Yirile 24 - Cebaara Bible 2010

Kolocɔlɔɔ n joogaanna kpéʔele ní Isirayɛli ye ní

¹ A Kolocɔlɔɔ gi joo Mowizi ma níì wi pye: «Lúgu naa mɔ tiimaa, mii Yawe ma nyanbelegi na, mɔ ní Aarɔn, ní Nadabi, ní Abihu, n fàra Isirayɛli wólɛɛbèle togoye taanri ní kpɔrigɔ na. Yele a ba kòro léelige si too bi yɛ́ɛyi cíbele.

² Mowizi nibin wi a nùuni mii Yawe na. Wozanbèle ga yɛlɛ bi nùuni naa í. Syɛ́ɛnmi ga wɔ́ɔ̀ yɛlɛ bi lúgu ní wi ní í.»

³ A Mowizi sáà Yawe syɛ́ɛnri bee myɛ joo Isirayɛli syɛ́ɛnbèle ma n fàra wi tundunri myɛ na. A syɛ́ɛnbèle myɛ pínɛ n bɛ̀ɛ nibin na níì gi joo Mowizi ma níì jo: «Syɛ́ɛnree Yawe joo lè, wolo a ti myɛ foro.»

⁴ A Mowizi Yawe syɛ́ɛnri myɛ sɛ́bɛ. Koro kàdoʔo ma a wi sɔ̀li n yìri n sáriga-wòlo-yafanʔa faan nyanbelegi tìgimɛ ni, n fàra gàángéle kɛɛ ní siin na n yɛlɛ ní Isirayɛli syɛɛnfeleyi kɛɛ ní siin nyɔ́ɔ ní.

⁵ A wi Isirayɛli nìgɔcaribèle pèle tun a be sáà sáriga-sórigoo wòlo, ní wɔ́ɔ̀ náapegèle kèle kɔnɔgi n pye pínɛnyɛnnɛgɛ sáriga Yawe ma.

⁶ A Mowizi sìsyaanw tílawaa le yaleyaa ni, níì tílawee nyari nyari sáriga-wòlo-yafaangi na.

⁷ A wi joogaanni sɛ́bɛ láa n wi syɛ́ɛnri wéle n joo syɛ́ɛnbèle ma. A be jo: «Gee myɛ Yawe joo lè, wolo a gi kpéʔele foro sáā lúro wi ma.»

⁸ A Mowizi sìsyaanw láa n nyari nyari syɛ́ɛnbèle na níì jo: «Joogaanlee Yawe kpéʔele ní yele ní lè syɛ́ɛnri naa myɛ kéele na, loro sìsyaanw wi nyɛ wee naa.»

⁹ A Mowizi lúgu nyanbelegi na, woro ní Aarɔn, ní Nadabi, ní Abihu, n fàra Isirayɛli wólɛɛbèle pèle togoye taanri ní kpɔrigɔ na.

¹⁰ A be Isirayɛli ye Kolocɔlɔw nyaa. Wi tɔ́lɔyi láara maa pye àmɛɛ yarigaa nyɛ gee be sámaga ní safiiri ní lè, ki i nyɛ́ʔɛnɛ ní i nyɛ búula cére na àmɛɛ nyɛ̀ʔɛni gáà cèlege lè.

¹¹ Wi ga kɔlɔ̀ sánʔa n taʔa Isirayɛli wonyɛnɛ-wòlobèle na í. Pe maa Kolocɔlɔɔ nyaa, níì lìi níì gbaa.

Mowizi n Kolocɔlɔɔ fàra nyanbelegi na

¹² A Yawe gi joo Mowizi ma níì wi pye: «Ki n yɛlɛ mi lúgu naa mii ma nyanbelegi na mi ba pye naa. Mii a ba kàdɛnɛyɛ kàlagorigēle kaan mɔ ma, gele na mii làlwaw ní tundunri sɛ́bɛ lè be tamani kéele na.»

¹³ A Mowizi yìri, a wi falipyew Zyozuwe pínɛ ní wi ní n lúgu Kolocɔlɔɔ nyanbelegi na.

¹⁴ A wi gi joo wolɛɛbèle ma níì be pye: «Ye wolo sige nɛɛ naa bi taa wolo í lúru pan yele ma. Aarɔn ní Huri be nyɛ bele ní yele ní, keele ga pye yele wàa ma bi cɔɔnri, ki n yɛlɛ wi kári be ma.»

¹⁵ A Mowizi lúgu nyanbelegi na, á fàfaangi nyanbelegi tɔ́n.

¹⁶ A Yawe nìjangbɔɔri baa tɛ́ɛn Sinayii nyanbelegi na, a fàfaangi gi tɔ́n canya kɔrɔni fúngo ni. Canya kɔrɔsiin wógi na, a Yawe kòro yaà fàfaangi fúngo ni níì Mowizi yeri.

¹⁷ Yawe nìjangbɔɔri kánma maa pye Isirayɛli ye nyɛ́nɛ na àmɛɛ naà nyɛ, gee gi sórigolo kpéʔele lè nyanbelege ǹjoʔo ni.

¹⁸ A Mowizi jée fàfaangi fúngo ni n lúgu n kári nyanbelegi na, ní sáà kwɔ́ɔ yaà nyanbelegi na canya togoye siin ní yébiliye togoye siin.