Yirile 21 - Cebaara Bible 2010

Kajoolo Heburu-púlobèle kéele na

¹ «Làlwaw kèlē mɔ a tɛ̀ɛn be na lè, koro ge nyɛ gele naa.

² Mɔ ga puloo syɔɔ wí i nyɛ Heburuo, yɛ̀ʔɛlɛ kɔrɔni wi a báara, kɔrɔsiin wóli na wi a pye wɔ́rɔɔ bi yiri kári yafyɛn sìnzara ni.

³ Kapye wi maa pan wi nibin, wi a wɔ́ɔ kári wi nibin. Kapye wi si maa pan ní cɔlɔɔ ní, wi a wɔ́ɔ lúru kári ní wi céw ní.

⁴ Kapye wi kàfɔw maa cɔlɔɔ kaan wi ma, a wi nànbiigéle, wàlá calipiigèlē see wi ma, céw ní wi pìíbèle a kòro yaà wi kàfɔw ma, wi nibin sáā syée.

⁵ Púlow si ga gi joo níì jo: ‹Mii kàfɔw, ní mii céw, ní mii jáabèle kéele n mii dɛ́nɛ, mii o caa bi pye wɔ́rɔɔ bi yiri kári í,›

⁶ lǎli bee ni wi kàfɔw a kári ní wi ní Kolocɔlɔɔ yɛ́ʔɛ ma, si sɛ̀ʔɛrɛ ní wi ní kɔ̀rigi, wàlá kɔ̀riteligi na, si wi líigi fùru ní ŋaana ní. Lǎli bee ni púlow a kòro wi kàfɔw fáli na làla o làla.

⁷ Nànwaa jáa ga pye cɔlɔɔ, á wi wi pára puloo, wee bee yiriganma a pye ní pulonǎnbèle wómɔ ní sèjira í.

⁸ Kapye wi kàfɔw maa wi syɔɔ wi pye woro cɔ́ɔ, ní baa gi nyaa wi kéeli ga níì woro dɛ́nɛ í, wi a wi yaʔa pe wi nyúngi syɔɔ wi pye wɔ́rɔɔ. Ki ga yɛlɛ wi wi pára táraa syɔ́ɔn ma í, níì cán woro wi wi jànváa.

⁹ Kapye wi n wi syɔɔ bi kaan wi jáaw ma, gee be kpéʔele calipiigèle ma lè, ki n yɛlɛ wi gee bee wonijanga kpéʔele wi ma.

¹⁰ Wi ga níì cewaa nikwɔɔ láa, ki ga yɛlɛ wi kɔ kàa yirige wi ceseliw yaliire, wàlá wi yaleri, wàlá wi kpaasinɛ-kéeli ni í.

¹¹ Kapye wi o kérigèle naa taanri kpéʔele wi ma í, wi a gbǎn pye wɔ́rɔɔ bi yiri kári yafyɛn sìnzara ni, wáli sìngaan ni.

Kolomee kéele na pe a syɔɔn kpóo lè

¹² «Syɔ́ɔnwee wi ga wi syɛɛnnyɛnnɛ kpúmɔn n kpóo lè, pe a syɔ́ɔnw bee kpóo wii.

¹³ Ki si ga pye wi ga làra n wi syɛɛnnyɛnw sige níì wi kpóo í, fwɔɔ a gi pye mii Kolocɔlɔɔ wi gi yaʔa a wi kɔ́gi wi kpóo, mii a tɛɛgaa yaʔa gi pye yele ma syɔ́ɔnw bee í fàn bi sa jée yaà beè bi wiyɛɛ nyúngi syɔɔ.

¹⁴ Kàjáa syɔɔnwaa ga wiyɛɛ dɔri níì wi syɛɛnnyɛnnɛ kpóo gbánama ni, àlí wi ga fàn n sáà mii sáriga-wòlo-yafaangi cò, mɔ a sa wi kíle láʔa yaà bi kpóo.

¹⁵ Syɔ́ɔnwee wi ga wi toò wàlá wi nɔɔ̀ kpúmɔn lè, syɔ́ɔnw bee a kpóo wii.

¹⁶ Syɔɔn ga syɔɔnwaa yùu n pára, wàlá n wi yaʔa wiyɛɛ kɔ́lɔ na, á be tɛ́nɛ̀ wi nyaa wi ma, syɔ́ɔnw bee a kpóo wii.

¹⁷ Wee wi ga syɛɛnpeere joo n wáa wi toò wàlá wi nɔɔ̀ na lè, wee bee a kpóo wii.

Kúruyi ní kpàliyi kéele

¹⁸ «Nǎnbèle pèle ga ni túngu, á wàa wàa kpúmɔn ní kàdɛnɛgɛ ní, wàlá ní kágunnɔ ní, wi si ga kùu í, fwɔɔ a wi i yáa n sínɛ yasinɛgɛ na,

¹⁹ wi ga baa gbàn n yìri ni nyaari kàgbeele na kàfugo ma, wi kpúmɔnfɔw a náa gbǎn pye wɔ́rɔɔ. Koro ní ki myɛ ní lǎlee wi kwɔ́ɔ lè sìnbaara ni, wi a lee bee sàra wi ma, sáā wi báara bi taa wi ba pɔʔɔ foro péw.

²⁰ Nàɔn ga wi pulonàɔn wàlá wi pulocaà kpúmɔn ní kàgbeele ní, a púlow kùu wi kɔ́gi ni, pe a wi gɔ̀lɔ́w wòlo wi na.

²¹ Kàjáa púlow ga canʔa nibin wàlá canya siin kwɔ́ɔ ní náà kùu, pe a ní gɔ̀lɔ́w wòlo wi kpóofɔw na í, níì cán wi walì wii.

²² Nǎnbèle pèle ga ni túngu ní sáà fícɛnnɛ fɔ́lɔ círi n taa, níì wi kaan a wi kébe n see, yafyɛn si ga níì céw taa í, céw nàɔn ga nyɔ́ɔgee tɛ̀ɛn lè, kolomɔfɔw a wáli nyɔ́ɔgi bee sàra bi yɛlɛ ní kútiijoobèle syɛ́ɛnrɛ ní.

²³ Kàjáa yarigaa ga wi taa, mɔ a sìiwaa yaʔa wi pye wàa sìndɛʔɛ ni,

²⁴ nyapilaa í pye làa sìndɛʔɛ ni, gǎnnaa í pye làa sìndɛʔɛ ni, kɔgaa í pye kàa sìndɛʔɛ ni, tɔlɔgaa í pye kàa sìndɛʔɛ ni,

²⁵ sógulo í pye sógulo sindɛʔɛ ni, kpàlila í pye kpàlila sìndɛʔɛ ni, kpumɔnnamiga í pye kpumɔnnamiga sìndɛʔɛ ni.

²⁶ Nànwaa ga wi pulonàɔn wàlá wi pulocaà kpúmɔn n nyapili jaa, wi a wi yaʔa wi pye wɔ́rɔɔ bàā syée koro í pye wi nyapili sàra.

²⁷ Wi ga wi pulonǎnw wàlá wi pulocew kpúmɔn n gǎnnaa kɔ́n, wi a wi yaʔa wi pye wɔ́rɔɔ bàā syée koro í pye wi gǎnni sàra.

²⁸ Náapɛɛlɛ ga nàɔn wàlá cɔlɔɔ círi ní nyɛ́ngèle ní n kpóo, náapeli bee n yɛlɛ pe li wábagi ní kàdɛnɛrɛ ní bi kpóo. Náapeli bee káara ga yɛlɛ pe di káa í. Kolomɔ si a ní pye náapeli fɔ́lɔ na í.

²⁹ Kàjáa kapye náapeli maa tàli ni cínɛ ní nyɛ́ngèle ní, a pe baa koro joo li kàfɔw ma, wi si ga fɔ̀lɔ n li pwɔɔ í, náapeli bee ga nàɔn, wàlá cɔlɔɔ kpóo, pe a li wábagi ní kàdɛnɛrɛ ní bi kpóo, si wɔ́ɔ li kàfɔw kpóo.

³⁰ Pe si ga wáli nyɔ́ɔgee taʔa wi na lè, gee wi yɛlɛ bi sàra bi wiyɛɛ nyúngi syɔɔ lè, ki n yɛlɛ wi gi myɛ sàra.

³¹ Náapeli ga wàa pyà círi n kpóo, nàɔn, wàlá cɔlɔɔ, làlwaw bee wonijaɔn pe a foro bi yɛlɛ ní kútiiw kúunganma ní.

³² Kapye pulonàɔn, wàlá pulocaà náapeli círi n kpóo, náapeli fɔ́lɔ a wálifiio támabéle toko ní kpɔrigɔ córo kaan púlow fɔ́lɔ ma, pé náapeli wábagi bi kpóo ní kàdɛnɛrɛ ní.

³³ Syɔɔn ga lɔ̀ʔɔ wéʔe yaʔa womúgugo ní, wàlá n lɔ̀ʔɔ wéʔe túgu, wi si ga gi tɔ́n í, nɔ̀ɔ, wàlá jòfani ga too gi ni,

³⁴ wéegi fɔ́lɔ a wáli sàra yaweegi fɔ́lɔ ma, yaweekuugi si kòro wéegi fɔ́lɔ ma.

³⁵ Syɔɔnwaa náapɛɛlɛ ga wàa wólo círi n kpóo, ki n yɛlɛ pe woweeli pára pe siinw si wáliw lɛɛ peyɛɛ na, pé wɔ́ɔ woguuli lɛɛ peyɛɛ na.

³⁶ Ki si ga pye náapeli maa tàli ni cínɛ, a pe gi joo li kàfɔw ma, wi si ga fɔ̀lɔ n li pwɔɔ í, wi a woweeli kaan woguuli fɔ́lɔ ma woro si kòro ní woguuli ní.

Yaweeri yùulo kéele

³⁷ «Syɔɔnwaa ga nɔ̀ɔ, wàlá byà, wàlá sikaà yùu, níì yaweeli bee kpóo, wàlá n li pára, kapye nɔ̀ɔ wii, wi a gi sàra ní nìye kagunɔ ní. Ki si ga pye byà, wàlá sikaà, wi a gi sàra ní bàala sicɛrɛ, wàlá sikaala sicɛrɛ ní.