀ tɛ́ʔɛ mi ge tɛ́ɛyi myɛ tɔ́n. Wi yacɔrɔgèle si pye tɛɛ̀ wòʔolo. Mí kanyɛɛnrɛ gbàla mi pye gàángèle yataʔaya.