Yirile 18 - Cebaara Bible 2010

Mowizi ní wi céw too Zyeturo kéeli

¹ Gee myɛ Kolocɔlɔɔ kpéʔele Mowizi ní Isirayɛli ye ma lè, pe lè wi syɛ́ɛnbèle, Madyan ye sáriga-wòlow Zyeturo maa gee bee lóʔo. Zyeturo wi nyɛ Mowizi céw tóo. Wi maa gi lóʔo Yawe n Isirayɛli ye yirige Ezyipiti ni.

² Mowizi céw tóo Zyeturo maa Mowizi céw Sefora kɔ́ri n pínɛ ní wiyɛɛ ní. Níì cán Mowizi wi da wi tórigo,

³ n fàra wi nànbiigèle siin na. Wi maa ni wàa yiri Gerisyɔmi. Níì cán wi maa jo: «Mii i nyɛ nibɔɔn tánibɔnrɔ ni.»

⁴ Ní i wee yiri Eliyezɛɛri, níì cán wi maa jo: «Kolocɔlɔw wi lè mii tóow wóo, wi n mii dɛ̀ɛmɛ n mii syɔɔ Faraɔnw ŋɔsée ma.»

⁵ A Mowizi céw tóo Zyeturo Mowizi pìíbèle, ní wi céw kɔ́ri n pan wi ma fìími tára ma beè wi pye lè wodɛ́ɛɔn ní, Kolocɔlɔɔ nyanbelegi taana.

⁶ Wi maa tun a be sáà Mowizi pye: «Mii Zyeturo wi lè mɔ céw tóo, mii ní mɔ céw, ní wi pìíbèle siin i syée yaà mɔ ma.»

⁷ A Mowizi yiri n kári n sáà wi céw tóo fàra níì tìgi n kpùmɔnɔ wi taana ní wɔ́ɔ̀ wi syɔɔnri syɔɔnri. A be peyɛɛ zyáanri ní baa pínɛ n jée Mowizi fànikpaagi ni.

⁸ Gee myɛ Yawe kpéʔele Faraɔnw, ní Ezyipiti ye na lè Isirayɛli ye kéeli na, a Mowizi gee bee joo n tɛ̀ɛn wi céw tóo na, n fàra fɔ̀rɔyi myɛ na yi be taa lè kólogi na ní kánmee na Yawe be syɔɔ lè.

⁹ Kacǎnyee myɛ Yawe kpéʔele Isirayɛli ye na lè, ní kánmee na wi be yirige Ezyipiti ye kɔ́yi ni lè, a gee bee tɔ̀nɔ n pye Zyeturo ma fundaanra.

¹⁰ A Zyeturo jo: «Yawe n yɛlɛ waa wi kpɔ̀ʔɔrɔ́ níì cán woro wi yele yirige Ezyipiti ye kɔ́yi, ní Faraɔnw kɔ́yɔ ni. Wi n yele syɔɔ Ezyipiti fǎngi ma.

¹¹ Tɔ́ɔliw ni mii n gi cán ncan Yawe n kpɔ́ʔɔ n sɔ̀lɔ kolocɔlɔbèle wozanbèlē myɛ na. Wi n gee bee tɛ̀ɛn lǎli ni Ezyipiti ye da ni Isirayɛli ye kpéʔele pe fungo lè.»

¹² A Mowizi céw tóo Zyeturo sáriga-sórigoo wòlo, n fàra sárigawaa nikwɔɔ na Kolocɔlɔɔ ma. A Aarɔn ní Isirayɛli wolɛɛbèle myɛ pan n baa pínɛ n lìi ní Mowizi céw tóo ní Kolocɔlɔɔ yɛ́ʔɛ ma.

Mowizi n kùndigibéle télege paa kútiiw nyuu

¹³ Koro nyǐndaligi na, a Mowizi tɛ́ɛn ni syɛ́ɛnbèle kútii nyuu á syɛ́ɛnbèle yére Mowizi yɛ́ʔɛ ma nlaa nyǐngi nyɔ́ɔ na fwɔɔ n taa n sáà nan cângwɔɔgi nyɔ́ɔ na.

¹⁴ Gee myɛ Mowizi da ni kpéʔele ní syɛ́ɛnbèle ní lè, a Mowizi céw tóo ga gee bee nyaa, a wi jo: «Nyàʔá mɔ kpéʔele gee syɛ́ɛnbèle naa na? Nyàʔá na mɔ nibin gáà tɛ́ɛn, syɛ́ɛnbèle n si pan n baa yére mɔ yɛ́ʔɛ ma bi láa nyǐngi nyɔ́ɔ na bi sa nan cângwɔɔgi nyɔ́ɔ na?»

¹⁵ A Mowizi gi joo wi céw tóo ma níì wi pye: «Syɛ́ɛnbèle be maa mii ma koro ga pye poro í ba Kolocɔlɔɔ yíbe.

¹⁶ Syɛɛnrɛ ga wɔ́ɔ̀ pye pèle nínge ni, pe n pan mii ma mii í ba poro kútiiw ceri. Mii i Kolocɔlɔɔ tundunri ní wi làlwaw kèlē nyuu be ma.»

¹⁷ A Mowizi céw tóo wi yari: «Gee mɔ kpéʔele lè, ki ga nyɔɔ í.

¹⁸ Mɔ a miyɛɛ fǎngi kwɔ́ɔ, n fàra syɛ́ɛnbèle naa wóʔo na pe nyɛ ní mɔ ní lè. Níì cán fáliw naa túgoro n líbe n sɔ̀lɔ mɔ na. Mɔ nibin fánʔa o nyɛ di na í.

¹⁹ Tɔ́ɔliw ni ki n yɛlɛ mi mii jóomi lóʔo. Mii a mɔ lálii kéeli naa na, Kolocɔlɔɔ í wɔ́ɔ pye ní mɔ ní. Ki n yɛlɛ mɔ í pye syɛ́ɛnbèle ní Kolocɔlɔɔ níngi ni, koro ga pye mɔ tiimaa í da maa ní kérigèle ní Kolocɔlɔɔ yɛ́ʔɛ ma.

²⁰ Ki n yɛlɛ mɔ í da Kolocɔlɔɔ tundunri ní wi làlwabèle kɔ́rɔ tèé be na. Kólogee pe yɛlɛ bàā táanri lè, ní fáliwee be yɛlɛ bàā kpéʔele lè, mí wɔ́ɔ maa wee bee tèé be na.

²¹ Nǎnbèle pèle cɔɔnri syɛ́ɛnmi myɛ ni be pye báriga syɛ̀ɛnnɛ, pé wɔ́ɔ ra fɛ̀ɛgí Kolocɔlɔɔ na, si pye nǎnbèle pèle, bele be tan kányɛɛgi na lè, pe si o tɔ̀nɔpeeo caa í. Mi bele bee télege be pye kùndigibéle. Poro pèle a pye syɛ̀ɛnnɛ saala kagunɔ kagunɔ kùndigibéle, pèle si pye dabata-daa kùndigibéle, pèle si pye togoye siin-ziin ní kpɔrigɔ kpɔrigɔ kùndigibéle, pèle si pye kɛɛ-gɛɛ kùndigibéle.

²² Bele bee í da syɛ́ɛnbèle kútii nyuu làrigèle myɛ ni. Pe a ra maa ní kakpologèle myɛ ní mɔ ma, poro tiimaa sáā kayiligèle cɔɔnri. Kàa yirige mɔ túgori ni jàngó be tugo ní mɔ ní di na.

²³ Mɔ ga gee bee kpéʔele, kapye Kolocɔlɔɔ wi gi joo n gbàn mɔ ma, lǎli bee ni mɔ bárigaw a kwɔ́ɔ í. Syɛ́ɛnmi naa si wɔ́ɔ nan bi tɛɛnangi na yɛɛ̀nyinge na.»

²⁴ A Mowizi wi céw tóo jóomɔ lóʔo níì gi kpéʔele gee myɛ wi joo lè.

²⁵ A Mowizi báriga syɛ́ɛnbèle pèle nyɛ́nɛ n wòlo Isirayɛli ye myɛ níngi ni n télege syɛ́ɛnbèle nyúngo na, a be pye saala kagunɔ kagunɔ kùndigibéle, ní dabata-daa kùndigibéle, ní togoye siin-ziin ní kpɔrigɔ kpɔrigɔ kùndigibéle, ní syɛ̀ɛnnɛ kɛɛ-gɛɛ kùndigibéle.

²⁶ A bele bee i syɛ́ɛnbèle kútii cɛnɛ làrigèle myɛ ni, ní i maa ní kagbangèle ní Mowizi ma, poro tiimaa si i kayiligèle myɛ cɔɔnri.

²⁷ A Mowizi kólogi kaan wi céw tóo ma, a wi lúru n kári wi tári ma.