Yirile 20 - Cebaara Bible 2010

Kajoodɛɛngèle kɛɛ kéele

¹ Lǎli bee ni a Kolocɔlɔɔ syɛ́ɛnri naa myɛ joo níì jo:

² «Mii wi nyɛ Yawe mɔ Kolocɔlɔw, wee wi mɔ yirige lè Ezyipiti tári ni, púlori kpaʔa ni.

³ Ki ga yɛlɛ kolocɔlɔwaa í ní kɔ́ pye mɔ ma mii yɛ́ʔɛ ma í.

⁴ Mɔ a kɔ́ yasungo sámaga í. Yáriri di nyɛ lè nyɛ̀ʔɛni na ǹjogi ni, ní dee di nyɛ lè naa tári na, ní dee di nyɛ lè lǒyi fúngo ni yaà tári táàma, mɔ a kɔ́ gee bee kàa faala niwirige tan í.

⁵ Mɔ a kɔ́ ra kpùmɔnɔ́ yatangi bee kàa taana í, wàlá bàā gi fáliw kpéʔele í. Níì cán mii wi lè Yawe mɔ Kolocɔlɔw, mii i nyɛ yejaʔa Kolocɔlɔɔ. Mii i tofɔbèle kolomɔ gɔlɔ́ wóo pe ní be yòdaʔayi na bi taa sa nan yìrigēle taanri ní sicɛrɛ wóli na, poro bele mii kéeli bɛɛn lè.

⁶ Bele si be tàmaga le ní mii ní lè, níì mii tundunri kɔn ní i di kpéʔele, mii i funjànga kpéʔele ní bele bee ní bi taa sa nan pe yòdaʔayi yìrigēle saala kagunɔ na.

⁷ Mii Yawe wi lè mɔ Kolocɔlɔw, mɔ a kɔ́ ra mii mɛ́ɛgi yeri gbanzan í. Níì cán wee wi ga mii Yawe mɛ́ɛgi yeri lè gbanzan, mii a wi córo kolomɔ-funvɔlɔ í.

⁸ Sɔ̀ngi mi taa cândɛnɛgi na mi gi yaʔa kɔlɔ̀ na.

⁹ Ki n yɛlɛ maa báara canya kɔrɔni bi mɔ fáliw myɛ kwɔ́ɔ.

¹⁰ Kàjáa canya kɔrɔsiin wógi i nyɛ mii Yawe mɔ Kolocɔlɔw cândɛnɛgɛ. Mɔ a kɔ́ fali faala kpéʔele gi ni í. Mɔ ní mɔ piiwee wi lè nàɔn wàlá cɔlɔɔ, n fàra mɔ falipyenǎnw, ní mɔ falipyecew, ní mɔ yaweeri, ní nibɔnbèle bele na be nyɛ mɔ kpáagi ni lè.

¹¹ Níì cán canya kɔrɔni fúngo ni mii Yawe nyɛ̀ʔɛni ní tári, ní sólomi lɔ̀ʔɔ, ní di fúnyi yárira myɛ sámaga, níì ŋɔ́n n daa canya kɔrɔsiin wógi na. Gee bee na Yawe dùbaw taʔa can-kɔrɔsiin wógi na, níì gi sámaga n yaʔa kɔlɔ̀ na.

¹² Da mɔ tóow ní mɔ nɔ́ɔw kpɔ̀ʔɔrɔ́, koro ga pye táree mii Yawe mɔ Kolocɔlɔw a kaan mɔ ma lè, mɔ siiw canya í nɛʔɛ di ni.

¹³ Mɔ a kɔ́ syɔɔn kpóo í.

¹⁴ Mɔ a kɔ́ kanɔnʔɔrɔ kpéʔele í.

¹⁵ Mɔ a kɔ́ yùu í.

¹⁶ Mɔ a kɔ́ jànvaa séera joo bi taʔa mɔ syɛɛnnyɛnnɛ na í.

¹⁷ Mɔ a kɔ́ nyabɛɛnnɛ taa mɔ syɛɛnnyɛnnɛ kpaʔa na í. Mɔ syɛɛnnyɛnnɛ cɔ́ɔ nyánbɛɛnnɛ ga yɛlɛ bi pye mɔ na í, wàlá wi falipyenàɔn, ní wi falipyecɔɔ̀, ní wi nɔ̀ɔ, ní wi jòfani, wàlá wi kɔlɔ̀ yárigaa faala nyabɛɛnnɛ a kɔ́ pye mɔ na í.»

¹⁸ A syɛ́ɛnmi myɛ ga nyɛ̀ʔɛni folomɔ, ní li nyɛ́ʔɛnɛmi nyaa, níì tòmaagi wìimɛ, ní nyanbelegi nyaa wírige, lǎli ni pe gee bee nyaa lè, a bi i cɛ̀lɛ́, bìngaataa-kéeli bee nyaana na níì canʔana n yére léelige.

¹⁹ A pe gi joo Mowizi ma níì jo: «Mɔ tiimaa maa nyuu wolo ma, wolo a ra lúro. Kolocɔlɔɔ ga yɛlɛ bàā nyuu wolo ma í, jàngó wolo a kɔ́ kùu í.»

²⁰ A Mowizi be yari: «Yele a kɔ́ ra fɛ̀ɛgí í, níì cán gee na Kolocɔlɔɔ pan lè, koro gi nyɛ bi ba yele sɛʔɛ wéle, koro ga pye yele í da fɛ̀ɛgí woro na, jàngó yele a kɔ́ ra kapeegèle kpéʔele í.»

²¹ Syɛ́ɛnbèle maa canʔana n yére, á Mowizi nùuni fàfaangi na, gee ni Kolocɔlɔɔ pye lè.

Sáriga-wòlo-yafaangi làlwa kéele

²² A Yawe gi joo Mowizi ma níì wi pye: «Ki n yɛlɛ mi syɛ́ɛnri naa joo Isirayɛli ye ma, mí be pye, mii n jo: ‹Yele n gi nyaa n mii yaʔa nyɛ̀ʔɛni na, mii n joo ní yele ní.

²³ Yele ga yɛlɛ bi kolocɔlɔbèle pèle nikwɔɔlɔ sámaga ní wálifiio, wàlá ní tɛɛ̀ ní bi yaʔa yeyɛɛ ma bi fàra mii na í.

²⁴ Ki n yɛlɛ mi pooro sáriga-wòlo-yafanʔa faan mii ma, gee na mɔ a ra mɔ sáriga-sórigow ní mɔ pínɛnyɛnnɛgi sáriga wóo lè, wi lè mɔ yaweeyiligèle ní mɔ yaweekpologèle wóo. Mii ga mii mɛ́ɛgi yaʔa a gi pye tɛ́ɛgee faala na lè, mii a ra maa yaà beè mɔ ma bi ba ra dùbaw taari mɔ na.

²⁵ Mɔ ga ni caa bi kàdɛnɛrɛ sáriga-wòlo-yafanʔa faan, mɔ a kɔ́ gi faan ní kàdɛnɛ-danra ní í. Níì cán mɔ ga mɔ falipye-yárigi taʔa kàdɛnɛyi na, gee bee a sáriga-wòlo-yafaangi nɔ́nʔɔ.

²⁶ Mɔ a kɔ́ ra lúru mii sáriga-wòlo-yafaangi na tɛɛ̀lúgugéle na í, koro ga pye mɔ níboriw a kɔ́ ra nyaagi í.›