Yirile 19 - Cebaara Bible 2010

KOLOCƆLƆƆ N JOOGAANNA KPEʔELE NI ISIRAYƐLI NI Yawe n joogaanna kpéʔele Isirayɛli ye ma

¹ Isirayɛli ye yirili kàdoʔo ma Ezyipiti tári ni, ki yedaanri wógi na pe jée cángi bee Sinayii fìími tára ni.

² Erefidimi ni pe da yiri níì jée Sinayii fìími tára ni n be fànikpaayi kóri. Isirayɛli ye maa be fànikpaayi kóri n yɛʔɛ̀ wáa nyanbelegi ma.

³ A Mowizi lúgu n kári Kolocɔlɔɔ ma, a Yawe kòro yaà nyanbelegi ǹjoʔo ni níì wi yeri níì jo: «Ki n yɛlɛ mi syɛ́ɛnri naa joo Zyakɔbi kpáagi wòolo ma, pe lè Isirayɛli pìíbèle, mí be pye:

⁴ ‹Gee mii kpéʔele Ezyipiti na lè, ní kánmee na mii yele láa n pan mii tɛ́ʔɛ ma lè àmɛɛ nyɔɔdàdaga gi pìibēle lée gi fókaanyi na lè, yele tiimaa n gee bee nyaa.

⁵ Tɔ́ɔliw ni, yele ga ni mii jóomi lúro níì mii joogaanni cò, yele a pye mii tiimaa wòolo syɛɛnfeleyi myɛ nínge ni, níì cán tári myɛ i nyɛ mii wóro.

⁶ Yele a pye mii ma sáriga-wòlobēle fannyɔʔɔ, ní tɛɛlɛfun syɛɛnfelege.› Syɛ́ɛnri bee mɔ a joo Isirayɛli syɛ́ɛnbèle ma.»

⁷ A Mowizi pan ní baa syɛ́ɛnmi wólɛɛbéle yeri n kpóʔoro. Syɛ́ɛnree Yawe da joo n gbàn wi ma lè, a wi dee bee myɛ joo be ma.

⁸ A syɛ́ɛnmi myɛ bìnɛw gi joo níì jo: «Gee Yawe joo lè, wolo a ra gi kpéʔele.» A Mowizi sáà syɛ́ɛnbèle syɛɛnlurugoro joo Yawe ma.

⁹ Lǎli bee ni a Yawe gi joo Mowizi ma níì wi pye: «Wéle, mii a pan mɔ ma fàfaanwɔʔɔ ni, koro ga pye mii ga ba ni nyuu ní mɔ ní, Isirayɛli ye í da mii joomi lúro, koro ga pye be tága mɔ na làla o làla.» A Mowizi syɛ́ɛnbèle syɛ́ɛnrɛ joo n tɛ̀ɛn Yawe na.

Kolocɔlɔɔ n Mowizi fàra Sinayii nyanbelegi na

¹⁰ A Yawe gi joo Mowizi ma níì wi pye: «Da syée syɛ́ɛnbèle ma mi sa be jéemununi fáli kpéʔele níjanʔa ní nyɛ̀ʔɛna, mí be pye ki n yɛlɛ pe be búroyi jée.

¹¹ Pé peyɛɛ zámaga bi kwɔ́ɔ candaanri wógi na. Níì cán candaanri wógi na Yawe a tìgi syɛ́ɛnbèle myɛ nyɛ́nɛ na Sinayii nyanbelegi na.

¹² Ki n yɛlɛ mi láʔagologo wòlo syɛ́ɛnbèle ma mi nyanbelegi màʔa mi kpàra, ki joo syɛ́ɛnbèle ma mí be pye: ‹Ki n yɛlɛ yaa kɔ̀rɔsíi, yele a kɔ́ lúgu nyanbelegi na í, wàlá bi caa kɔ́ tánga ki kàgomi na í. Syɔ́ɔnwee faala wi ga tánga lè nyanbelegi na, pe a wee bee kpóo.

¹³ Syɔɔn a kɔlɔ̀ taʔa wi na í, kàjáa kàdɛnɛrɛ ní pe a wi wábagi kpóo, wàlá bi wi ŋɔɔn kpóo ní ŋaaya ní, a ki i nyɛ yaweele yoo, syɔɔn yoo, wi a ní kòro sìi na í.› Bàpɔw nyɛ́ngɛ wiimɛ ga tɔnɔ, pe a náa lúgu nyanbelegi na.»

¹⁴ A Mowizi tìgi nyanbelegi na n kári syɛ́ɛnbèle ma n sáà be jéemununi fáli kpéʔele, á be wɔ́ɔ̀ be búroyi jée.

¹⁵ A wi gi joo syɛ́ɛnbèle ma níì jo: «Ki n yɛlɛ ye yeyɛɛ zámaga ye kwɔ́ɔ canya taanri fúngo ni, yele wàa a kɔ́ nan cɔlɔɔ faala na í.»

¹⁶ A ki ga pye candaanri wógi nyɛ̀ʔɛ nyɔ́ɔ na, a nyɛ̀ʔɛni folomɔ, ní li nyɛ́ʔɛnɛmi, ní fàfaanwɔɔ-tèlege pye nyanbelegi na, tòmaagi wìimɛ si wɔ́ɔ i yirigi gbanʔama. A syɛ́ɛnmi i cɛ̀lɛ́ tɛɛkòrogi ni.

¹⁷ A Mowizi syɛ́ɛnbèle yirige tɛɛkòrogi ni pe sa Kolocɔlɔɔ fàra. A be sáà yére nyanbelegi tìgimɛ ni.

¹⁸ Sinayii nyanbelegi myɛ maa pye wírige, níì cán Yawe maa tìgi naà nínge ni n baa tɛ́ɛn ki ǹjogi ni. A wírigi bee i yìrigí mɔ a jo fúru naakpɔʔɔ wírige gii. A nyanbelegi myɛ i cɛ̀lɛ́ gbanʔama.

¹⁹ Tòmaagi wìimɛ maa ni kpɔ́ʔɔgi ni syée gbanʔama. Mowizi maa ni nyuu, Kolocɔlɔɔ si i syɛɛnlurugori kaangi wi ma ní yákpogbɔɔlɔ ní.

²⁰ Yawe maa tìgi n baa tɛ́ɛn Sinayii nyanbelegi na, níì Mowizi yeri, a wi lúgu yaà.

²¹ A Yawe gi joo Mowizi ma níì wi pye: «Tìgi maa syée mi sa syɛ́ɛnbèle sàmi mí gi joo mi gbàn be ma, mí be pye pe a kɔ́ jo poro a tìn bi pan naa mii Yawe ma ba mii wéle í. Kapye koro ban í, syɛɛnnɛʔɛmɛ a too kùu be ni.

²² Sáriga-wòlobèle pe wɔ́ɔ̄ nùuní mii Yawe na lè, ki n yɛlɛ poro í wɔ́ɔ peyɛɛ jéemununi fáli kpéʔele, jàngó mii Yawe a kɔ́ pèle nyúnyo pùuni be kabigi ni í.»

²³ A Mowizi gi joo Yawe ma níì wi pye: «Syɛ́ɛnbèle a fɔ̀lɔ́ lúgu Sinayii nyanbelegi na í, níì cán mɔ tiimaa n wolo sàmi níì gi joo n gbàn níì jo: ‹Láʔagologo wòlo mi nyanbelegi màʔa mi kpàra, mí gi yaʔa kɔlɔ̀ na Kolocɔlɔɔ ma.› »

²⁴ A Yawe wi pye: «Tìgi maa syée, koro kàdoʔo ma mɔ a ní lúgu naa, Aarɔn si pínɛ lúgu ní mɔ ní. Kàjáa sáriga-wòlobèle ní syɛ́ɛnmi a kɔ́ jo poro a tìn bi lúgu naa mii Yawe ma í, jàngó mii a kɔ́ pèle nyúnyo pùuni pe kabigi ni í.»

²⁵ A Mowizi tìgi n pan syɛ́ɛnmi ma n baa joo ní bi ní.