Yirile 23 - Cebaara Bible 2010

Fànʔafunvɔbèle kpɔ́ʔɔlɔ kéele

¹ «Mɔ a kɔ́ jànvaa syɛɛnjóoro láa bàā nyuu da máari í. Mɔ a kɔ́ pínɛ ní syɛɛnpeeo ní bi jànvaa séera kpéʔele bi wi dɛ̀ɛmɛ í.

² Mɔ a kɔ́ taʔa syɛɛnnɛʔɛmi na si kapeʔe kpéʔele í. Mɔ a kɔ́ mɔ séeraw fàli syɛɛnnɛʔɛmi kéele na bi kútiiw kálagi í.

³ Mɔ a kɔ́ pwɔɔ syɔɔnwaa fóomɔ na si wi kútiiw tɛ́nɛ wi na í.

⁴ Mɔ nígoo nɔ̀ɔ, wàlá wi jòfani ga pùuni, á mɔ wi nyaa, ki n yɛlɛ mi wi kɔ́ri mi ba kaan wi ma.

⁵ Wee mɔ kéeli bɛɛn lè mɔ ga wi jòfani nyaa a wi too wi túgori láara ni, ki ga yɛlɛ mɔ í sɔ̀lɔ́ fala si wi yaʔa í, ki n yɛlɛ mi wi dɛ̀ɛmɛ ye di láʔa wi na.

⁶ Mɔ a kɔ́ tànʔa syɔɔ fɔ̀ngɔ fɔ́lɔ ma wi kútii joolo ni í, ki ga yɛlɛ mɔ í ba wi kútiiw kálagi í.

⁷ Mɔ a kɔ́ yére jànvaa syɛɛnjóoro ni í. Mɔ a kɔ́ tɛɛlɛ fun syɔ́ɔn, wàlá syɛɛnsiɔn kpóo í. Níì cán mii a tée syɛɛnpeeo córo bi jo wi n sín í.

⁸ Mɔ a kɔ́ ra námara kpɔ́ʔɔrɔ syoo í, níì cán námara kpɔ́ʔɔri i kanyaabèle kàragí fúunbéle. Ti i syɛɛnsinbèle syɛ́ɛnrɛ fɛ̀ɛ́.

⁹ Mɔ a kɔ́ mɔ fangi gbàn nibɔnw na wi baa tɛ́ɛn ní yele ní lè í, ncan yele n nibɔnmi kánma cán, níì cán yele maa wɔ́ɔ̀ pye nibɔɔnnɔ Ezyipiti tári ni.

Ŋɔ́ndaali yɛ́ɛlɛ ní ŋɔ́ndaali canʔa kéele

¹⁰ «Yɛ̀ʔɛlɛ kɔrɔni fúngo ni, mɔ a ra lùguri lúru mɔ tári na, si wɔ́ɔ ra di lée.

¹¹ Kàjáa yɛ̀ʔɛlɛ kɔrɔsiin wóli na, mɔ a tári yaʔa ti ŋɔ́n daa, mɔ a kɔ́ di fála í. Bele be nyɛ lè fɔ̀rɔgɔfɔbèle yele ni, poro ní sìnbirigi yaweere a ra wogorodi líi. Gee bee wonijanga mɔ a wɔ́ɔ kpéʔele ní mɔ ɛrɛzɛn ségi, ní mɔ olivye tíiri ní.

¹² Mɔ a mɔ fáliw kpéʔele canya kɔrɔni fúngo ni, kàjáa can-kɔrɔsiin wógi na, mɔ a mɔ fáliw yaʔa koro ga pye mɔ niyi, ní mɔ jofanibèle í ŋɔ́n daa. Mɔ púlocew pyà, ní mɔ nibɔnw n yɛlɛ bi ŋɔ́n daa.

¹³ Kérigèle gele myɛ mii joo yele ma lè, ki n yɛlɛ yaa ge kɔ̀rɔsíi. Yele a ní kɔ́ sɔ̀ngi taa kolocɔlɔwaa faala mɛ́ʔɛ na bàā yiri í. Ki ga yɛlɛ syɔɔn faala í kɔ́ pe wàa mɛ́ʔɛ lóʔo mɔ nyɔ́ɔgi na í.

Fɛ́tiibèle be yɛlɛ bàā kpéʔele lè Isirayɛli ni

¹⁴ «Ki n yɛlɛ maa fɛ́tii tɛ́ɛyɛ taanri kpéʔele mii kpɔ̀ʔɔrɔli kéele na yɛɛlɛ o yɛɛlɛ.

¹⁵ Mɔ a ra levé fun búruw séri kpéʔele. Levé Fun búruw mɔ a ra líi canya kɔrɔsiin fúngo ni, làridɛ̀ɛ́nni ni, Abiibi yégi ni bi yɛlɛ ní gi ní àmɛɛ mii gi joo n gbàn mɔ ma lè. Níì cán yégi bee ni mɔ yiri Ezyipiti ni. Syɔɔn a kɔ́ pan ba yére ní kɔwaayi ní mii yɛ́ʔɛ ma í.

¹⁶ Ki n yɛlɛ mi yaliiseliri fɛ́tii canʔa kéele cò. Wi a pye lǎli ni yele ga tɛ́nɛ̀ yaliiseliri láa lè. Mi wɔ́ɔ yaliilaari fɛ́tii canʔa kéele cò. Gee bee a pye yɛɛgbaraw na, lǎli ni mɔ ga mɔ séyi yaliire láa n kwɔ́ɔ lè.

¹⁷ Yɛɛlɛ o yɛɛlɛ mɔ syɛɛnfelegi nànbēle myɛ a kpóʔoro mii yɛ́ʔɛ ma tɔlɔyɔ taanri, mii wee wi lè Kàfɔw Yawe.

¹⁸ Mɔ a kɔ́ mii sárigaw sìsyaan wòlo ní levé búru ní í. Mii sériw yaweele be kɔni lè li sǐnmi ga yɛlɛ bi tɛ́ʔɛ bi syɔ́ɔn í.

¹⁹ Ki n yɛlɛ maa maa ní mɔ ségi yaliifɔnrɔ yaliiselire ní mii kpáagi ma, mii wee wi lè Yawe mɔ Kolocɔlɔw. Mɔ a kɔ́ kapiige sɔʔɔ ki nɔɔ̀ yíremɛ ní í.

Nyɔɔfaliya ní tamagéle sáni be kári lè

²⁰ «Wéle, mii a nyɛ̀ʔɛni tundunwaa tun wi kíni mɔ yɛ́ɛgi na bàā mɔ kɔ̀rɔsíi kólogi na, si kári sa nan ní mɔ ní tɛ́ɛgi na gee mii sámaga n yaʔa lè.

²¹ Ki n yɛlɛ mi miyɛɛ cǒmi cán wi yɛʔɛ̀ ma, máā lúro wi ma. Mɔ a kɔ́ wi cée í. Níì cán wi a fɔ̀lɔ́ ra mɔ sinloʔomi kùsulugo syoo í. Ncan mii mɛ́ɛgi i nyɛ wi na.

²² Mɔ si ga ni lúro wi ma, ní i gi kpéʔele gee myɛ mii joo mɔ ma lè, lǎli bee ni mii a pye mɔ nigoobèle nígoo, si wɔ́ɔ pye mɔ kasiitun-nyɛ́nbèle kàsiitun-nyɛ́nnɛ.

²³ Mii nyɛ̀ʔɛni tunduɔn a kári ní mɔ ní sa lége Amɔri ye tári, ní Hɛti ye wóri, ní Perezi ye wóri ni, n fàra Kanaan yé, ní Hɛvi ye ní Yebusi ye wóri na. Mii a bele bee myɛ kálagi péw.

²⁴ Mɔ a kɔ́ ra tuun be kolocɔlɔbèle yɛ́ʔɛ ma í wàlá bàā be kpɔ̀ʔɔrɔ́ í. Mɔ a kɔ́ ra syɛɛnfeleyi bee kakpéʔelegéle tɛ́ɛlɛ í. Mɔ a be kolocɔlɔbèle kpúmɔn cáan, mí be yasungaangèle jabagi.

²⁵ Yele a ra Yawe yele Kolocɔlɔw kpɔ̀ʔɔrɔ́. Wi a dùbaw taʔa mɔ yaliiri ní mɔ logbaagi na. Mii a yáami nɛnɛ bi léeli mɔ tɛ́ɛgi na.

²⁶ Cɔlɔɔ fícɛnnɛ a tée kálagi mɔ tári ni í, cenaa-sìnzeeo a wɔ́ɔ pye yaà í. Mii a gi yaʔa yele í ra leegi gbanʔama.

²⁷ Mii a mii fyáakpɔɔri yaʔa di kíni mɔ yɛ́ɛgi na. Syɛɛnfeleyee tɛ́ʔɛ ma mɔ syée lè, mii a yee bee myɛ yaʔa yaa fɛ̀ɛgí mɔ na. Mii a mɔ nigoobèle myɛ yaʔa be kàdoʔo kaan bàā fé mɔ na.

²⁸ Mii a zèrenaàjiriye tórigo mɔ yɛ́ʔɛ ma, yee bee a sa Hɛvi ye ní Kanaan ye, ní Hɛti ye nɛnɛ bi léeli mɔ na.

²⁹ Mii a be nɛnɛ bi yirige yaà mɔ yɛ́ʔɛ ma yɛɛlɛ nibin ni í, koro ga pye tári a kɔ́ kòro wowaara ní, sìnbirigi yaweere si nɛʔɛ bi yìri mɔ kurugo í.

³⁰ Mii a ra be nɛnɛ cɛɛri cɛɛri yele yɛ́ʔɛ ma bi taa yele í ba nɛʔɛ si gbǎn tári syɔɔ taa.

³¹ Mii a mɔ láʔagologi yaʔa gi séli Nyɛnɛri solomɔ lɔ́ʔɔ na si kári sa láʔa Filisitini tári solomɔ lɔ́ʔɔ na, si ní láa yaà fìími tára na bi kári sa nan Ufurati cábigi na. Níì cán mii a tári syɛ̀ɛnnɛ le mɔ kɔ́yi ni, mɔ a be nɛnɛ yirige yaà miyɛɛ yɛ́ʔɛ ma.

³² Mɔ a kɔ́ joogaanna kpéʔele ní be ní í, wàlá ní be kolocɔlɔbèle ní í.

³³ Pe ga yɛlɛ be tɛ́ɛn mɔ tári ni í, jàngó pe a kɔ́ mɔ kàriga mɔ í da kapeegèle kpéʔele mii na í. Níì cán mɔ a kɔ́ ba ra be kolocɔlɔbèle kpɔ̀ʔɔrɔ́, gee bee si a pye mɔ na karinyanga.»