Yirile 2 - Cebaara Bible 2010

Mowizi seeli ní wi pìími làla kéele

¹ A Levii narigbaagi nànwaa Levii narigbaagi calipilaa láa wi cɔɔ̀.

² A céw bee baa fícɛnnɛ taa n pyà see, nànbile. A wi gi nyaa wi n nyɔɔ, a wi wi làriga n baa taa yeye taanri.

³ Koro kàdoʔo ma àmɛɛ ki baa pye lè wi a ní gbǎn wi làriga í, a wi gbòolo láa, lee be tìin ní lònyɔɔ nyàā ní lè níì tári kùraa tɛ́ʔɛ n li pɔ̀li, níì li màra ní tiige kuro ní, níì pìíw le li ni ní sáà li tɛ́ʔɛ Niili cábigi nyɔ́ɔ na nyɛ́nɛri nínge ni.

⁴ Pìíw yɛʔɛfɔlɔ wi lè cɔlɔɔ, á woro sáà canʔana n yére yaà léelige jàngó bi gi wéle gee ki a pye wi na lè.

⁵ A Faraɔnw jáa si kɔ́ɔ̀ tìgi Niili cábigi ma bi sa wéli. Wi pìcaanyɛnbèle be pye ní wi ní lè a poro si sa ni nyaari ni máari Niili cábigi nyɔ́ɔ na. A wi kɔ́ɔ̀ wéle n gbòóli nyaa yaà nyɛ́nɛri nínge ni, a wi wi falipyecew tun wi sa li láa waa maa.

⁶ A wi si baa li múgu n wéle n pyà nyaa li ni, wi maa pye nànbile, a li i nyaan. A wi nyínimi wi taa. A wi jo: «Heburubèle pìiwaa mɔ nyaa wee naa.»

⁷ Lǎli bee ni a pìíw yɛʔɛfɔlɔ baa gi joo Faraɔnw jáa ma níì wi pye: «Mii í sa Heburubèle céwaa yeri lé bi pan wi ba ra pìíw naa kaangi waa ŋɔri mɔ ma?»

⁸ A Faraɔnw jáa wi yari: «Da syée.» Koro na pìcaapili kári n sáà pìíw nɔ́ɔ yeri.

⁹ A Faraɔnw jáa baa wi pye: «Pìíw láa wee, mi sa ra wi kaangi waa ŋɔri mii ma, mii a ra mɔ sàrá.» A céw pìíw láa n sa ni wi kaangi wi i ŋɔri.

¹⁰ Lǎli ni pìíw baa fuguri lè, a nafɔw kári ní wi ní n sáà kaan Faraɔnw jáa ma, a wi pye Faraɔnw jáa pyà. A wi wi mɛ́ɛgi le ni wi yiri Mowizi. Wi maa jo: «Níì cán lǒgi ni mii wi kíle n yirige.»

Mowizi n fàn n kári Madyan tári ma

¹¹ A Mowizi ga baa lɛɛ, cangaa a wi kári sa wi senyɛnbèle wéle, ní sáà pe faligbanw nyaa, níì wéle n Ezyipiti ye wówaa nyaa wi i Heburuwaa kpúmɔn, wi lè woro senyɛnwaa.

¹² A wi wéle n wiyɛɛ màʔa, wi ga syɔɔn faala nyaa í, a wi Ezyipiti ye nǎnw kpúmɔn n kpóo, níì wi làra n tɔ́n táminyɔɔw ni.

¹³ Koro nyǐndaligi na a wi níì yiri yaà ní sáà Heburubèle pèle siin nyaa pe i peyɛɛ gbúmɔn. A wi si kolomɔfɔw pye: «Nyàʔá na mɔ mɔ pínɛnyɛnw kpúmɔn?»

¹⁴ A nǎnw bee wi yari: «Wìí syɔ́ɔn wi mɔ télege mɔ í pye wolo kùndigi ní wolo kútiijooo? A mɔ i caa lé bi mii kpóo àmɛɛ mɔ Ezyipiti ye nǎnw kpóo lè?» A Mowizi fala n fyáa, a wi jo: «Kányɛʔɛ na, kéeli naa n tɔ̀nɔ n cán.»

¹⁵ Gee gi kpéʔele lè, a Faraɔnw gi cán, a wi fala ni caa bi Mowizi kpóo. Kàjáa Mowizi maa fàn n léeli Faraɔnw na n kári Madyan tári ma, ní sáà tɛ́ɛn kɔ̀lɔ́ taana.

¹⁶ Calipiigèlē kɔrɔsiin maa pye Madyan sáriga-wòlow ma. A bele bee pan ba lɔ̀ʔɔ kóo bi yaweeri yagbaaya nyìn bi be tóow yaweeyiligēle kaan ge gbaa.

¹⁷ A bànaʔabèle pèle si pan n baa be nɛnɛ. Lǎli bee ni a Mowizi yìri n be syɔɔ, níì be yaweeyiligèle kaan a ge gbaa.

¹⁸ A pe lúru n pan be tóow Erewuyɛli ma, a wi baa be pye: «Mɛ̀ɛ́ gi pye á yele wári n pan nya níjanʔa?»

¹⁹ A be wi yari: «Ezyipiti ye nànwaa wi wolo syɔɔ bànaʔabèle ma, àlí woro wi caà lǒgi kóo wolo ma n kaan yaweeyiligèle ma a ge gbaa.»

²⁰ A wi gi joo wi pìíbèle ma níì jo: «Sán wi nyɛ? Nyàʔá na yele nǎnw bee yaʔa yaà? Ye sa wi yeri wi ba lìi.»

²¹ A Mowizi fɔ̀lɔ n tɛ́ɛn nǎnw bee tɛ́ʔɛ ni. A wi wi pìíw Sefora kaan Mowizi ma wi cɔɔ̀.

²² A Sefora nànbile see. A Mowizi li mɛ́ɛgi le ni li yiri Gerisyɔmi. Níì cán wi maa jo: «Mii i nyɛ nibɔɔn tánibɔnrɔ ni.»

Kolocɔlɔɔ n Mowizi nyɛ́nɛ n wòlo bi Isirayɛli ye syɔɔ

²³ A làlaa saʔa ga kwɔ́ɔ gee bee kàdoʔo ma, a Ezyipiti fànʔafɔw kùu. N Isirayɛli ye yaʔa pe pulogbanri ni, a pe i cɛ́ɛn, ní i yákpogèle wáa gbanʔama. A be pulogbanri sùpiiwáara lúgu fwɔɔ n sáà nan Kolocɔlɔɔ na.

²⁴ A Kolocɔlɔɔ be sùpiigèle lóʔo, níì sɔ̀ngi joogaanni kéele na wi da kpéʔele Abirahami, ní Izaaki, ní Zyakɔbi ma lè.

²⁵ A Kolocɔlɔɔ Isirayɛli ye wéle níì sɔ̀ngi be kéeli na.