Yirile 25 - Cebaara Bible 2010

TƐƐCANGI SAMAGAGANMA TƐƐNNƐ Isirayɛli ye yakaanri kéele

¹ A Yawe gi joo Mowizi ma níì wi pye:

² «Ki joo Isirayɛli ye ma pe yakanʔa wòlo be yáriri ni be kaan mii ma. Syɔɔn o syɔɔn wi ga fɔ̀lɔ bi kaan ní funjànga ní lè, ye wi yakaangi bee syɔɔ.

³ Yakaanree yele a syɔɔ be ma lè, toro di nyɛ dee naa: Tɛ́ɛw, ní wálifiiw, ní kanyɛɛnri,

⁴ ní kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fàni fɛɛlɛfɛɛlɛw, n fàra sike-síiri na,

⁵ ní bàpɔbèle sáliya be nyɛ́nɛgɛ lè, n wɔ́ɔ̀ fàra dofɛn sáliya na, ní akasya tíiri,

⁶ ní fètinni sìnmɛ, ní nùndaanni yárira, dee bee a pye kàlifaali sìnmɛ, ní nùndaanni yasorigoro kéele na,

⁷ ní onikisi kàdɛɛngèlē, n fàra kàdɛɛngèle kèle nikwɔɔ na, gele ke a pye lè efɔdiw, ní fìcibigi yáriga kéele na.

⁸ Pé tɛɛcànga sámaga mii ma jàngó mii í kòro be níngi ni.

⁹ Kánmee na mii ga fànikpaagi sámagaganma ní gi yayigeleri myɛ sámagaganma tɛ̀ɛn mɔ na lè, ki n yɛlɛ ye ti myɛ sámaga bi yɛlɛ ní kánmi bee ní.

Joogaanni kásu kéele

¹⁰ «Ki n yɛlɛ pe kásu sámaga ní akasya tíire ní. Wi tɔnɔganmi í pye mɛ́tiri nibin, ní santimɛtiribéle toko ní kagunɔ, wi kpɔ́ʔɔganmi si pye santimɛtiribéle togoye taanri ní kpɔrigɔ ní kagunɔ, wi ǹjogi tɔnɔganma si wɔ́ɔ pye santimɛtiribéle togoye taanri ní kpɔrigɔ ní kagunɔ.

¹¹ Mí tɛɛteleo tɛ́ʔɛ mi wi kàdogi ní wi fúngi myɛ tɔ́n. Mí wi nyɔɔwari myɛ pye tɛɛ̀, bi wi màʔa kpàra.

¹² Mɔ a tɛɛwaa kpúmɔn bi pye vèʔeye sicɛrɛ, yee bee í pye wi jɛ̀ɛ́ngèle sicɛrɛ na. Tɛɛ̀ vèʔeye siin a pye lɛ̀ʔɛlee ni, siin í pye lee ni.

¹³ Mí tiingéle sámaga akasya tíire woʔolo, mí ge tɔ́n ní tɛɛ̀ ní.

¹⁴ Mí tíingèle le vèʔeyi ni, kásuw kàbanya siin na. Pe a ra kásuw lée ní gele bee ní.

¹⁵ Tíingèle n yɛlɛ bi kòro kásuw vèʔeye ni, ke a kɔ́ yirige í.

¹⁶ Séeraw kàlagorigēle mii a kaan mɔ ma lè, mi ge le kásuw ni.

¹⁷ Ki n yɛlɛ mí kapeegèle kùsulugo tɛ́ʔɛ sámaga ní tɛɛteleo ní. Ki tɔnɔganmi a pye mɛ́tiri nibin ní santimɛtiribéle toko ní kagunɔ. Ki kpɔ́ʔɔganmi si pye santimɛtiribéle togoye taanri ní kpɔrigɔ ní kagunɔ.

¹⁸ Mí tɛɛ̀ syerubɛnbéle siin sámaga, tɛɛ̀ mɔ a kpúmɔn bi be sámaga be pye kapeegèle kùsulugo tɛ́ʔɛ láʔagéle siin na.

¹⁹ Ki n yɛlɛ mi syerubɛnwaa sámaga láʔalee na, mí syerubɛnwee sámaga láʔalee na. Yele a syerubɛnbèle sámaga pínɛ ní kapeegèle kùsulugo tɛ́ʔɛ láʔagéle siin ní.

²⁰ Syerubɛnbèle a be fókaanyi yìrige ǹjogi ni bi kapeegèle kùsulugo tɛ́ʔɛ tɔ́n ní be fókaanyi ní, si be yɛ́ɛyi wáa peyɛɛ ma, si be yɛ́ɛyi le kapeegèle kùsulugo tɛ́ʔɛ ni.

²¹ Mí kapeegèle kùsulugo tɛ́ʔɛ tɔ́n kásuw nyɔ́ɔ na. Séeraw kàlagorigēle mii a kaan mɔ ma lè, mí koro le kásuw ni.

²² Mii a ra mɔ fàrá kapeegèle kùsulugo tɛ́ʔɛ ǹjoʔo ni, séeraw kásu na syerubɛnbèle siin nínge ni, koro ga pye bàā mii tundunri myɛ nyuu da gbàngí mɔ ma Isirayɛli ye kéeli na.

Búruw wi kaan Kolocɔlɔɔ ma lè woro tàbaliw sámagaganma

²³ «Ki n yɛlɛ mi tàbali sámaga ní akasya tíire ní. Wi tɔnɔganmi í pye mɛ́tiri nibin, wi kpɔ́ʔɔganmi si pye mɛ́tiri tíla, wi ǹjogi tɔnɔganma si pye santimɛtiribéle togoye taanri ní kpɔrigɔ ní kagunɔ.

²⁴ Ki n yɛlɛ mi wi myɛ tɔ́n ní tɛɛteleo ní, mí wi kàgomi pye tɛɛ̀ mi wi màʔa mi kpàra.

²⁵ Mi kádiri pye wi na mi wi màʔa. Kádiriw yɛ́ʔɛ kpɔ́ʔɔganma si pye santimɛtiribéle kɔrɔtaanri. Mi tɛ́ɛw pye wi kádiriw kàgomɔ na mi wi màʔa.

²⁶ Mɔ a tɛɛ̀ vèʔeye sicɛrɛ kpéʔele bi táriga tàbaliw na. Vèʔeyi bee a pye jɛ̀ɛ́ngèle sicɛrɛ na tɔ́lɔyi sicɛrɛ na.

²⁷ Tɛɛ̀ vèʔeyi a pye kádiriw láara ni beè tíingèle a ra nii lè jàngó bàā tàbaliw lee.

²⁸ Mi akasya tíingèle sámaga, mí tɛɛ̀ tɛ́ʔɛ mi ge tɛ́ɛyi myɛ tɔ́n. Gele bee ní pe a ra tàbaliw lée.

²⁹ Mɔ a wi tásaayi, ní wi yagbaagèle, ní wi yalegèle sámaga, n fàra wi pɛ́ɛgèle na sáriga-yólogow kéele na. Mi di sámaga ní tɛɛteleo ní.

³⁰ Búruw wi kaan mii ma lè mɔ a ra wi téeri tàbaliw bee na mii yɛ́ʔɛ ma làla o làla.

Fètingɔyi kɔrɔsiin fetindaʔala kéele

³¹ «Ki n yɛlɛ mi fètindaʔala sámaga ní tɛɛteleo ní. Fètindaʔali bee a sámaga ní tɛɛ̀ ní wee be kpúmɔn lè. Li nɔ́gi, ní li kàganagi, ní li yalegèle, ní li puungèle, ní li tiifyɛɛnri niwiriye a sámaga pínɛ bi táriga tiyɛɛ na.

³² Fètingɔyɔ kɔrɔni a yirige li kàganagi na fètingɔyɔ taanri a yirige kàganagi kàbangee na, taanri í yirige kàbangee na.

³³ Amandi niwiriye yalegéle taanri, ní puungéle, ní tiifyɛɛnrɛ niwiriye a pye fètingɔgaa nibin na. Amandi niwiriye yalegèle kèle taanri, ní puungèle kèle, ní tiifyɛɛnri niwiriyaa si wɔ́ɔ pye fètingɔgee na. Fètingɔyi kɔrɔni yi a yirige lè fètinganagi na, ànbée yee bee myɛ yɛlɛ bi pye.

³⁴ Gee si gi fètinganagi tiimaa kéele kwɔ́ɔ lè, amandi niwiriye yalegéle sicɛrɛ n yɛlɛ bi pye gi na, n fàra yi puungèle, ní yi tiifyɛɛnri niwiriye na.

³⁵ Puunnɔ nibin a pye fètingɔ-séliyi siin tɛɛwàliga ni, fètinganagi na, puunnaa si pye fètingɔyee siin tɛɛwàliga ni, fètinganagi na, puundaanri wóli si pye fètingɔyee siin tɛɛwàliga ni. Kánmi bee na fètindaʔali kɔ́yɔ myɛ kɔrɔni a pye.

³⁶ Puungèle ní fètingɔyi myɛ n yɛlɛ bi sámaga pínɛ bi táriga tiyɛɛ na. Li myɛ n yɛlɛ bi pye tɛɛteleo, wee be kpúmɔn lè.

³⁷ Mɔ a li fètingèle kɔrɔsiin sámaga. Fètingèle n yɛlɛ bi tɛ́ʔɛ kanmaa na jàngó kaa nyín yɛʔɛ̀ ma.

³⁸ Li lele-yáriri, ní li cɔɔnkoli-yáriri a pye tɛɛteleo wóro.

³⁹ Tɛɛteleo cúlobéle toko ní kpɔrigɔ pe a tɛ́ʔɛ bi fètindaʔali, ní li yayigeleri myɛ sámaga.

⁴⁰ Ki sámaga mi wéle Mowizi, mí sa fáliw kpéʔele bi yɛlɛ ní kánmee ní mii tɛ̀ɛn mɔ na nyanbelegi na lè.